ၸဝ်ႈၼႃႈတီႈထႆး တီႉၺွပ်းလႆႈ ယႃႈမဝ်းၵမ်တင်းၼမ် ၼႂ်းပိုၼ်ႉတီႈသၢမ်ၸဵင်ႇၶမ်း

သိုဝ်ႇၶၢဝ်ႇထႆး Maesai Press ဢွၵ်ႇၶၢဝ်ႇၵႂႃႇဝႃႈ မိူဝ်ႈဝၼ်းထီႉ 11 January 2022 ယၢမ်းၵၢင်ၶိုၼ်းၼၼ်ႉ ၸဝ်ႈၼႃႈတီႈထႆး လႄႈ ၵူၼ်းတေႃႉယႃႈမဝ်းၵမ် လႆႈပိုတ်းယိုဝ်းၵၼ် ၼႂ်းပိုၼ်ႉတီႈသၢမ်ၸဵင်ႇၶမ်း လႅၼ်လိၼ် ထႆး-တႆး-လၢဝ်း သေ ၽၢႆႇၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ်တင်းၼမ် ၼႆယဝ်ႉ။

ၸဝ်ႈၼႃႈတီႈထႆး လၢတ်ႈၼႄတီႈသိုဝ်ႇၶၢဝ်ႇဝႃႈ သိုၵ်းထႆးဢၼ်ယူႇၽၢႆႇတႂ်ႈၵုမ်းၵမ် တိူင်းသိုၵ်း မၢႆ (3)၊ ၽၢႆႇၽဵဝ်ႈမူၺ်ႉယႃႈမဝ်းၵမ် လႄႈ ပလိၵ်ႈထႆးၼႂ်းပိုၼ်ႉတီႈ ႁူမ်ႈၵၼ် ဢဝ်ႁူမ်ႇလူမ်ႈ တီႈႁိမ်းဝၢၼ်ႈသူပ်ႇရူၵ်ႉ ဢိူင်ႇဝဵင်း ၸႄႈဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆး ၸိုင်ႈထႆး သေ မိူဝ်ႈယၢမ်းၵၢင်ၶိုၼ်းမွၵ်ႈ 23:00 မူင်းၼၼ်ႉ လႆႈႁၼ်ၵူၼ်းၸုမ်းၼိုင်ႈ ၸေးထူင် ပႃးတင်းၵွင်ႈၵၢင်ႇ လုၵ်ႉတၢင်းမိူင်းတႆး လတ်းၶဝ်ႈမႃးၽၢႆႇတၢင်းမိူင်းထႆး လႄႈ ၽွင်းၸဝ်ႈၼႃႈထႆး ဢၢင်ႈတေၵူတ်ႇထတ်း ၼၼ်ႉ ၽၢႆႇၵူၼ်းတေႃႉယႃႈမဝ်းၵမ် ဢဝ်ၵွင်ႈပိုတ်းယိုဝ်းဢွၼ်တၢင်းလႄႈ သွင်ၽၢႆႇၸင်ႇလႆႈ ပိုတ်းယိုဝ်းၵၼ် ဝႃႈၼႆ။

ဝၢႆးသေသဵင်ၵွင်ႈယဵၼ်ၵႂႃႇယဝ်ႉ ၸဝ်ႈၼႃႈတီႈထႆး ၵူတ်ႇထတ်းၼႃႈလိၼ်သေ သိမ်းလႆႈ ယႃႈမႃႉမိၵ်ႈၵူႈသႅၼ်းသႅၼ်း ဢၼ်သႂ်ႇဝႆႉတီႈၼႂ်းထူင် တႃႇ 12 သႅၼ်မဵတ်ႉ ယႃႈဢၢႆႉသ် 2 kg လႄႈ ယႃႈၶေႇတႃႇမိၼ်ႇ 80 kg ၊ ၵွင်ႈပိုၼ်ဝိုဝ်းယၢဝ်း 1 လဝ်း၊ ၵွင်ႈ M 16 1 လဝ်း လႄႈ မၢၵ်ႇၵွင်ႈၸိုၼ်းယၢမ်းၵမ်ႈၽွင်ႈ ၼႆယဝ်ႉ။

တႆးလွတ်ႈလႅဝ်း