ၸုမ်းသိုၵ်း SSPP ႁွင်ႉၵူၼ်းမိူင်း ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉသေ ႁႂ်ႈၵူၼ်းမိူင်းႁဵတ်းၸွမ်းၼင်ႇၶဝ်လၢတ်ႈ

မိူဝ်ႈဝၼ်းထီႉ 3 April 2022 (လိူၼ်ႁႃႈမႂ်ႇ 3 ၶမ်ႈ ပီႊတႆး 2116 ၼီႈ) ၼႆႉ ၸုမ်းသိုၵ်း SSPP ၶဝ်ႁွင်ႉၵူၼ်းမိူင်းၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉသေ ႁွင်ႉမႃးၸီႉသင်ႇႁဵတ်းသၢင်ႈၸွမ်းၼင်ႇ ၶေႃႈဢၼ်ၶဝ်မၵ်းၶၢၼ်းၸီႉသင်ႇဢမ်ႇႁဵတ်း သၢင်ႈဢမ်ႇလႆႈ ပေႃးသၢၼ်ၶတ်းတေလႆႈၺႃးတၢမ်ႇ တၢင်းၽိတ်းၼၵ်းၼႃ ႁၢႆႉႁႅင်း ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈ ပွင်ႇၶၢဝ်ႇမႃးဝႃႈ ၸုမ်းသိုၵ်းၶူဝ်းၶဵဝ် SSPP ၶဝ် ႁွင်ႉဢဝ်ၵူၼ်းမိူင်း ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ  ၶႂ်ႈဝႃႈၵူႈဝၢၼ်ႈယဝ်ႉၶႃႈ မိူၼ်ၼင်ႇဝၢၼ်ႈၼႃးမၢၵ်ႇ‌ၶေႃ၊ ဝၢၼ်ႈႁူမ်ႈ၊ ဝၢၼ်ႈတူၼ်ႈၵႅင်း၊ ဝၢၼ်ႈႁူဝ်ၼႃး၊ ဝၢၼ်ႈၼႂ်းလူင်၊ ဝၢၼ်ႈတႃႈလူင်၊ ဝၢၼ်ႈၵွင်းႁုင်းၼႃးသၢင်း၊ ဝၢၼ်ႈၵဵတ်းၽူၼ်၊ ဝၢၼ်ႈၼႃးၸလွင်း ၸိူဝ်းၼႆႉသေ ႁဵတ်းပၢင်ၵုမ်ႇၵၼ်လႄႈ တဵၵ်းႁႂ်ႈၵူၼ်းမိူင်း ႁဵတ်းၸွမ်းၼင်ႇၶဝ်ၶႂ်ႈပဵၼ် ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ” ဢၼ်ၸုမ်းသိုၵ်းၶူဝ်းၶဵဝ် SSPP ဝၢၼ်ႈႁႆး ႁွင်ႉၵူၼ်းမိူင်း ၼႂ်းဢိူင်ႇၼႃးမၢၵ်ႇၶေႃ ႁဵတ်းပၢင်ၵုမ်ၼႆႉ ၶဝ်မႃးလၢတ်ႈယူႇလၢႆလၢႆလွင်ႈၶႃႈ ဢၼ်ၶဝ် ႁႂ်ႈၵူၼ်းမိူင်းႁဵတ်းၸွမ်းၼင်ႇၶဝ် ၶႂ်ႈလႆႈၶႂ်ႈပဵၼ်တေႉ တေမီးမိူၼ်ၼင်ႇ 1. ႁၢမ်ႈၵူၼ်းပၢႆႈဢွၵ်ႇဝၢၼ်ႈသေ ၵႂႃႇႁဵတ်းၵၢၼ်ၸွမ်းမိူင်းထႆး သင်ပၢႆႈတေသိမ်းဢဝ် ႁိူၼ်း လႄႈ သူၼ်ႁႆႈၼႃး ဢိၵ်ႇပႃးၶူဝ်းၶွင်ဢၼ်ၵိုတ်းဝႆႉတၢင်းလင်ၸိူဝ်းၼႆႉ တေဢဝ်ႁဵတ်းပဵၼ်ၶွင်မုၵ်ႉၸုမ်း၊ 2.တေလႆႈသႂ်ႇၶွၼ်ႇ လူတ်ႉၵႃး လႄႈ သူၼ်ႁႆႈၼႃး ၶိူင်ႈၸၢၵ်ႈၵူႈမဵဝ်း ၸွမ်းၼင်ႇမၵ်းၶၢၼ်းၵႃႈၶၼ်ၶွၼ်ႇၼၼ်ႉ၊ 3. လုၵ်ႈဢွၼ်ႇယိင်း လုၵ်ႈဢွၼ်ႇၸၢႆး 10 ၶူပ်ႇ ၶိုၼ်ႈၼိူဝ်တေလႆႈသႂ်ႇသဵၼ်မၢႆသိုၵ်း ပေႃးယွၼ်းမႃး တေဢမ်ႇလႆႈပၼ်လုတ်ႈပၼ်ႁၢမ်း ပေႃးဢမ်ႇလႆႈလုၵ်ႈၵေႃႈ ပေႃႈမႄႈမၼ်း တေလႆႈၵႂႃႇတႅၼ်းတၢင်၊ 4.ပေႃးတေႁဵတ်းပွႆးလၢမ်းသင်ၵေႃႈယဝ်ႉ တေလႆႈတၢင်ႇလၢတ်ႈတီႈ ၸဝ်ႈၸႄႈဝဵင်း သေၸင်ႇတေလႆႈႁဵတ်း” ၸိူဝ်းၼႆႉဢေႃႈ ဝႃႈၼႆ။

ၸုမ်းသိုၵ်း SSPP ၶဝ်ၼႆႉ ၵႂႃႇႁွတ်ႈၽႅဝ်တီႈလႂ်ၵေႃႈ ႁွင်ႉဢဝ်ၵူၼ်းဝၢၼ်ႈၵူၼ်းမိူင်း ႁဵတ်းပၢင်ၵုမ် တဵၵ်းတဵင်ၸီႉသင်ႇႁႂ်ႈႁဵတ်းၸွမ်းၼင်ႇ ၶဝ်ၶႂ်ႈလႆႈၶႂ်ႈပဵၼ်ယဝ်ႉဢမ်ႇၵႃး ယွၼ်းပႃးသဵၼ်ႈမၢႆ မုင်ႉႁေႃႁိူၼ်း (ဢဵင်ႇထွင်ႇၸူႉၸယိၼ်း) ၵူၼ်းမိူင်း တႃႇတေႁူႉဝႃႈ ပိူၼ်ႈမီးလုၵ်ႈမီးလၢင်းလၢႆၵေႃႉ သင်ႁူႉယဝ်ႉသမ်ႉႁွင်ႉၵႂႃႇၸွမ်းၵမ်းလဵဝ် ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း