ၸၢတ်ႈၸိုင်ႈလုမ်ႈၾႃႉ ယွၼ်းၶႂၢင်ႉလူင်ပွင်ၸိုင်ႈထႆး တႃႇၵႂႃႇသူႇၸႂ်း ၵူၼ်းပၢႆႈၽေး လႅၼ်လိၼ်မိူင်းယၢင်း

မိူဝ်ႈဝၼ်းထီႉ 20 December 2021 (လိူၼ်ၸဵင်လွင်ႈ 2 ၶမ်ႈ ပီႊတႆး 2116 ၼီႈ) ၼႆႉ ၽၢႆႇၸွႆႈထႅမ်ၵူၼ်းထူပ်းၽေး ၸၢတ်ႈၸိုင်ႈလုမ်ႈၾႃႉ (UNHCR) လႆႈတုၵ်းယွၼ်းထိုင် လူင်ပွင်ၸိုင်ႈထႆး တႃႇတေၵႂႃႇၸွႆႈထႅမ် ၵူၼ်းပၢႆႈၽေး ဢၼ်ႁွတ်ႈၽႅဝ်ယူႇဝႆႉၽင်ႇမိူင်းထႆး ယွၼ်ႉပၢင်တိုၵ်း တီႈလႅၼ်လိၼ် မိူင်းႁူမ်ႈတုမ် လႄႈ မိူင်းထႆး ၼၼ်ႉဝႃႈၼႆ။

မိူဝ်ႈပူၼ်ႉမႃး ၶၢဝ်းတၢင်းလၢႆဝၼ်းဢွၼ်ႇၼႆႉၵူၺ်း ၸုမ်းႁူမ်ႈတုမ်ၸိူဝ်ႉၸၢတ်ႈယၢင်း (KNU/KNLA)  လႄႈ ၶွင်ႇသီႇသိုၵ်းမၢၼ်ႈ ဢၼ်ယိုတ်းဢၢမ်းၼၢတ်ႈဝၢၼ်ႈမိူင်းဝႆႉၼၼ်ႉ လႆႈပဵၼ်ပၢင်တိုၵ်းၵၼ် တီႈဝဵင်းလေးၵေႉၵေႃႇ ၸႄႈဝဵင်းမျႃႉဝတီႇ မိူင်းယၢင်း ဝႃႈၼႆ။

ယူႇတီႈၸုမ်း UNHCR ၵေႃႈ လႆႈဢွၵ်ႇလိၵ်ႈပိုၼ်ၽၢဝ်ႇ လၢတ်ႈၵႂႃႇပႃးဝႃႈ ယွၼ်ႉပၢင်တိုၵ်းသေ ၼႂ်းဝၼ်းထီႉ 16 December 2021 ၼၼ်ႉ ၵူၼ်းပၢႆႈၽေးၼႂ်းမိူင်းယၢင်း လႆႈၶၢမ်ႈၼမ်ႉသေ ပၢႆႈၶဝ်ႈ ၼႂ်းၸႄႈတွၼ်ႈတၢၵ်ႇ ၸိုင်ႈထႆး မီးမွၵ်ႈ 700 လႄႈ ယွၼ်ႉပၢင်တိုၵ်းတိုၵ်ႉသိုပ်ႇပဵၼ် ဢမ်ႇထၢတ်ႇ လႄႈ  တေႃႇထိုင်မိူဝ်ႈဝႃး ဝၼ်းထီႉ 20 December 2021 ၼႆႉ ၵူၼ်းပၢႆႈၽေးမီးၵႂႃႇယဝ်ႉ 3,900 ၵေႃႉ ၼႆႉဝႃႈၼႆ။

ၼွၵ်ႈလိူဝ်ၼၼ်ႉ ၸုမ်း UNHCR ၵေႃႈ ယင်းလႆႈပိုၼ်ၽၢဝ်ႇလၢတ်ႈၼႄပႃးဝႃႈ မီးလွင်ႈမႆႈၸႂ်ၸွမ်း ၵူၼ်းပၢႆႈၽေးၸိူဝ်းၼႆႉလႄႈ တႃႇတေၸၢင်ႈလႆႈၸွႆႈထႅမ် ၵူၼ်းထူပ်းၽေးၸိူဝ်းၼႆႉ ႁႂ်ႈၶိုတ်းတၼ်း ၶၢဝ်းယၢမ်းၼၼ်ႉၵေႃႈ ၸုမ်း UNHCR လႄႈ NGO တၢင်ႇၸုမ်းၵေႃႈ တိုၵ်ႉယွၼ်းၶႂၢင်ႉဝႆႉ တီႈလူင်ပွင်ၸိုင်ႈထႆး တႃႇတေၵႂႃႇၸွႆႈ ၵူၼ်းထူပ်းၽေးၸိူဝ်းၼႆႉယူႇဝႃႈၼႆ။

ၽၢႆႇတၢင်းလူင်ပွင်ၸိုင်ႈထႆး ၼႂ်းၸႄႈတွၼ်ႈတၢၵ်ႇတႄႉ လႆႈဢွၵ်ႇလိၵ်ႈပိုၼ်ၽၢဝ်ႇၵႂႃႇ မိူဝ်ႈဝႃး ဝၼ်းထီႉ 20 December 2021 ယၢမ်းတၢမ်းၶမ်ႈၼၼ်ႉတႄႉဝႃႈ ပၢင်တိုၵ်းတီႈလႅၼ်လိၼ် ယဵၼ်ၵႂႃႇယဝ်ႉၽွင်ႈလႄႈ ၵူၼ်းပၢႆႈၽေးၵမ်ႈၽွင်ႈ ဢဝ်ၵၢင်ၸႂ်ၸဝ်ႈၵဝ်ႇသေ ပွၵ်ႈၶိုၼ်းယဝ်ႉၵေႃႈ မီးယူႇၽွင်ႈလႄႈ ယၢမ်းလဵဝ် ၵူၼ်းပၢႆႈၽေး ဢၼ်တိုၵ်ႉၵိုတ်းယူႇၼႆႉ သွင်ဢွင်ႈတီႈႁူမ်ႈၵၼ် တေမီးယူႇ မွၵ်ႈ 3,500 ၵေႃႉ ၼႆႉၵူၺ်းယဝ်ႉ ဝႃႈၼႆ။

ၽၢႆႇတၢင်းၸုမ်းၼၢင်းယိင်းယၢင်း (KWO) တႄႉ တွပ်ႇလၢတ်ႈတီႈသိုဝ်ႇၶၢဝ်ႇ AFP ဝႃႈ မၢင်ပိုၼ်ႉတီႈၼႆႉ ပၢင်တိုၵ်းတိုၵ်ႉပဵၼ်ႁၢဝ်ႈႁႅင်းဝႆႉယူႇလႄႈ ၵူၼ်းမိူင်းၵမ်ႈပႃႈၼမ်ၵေႃႈ တိုၵ်ႉၵူဝ်ႇႁႄဝႆႉယူႇဝႃႈၼႆ။

ၼႂ်းဝၼ်းထီႉ 20 December 2021 ၼႆႉ ပၢင်တိုၵ်းပဵၼ်ၵႂႃႇတီႈ မႄႉထေႃႇတလေးသေ ၵူၼ်းမိူင်း မွၵ်ႈ 1,500 ၵေႃႉၼႆႉ လႆႈပၢႆႈၶဝ်ႈၵႂႃႇတၢင်းမိူင်းၸိုင်ႈထႆးဝႆႉသေ ၵဵဝ်ႇလူၺ်ႈလွင်ႈပၢင်တိုၵ်း တီႈမႄႉထေႃႇတလေး ၼႆႉသေ ၽူႈၶၢၼ်ပၢၵ်ႇတပ်ႉသိုၵ်းမၢၼ်ႈ ၸွမ်ႁၢၼ် ၸေႃႇမိၼ်းထုၼ်းဝႃႈ တိုၵ်ႉဢုပ်ႇဢူဝ်းငူပ်ႉငီႉၵၼ်တင်း KNU ဝႆႉယူႇ ၼင်ႇႁိုဝ် ပေႃးတေၵုမ်းထိင်းလႆႈငဝ်းလၢႆးပၢင်တိုၵ်း တီႈမႄႉထေႃႇတလေး ၼၼ်ႉဝႃႈၼႆ။

တႆးလွတ်ႈလႅဝ်း