ၸဝ်ႈၼႃႈတီႈထႆး တီႉၺွပ်းလႆႈ ယႃႈမႃႉ 60 သႅၼ်ပၢႆ ၼႂ်းၸႄႈဝဵင်းမႄႈသၢႆ မိူင်းထႆး

မိူဝ်ႈဝၼ်းထီႉ 19 January 2022 (လိူၼ်ၵမ်လွင်ႈ 3 ၶမ်ႈ ပီႊတႆး 2116 ၼီႈ) သိုၵ်းထႆး၊ ပလိၵ်ႈထႆး ႁူမ်ႈပႃး ၸဝ်ႈၼႃႈတီႈၽၢႆႇၵဵဝ်ႇၶွင်ႈ တီႉၺွပ်းလႆႈ ယႃႈမႃႉ  မိၵ်ႈမၢႆ Y1 လႄႈ မိၵ်ႈမၢႆ 999 တီႈၼႂ်းၸႄႈဝဵင်းမႄႈသၢႆ ဢၼ်ပဵၼ်လႅၼ်လိၼ်ထႆး လႄႈ ဝဵင်းတႃႈၶီႈလဵၵ်း တိတ်းၸပ်းၵၼ်ၼၼ်ႉ ဝႃႈၼႆ။

ယႃႈမဝ်းၵမ်ၸိူဝ်းဢၼ်တီႉၺွပ်းလႆႈၼႆႉ ပဵၼ်ဢၼ်ႁဵတ်းဢွၵ်ႇၼႂ်းမိူင်းႁူမ်ႈတုမ်သေ ဢၢၼ်းလုၵ်ႉဢဝ်တၢင်း ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး သူင်ႇၵႂႃႇတီႈ မိူင်းထႆးပွတ်းၵၢင်ပုၼ်ႉလႄႈ ၸင်ႇလႆႈထုၵ်ႇတီႉၺွပ်းၸွမ်းတၢင်း ၼႆယဝ်ႉ။

ပိူင်ပဵၼ်ပွၵ်ႈၵမ်းၼႆႉ ၸုမ်းၸဝ်ႈၼႃႈတီႈၽၢႆႇၸွပ်ႇသွၵ်ႈၵူတ်ႇထတ်း ၸွမ်းလႅၼ်လိၼ် ႁၼ်မႅၼ်ႈလူတ်ႉၵႃးဢၼ်ထၢင်ႇထိူမ်လမ်းၼိုင်ႈသေ ၸင်ႇလႆႈႁႄႉ ၵိုတ်းၵူတ်ႇထတ်းလူတ်ႉၵႃး ဢၼ်မီးၽူႈၸၢႆးၼိုင်ႈၵေႃႉ ဢႃႇယု 28 ပီႊ ၵူၼ်းႁေႃႈၵႃးလႄႈ လႆႈထူပ်းႁၼ်ထူင်ၽိူၵ်ႇဢၼ်သႂ်ႇယႃႈမဝ်းၵမ်ဝႆႉ 33 ထူင်၊ ႁူမ်ႈယႃႈမႃႉတင်းမူတ်း 66 သႅၼ်မဵတ်ႉ ဝႃႈၼႆ၊၊

ယူႇတီႈၸဝ်ႈၼႃႈတီႈၽၢႆႇထႆးၶဝ် လၢမ်းၶၢတ်ႈတႄႉ ယႃႇမဝ်းၵမ်ၼႆႉ လုၵ်ႉမႃးတၢင်း လႅၼ်လိၼ် ထႆး-တႆး တိတ်းၸပ်းၵၼ်သေ တၢင်ႇသႂ်ႇပႄးလူင်းမႃးၸွမ်းသၢႆမႄႈၼမ်ႉ ယွၼ်ႉထတ်းႁၼ် ႁွႆးတိၼ်ၵူၼ်းတင်းၼမ် ၸွမ်းၽင်ႇၼမ်ႉၸိူဝ်းၼၼ်ႉ ဝႃႈၼႆ။

ယွၼ်ႉတီႈထူင်ယႃႈမဝ်းၵမ် ဢၼ်ၸဝ်ႈၼႃႈတီႈထႆး တီႉၺွပ်းလႆႈၼၼ်ႉ လႆႈႁၼ်ပၢႆႉလိၵ်ႈ သီၶဵဝ်၊ သီလႅင်၊ သီသွမ်ႇ တိတ်းၸပ်းဝႆႉၸွမ်းလႄႈ ၸဝ်ႈၼႃႈတီႈ ၽူႈမီးပုၼ်ႈၽွၼ်းၽၢႆႇထႆးၶဝ် တိုၵ်ႉသူင်ႇၵႂႃႇတီႈႁွင်ႈၵူတ်ႇထတ်းသေ တေၵူတ်ႇထတ်းတူၺ်းဝႃႈ ပဵၼ်ယႃႈမဝ်းၵမ်းသႅၼ်းလႂ် ၼႆယူႇယဝ်ႉ။

တႆးလွတ်ႈလႅဝ်း