ၸုမ်းသိုၵ်း SSPP  ၵဵပ်းသဵၼ်ႈမၢႆ မုင်ႉႁေႃႁိူၼ်း ၼႂ်းၸႄႈဝဵင်းၼမ်ႉလၼ်ႈႁၢဝ်ႈႁႅင်း

ၸုမ်းသိုၵ်း SSPP ၶဝ် ဢထမ်ႇမၵဵပ်းသဵၼ်ႈသၢႆမၢႆ မုင်ႉႁေႃႁိူၼ်း (ဢဵင်ႇထွင်ႇၸူႉၸယိၼ်း) ၵူႈႁူဝ်ႁိူၼ်း ၼႂ်းဢိူင်ႇဝၢၼ်ႈလီႈ ၸႄႈဝဵင်းၼမ်ႉလၼ်ႈ လႄႈၼႂ်းၸႄႈဝဵင်းၵျွၵ်ႉမႄးႁၢဝ်ႈႁႅင်း။

မိူဝ်ႈဝၼ်းထီႉ 3 April 2022 (လိူၼ်ႁႃႈမႂ်ႇ 3 ၶမ်ႈ ပီႊတႆး 2116 ၼီႈ) ၸုမ်းသိုၵ်း SSPP လူင်းၵဵပ်းသဵၼ်ႈမၢႆ မုင်ႉႁေႃႁိူၼ်း (ဢဵင်ႇထွင်ႇၸူႉၸယိၼ်း) ၵူႈႁူဝ်ႁိူၼ်း ၼႂ်းဢိူင်ႇဝၢၼ်ႈလီႈ ၸႄႈဝဵင်းၼမ်ႉလၼ်ႈ ႁၢဝ်ႈႁႅင်းသေ သင်ႁူႉဝႃႈမီးလုၵ်ႈယိင်း၊ လုၵ်ႈၸၢႆးသွၼ်ႉ ၼႆ ၶဝ်ၺွပ်းဢဝ်ၵႂႃႇၵမ်းလဵဝ် ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ “ဢၼ်ၸုမ်းသိုၵ်းၶူဝ်းၶဵဝ် SSPP ၶဝ်လူင်းၵဵပ်းသဵၼ်ႈမၢႆ မုင်ႉႁေႃႁိူၼ်း ၵူႈႁူဝ်ႁိူၼ်းၼႆႉ ၶဝ်ၶႂ်ႈႁူႉဝႃႈႁိူၼ်းလႂ်မီး လုၵ်ႈယိင်း၊ လုၵ်ႈၸၢႆးသွၼ်ႉ ၼႆၶႃႈဢေႃႈ၊ ပေႃးၶဝ်ႁူႉယဝ်ႉၵေႃႈ ၶဝ်လူဝ်ႇၵဵပ်းသိုၵ်းၼၼ်ႉၶႃႈၼႃႇ လင်ႁိူၼ်းၸိူဝ်းမီး လုၵ်ႈယိင်းလုၵ်ႈ ၸၢႆးသွၼ်ႉၼၼ်ႉ သင်ၸိူဝ်ႉဝႃႈ လုၵ်ႈလၢင်းဢမ်ႇယူႇႁိူၼ်းၵေႃႈ ၶဝ်တေၺွပ်းဢဝ် ၵေႃႉပဵၼ်ပေႃႈမႄႈၵႂႃႇသေ တဵၵ်းႁႂ်ႈလုၵ်ႈလၢင်းၶဝ်မႃးပုတ်ႈတႅၼ်းၶႃႈဢေႃႈ ၼႆႉပဵၼ်ၽႅၼ်ၵၢၼ်လၢႆးၵဵပ်သိုၵ်းၶဝ်ယဝ်ႉ ဝႃႈၼႆ။

ယင်းသိုပ်ႇလၢတ်ႈၼႄထႅင်ႈဝႃႈ ” လိူဝ်သေဢၼ်ၶဝ်ၵဵပ်း လုၵ်ႈယိင်းလုၵ်ႈၸၢႆးသွၼ်ႉယဝ်ႉ ၶဝ်ယင်း ၶႂ်ႈလႆႈပႃး လင်ႁိူၼ်းၵူၼ်းဢၼ်ယၢမ်ႈၵႂႃႇ ႁဵတ်းသိုၵ်းၶူဝ်းလၢႆး RCSS/SSA သေဢၼ်လႆႈ ပေႃးသိုၵ်းလိုဝ်ႈ ၵၢၼ်ဝႆႉ 5 ပီႊၸိူဝ်းၼၼ်ႉဢေႃႈ သင်ၶဝ်မႃးမီးၸွမ်းဝၢၼ်ႈၸွမ်းၼႃးသေ မႃးယူႇၸွမ်း လုၵ်ႈၸွမ်းမေးၶဝ်ၸိူဝ်းၼႆႉ ပေႃးႁူႉၵေႃႈၶဝ်ဢဝ်ၵႂႃႇၵမ်းလဵဝ် ၸိူဝ်းဢၼ်ၵႂႃႇမီးယူႇ တၢင်ႇတီႈ မိူၼ်ၼင်ႇ မိူင်းထႆး၊ မိူင်းၶႄႇၸိူဝ်း ၼၼ်ႉသမ်ႉ ၶဝ်တေဢဝ်ပေႃႈမႄႈ ၵူၼ်းၼႂ်းႁိူၼ်းသေၵေႃႉၵေႃႉၵႂႃႇ ပေႃးယဝ်ႉၵေႃႈႁႂ်ႈၸိူဝ်းမီးၵႆၼၼ်ႉ မႃးပုၼ်ႈ တႅၼ်းဢဝ်ဢေႃႈ လၢတ်ႈၼႄ ၼင်ႇၼႆ။

သိုပ်ႇလၢတ်ႈထႅင်ႈဝႃႈ ” မိူဝ်ႈပူၼ်ႉမႃးဝၼ်းထီႉ 01 April 2022 ၼႆႉၵေႃႈ လႆႈႁူႉဝႃႈ ၸုမ်းသိုၵ်း SSPP ၶဝ်မႃးႁွင်ႉဢဝ်ၽူႈၵွၼ်းဢိူင်ႇ ဝၢၼ်ႈလီ ၵႂႃႇႁူပ်ႉၶဝ်ဢေႃႈ ၼၼ်ႉၵေႃႈၸီႉသင်ႇ ႁႂ်ႈၽူႈၵွၼ်းဢိူင်ႇ ယွၼ်းသဵၼ်ႈမၢႆ မုင်ႉႁေႃႁိူၼ်းလႄႈ ၵဵပ်းပႃးၵူၼ်း ဢေႃႈ ၵွပ်ႈၶဝ်ယၢမ်ႈပၼ်ၾၢင်ႉလႄႈ ၵဵဝ်ႇလူၺ်ႈလွင်ႈၼႆႉ ဢမ်ႇမီးၽႂ်ႁတ်းပၼ်ၶၢဝ်ႇလႃးလႃး ပေႃးၶဝ်ႁူႉမႃးသမ်ႉၸၢင်ႈပဵၼ်ၽေးထိုင် သၢႆၸႂ်ၼၼ်ႉၼႃႇ၊ ယၢမ်းလဵဝ် ၼႂ်းဢိူင်ႇဝၢၼ်ႈလီႈၸိူဝ်းၼႆႉ ပဵၼ်ဝႆႉၼႃႈတီႈသွၼ်ႉ ဢေႃႈ မိူၼ်ၼင်ႇသိုၵ်းလွႆၵေႃႈ ႁဝ်းၶႃႈလႆႈၵူဝ် သိုၵ်းၶူဝ်းၶဵဝ် SSPP ၵေႃႈလႆႈၵူဝ်ၶႃႈဢေႃႈ။

မိူၼ်ၼင်ႇၼႂ်းဢိူင်ႇဝၢၼ်ႈၸိင်းၼၼ်ႉ ဝၢႆးသေသိုၵ်း RCSS/SSA ထွၼ်ႁႅင်းသိုၵ်း ဢွၵ်ႇၵႂႃႇယဝ်ႉဢမ်ႇႁိုင် ၸုမ်းသိုၵ်း SSPP ၶဝ်မႃးၺွပ်းၵူၼ်းဝၢၼ်ႈၵႂႃႇ လၢႆလၢႆၵေႃႉသေ မၢင်ၵေႃႉၵေႃႈ ၺႃးၶဝ်ႁႅမ်တၢႆပႅတ်ႈၵွၼ်ႇ လိူဝ်ၼၼ်ႉၶဝ်ယင်းသိမ်းပႃး ၾူၼ်းၵူၼ်းမိူင်းဝႆႉ ဢမ်ႇပၼ်ၵူၼ်းမိူင်းၵပ်းသိုပ်ႇၽၢႆႇၼွၵ်ႈ တေႃႈထိုင်မိူဝ်ႈလဵဝ် ၶဝ်ယင်းပႆႇပၼ်ၶိုၼ်းၾူၼ်းၵူၼ်းဝၢၼ်ႈ လၢတ်ႈၼႄၼင်ႇၼႆ။

ၼႂ်းသွင်ဝူင်ႈပူၼ်ႉမႃးၼႆႉၵူၺ်း ၸုမ်းသိုၵ်း SSPP ၵဵပ်ႈသဵၼ်ႈမၢႆ မုင်ႉႁေႃႁိူၼ်း (ဢဵင်ႇထွင်ႇၸူႉၸယိၼ်း) လႄႈ ၺွပ်းၵူၼ်းမိူင်းႁၢဝ်ႈႁႅင်း လၢႆလၢႆပိုၼ်ႉတီႈ ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ ၸႄႈဝဵင်းမူႇၸႄႈ၊ ၼမ်ႉၶမ်း၊ တၢင်ႉယၢၼ်း၊  လႃႈသဵဝ်ႈ၊ ၼမ်ႉတူႈ၊ သီႇပေႃႉ၊ ၵျွၵ်ႉမႄး၊ ၼမ်ႉလၼ်ႈ ၸိူဝ်းၼႆႉ လိူဝ်သေၼၼ်ႉၼႂ်းၸိုင်ႈတႆးပွတ်းၸၢၼ်း မိူၼ်ၼင်ႇ ၸႄႈဝဵင်းမိူင်းၵိုင်၊ ၸႄႈဝဵင်းလၢႆးၶႃႈ၊ ၸႄႈဝဵင်းပၢင်လူင် ၸိူဝ်းၼႆႉၵေႃႈ ၶဝ်ၵဵပ်းသဵၼ်ႈမၢႆမုင်ႉႁေႃႁိူၼ်းယူႇမိူၼ်ၵၼ် ၼႆယဝ်ႉ။

မိူၼ်ၼင်ႇ တီႈဝဵင်းလၢႆးၶႃႈလႄႈ ၸႄႈဝဵင်းမိူင်းၵိုင်ၸိူဝ်းၼႆႉၵေႃႈၸုမ်းသိုၵ်း SSPP ၶဝ်ဢထမ်ႇမ ၵဵပ်းဢဝ်သဵၼ်ႈမၢႆမုင်ႉႁေႃႁိူၼ်း မၢႆၾၢင်ၵူၼ်းၵိုၵ်းႁိူၼ်းႁၢဝ်ႈႁႅင်းလႄႈ ၵူၼ်းမိူင်းပိုၼ်ႉတီႈၶဝ် ၵႂႃႇၸူးတီႈလုမ်းၽၢႆႇသဵၼ်ႈမၢႆ မၢႆၾၢင်ၵူၼ်းၵိုၵ်းႁိူၼ်း ၵူၼ်းမိူင်း လုမ်းလူင်ပွင်ၸိုင်ႈ (လဝၵ) ၶဝ်သေ မႄးၵႄႈၶႆႁႂ်ႈသၢႆမၢႆၵူၼ်းၵိုၵ်းႁိူၼ်းလႄႈ မၢႆၾၢင်မၼ်းထုၵ်ႇမႅၼ်ႈၸွမ်းလူၺ်ႈ ၼႂ်းၼႃႈႁိူၼ်းဢၼ်မီးဝႆႉၼၼ်ႉ ၵူႈဝၼ်းဝၼ်းလႄႈတင်းၼမ်ၼႆယူႇယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း