ၼမ်ႉမၼ်းၶိူင်ႈၸၢၵ်ႈ (ထၢတ်ႈသီႇ) တီႈၽႃၵၢၼ်ႉၶိုၼ်ႈသုင်ႁႅင်း

သိုၵ်းမၢၼ်ႈ ဢမ်ႇပၼ်ၸဝ်ႈၵႃးတၢင်ႇၵုၼ်ႇတေႃႉတၢင်ႇ ၼမ်ႉမၼ်းၶိူင်ႈၸၢၵ်ႈ (ထၢတ်ႈသီႇ) 92 လႄႈ 95 ၶဝ်ႈၼႂ်းဝဵင်းၽႃၵၢၼ်ႉသေ မိူဝ်ႈလဵဝ်ၵူၼ်းမိူင်း ထူပ်းတၢင်းယၢပ်ႇၽိုတ်ႇ လႄႈ ၼမ်ႉမၼ်းဢၼ်ၵိုတ်းလိူဝ်ၼႂ်းဝဵင်းၼၼ်ႉသမ်ႉ ၵႃႈၶၼ်ၶိုၼ်ႈသုင်ႁႅင်းပူၼ်ႉတီႈ။

ဝၢႆးသေ သိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ ၵူၼ်းမိူင်း ၵူၼ်းသိုၵ်း KIA တီႈ ဢၼၼ်ႉပႃ ဝဵင်းၽႃၵၢၼ်ႉ မိူဝ်ႈဝၼ်းထီႉ 23 October 2022 (လိူၼ်သိပ်းဢဵတ်းလပ်း ပီႊတႆး 2116 ၼီႈ) ယဝ်ႉၼၼ်ႉ သိုၵ်းမၢၼ်ႈ လႆႈတင်ႈလၢၼ်ႇတင်းၼမ်သေ ၵူတ်ႇထတ်းၵူၼ်းမိူင်း ၸဵမ်လူတ်ႉ/ၵႃး ႁၢဝ်ႈႁႅင်းလႄႈ ဢမ်ႇပၼ်ဢဝ်ၼမ်ႉမၼ်း ၶိူင်ႈၸၢၵ်ႈ (ထၢတ်ႈသီႇ) ၶဝ်ႈၼႂ်းဝဵင်းၽႃၵၢၼ်ႉ ဝႃႈၼႆ။

ၵူၼ်းမိူင်းလၢတ်ႈၼႄဝႃႈ ၶၼ်ၼမ်ႉမၼ်းၶိုၼ်ႈမႃးႁႅင်းၼႆႉ မီးမွၵ်ႈၼိုင်ႈဝူင်ႈၼႆႉယဝ်ႉ မိူဝ်ႈလဵဝ် ၵႃးႁဝ်းၶႃႈဢမ်ႇမီးၼမ်ႉမၼ်းလႄႈ တမ်ႉဢမ်ႇလႆႈႁေႃႈလူးၵွၼ်ႇ၊ ဝၼ်းၼၼ်ႉ ၼမ်ႉမၼ်းၵႃးမူတ်းၸွမ်းတၢင်းလႄႈ ၵႂႃႇႁႃထၢမ်သိုဝ်ႉသမ်ႉ ၼိုင်ႈၵႃႇလၢၼ်ႇ 20,000 ပျႃး မိူဝ်ႈလဵဝ်ထိုင်ၵႂႃႇ 25,000 ပျႃး၊ မၼ်းၵႃႈၼႃႇယဝ်ႉလႄႇ၊ ၼမ်ႉမၼ်းၶိူင်ႈၸၢၵ်ႈ တီႇၸႄႇ သမ်ႉလိူင်ႇၼႃႇ၊ ဢၼ်ႁႃယၢပ်ႇသမ်ႉပဵၼ် ထၢတ်ႈသီႇ၊ ပေႃးပဵၼ် ၶွမ်ႇမၼီႇတႄႉ ၼမ်ႉမၼ်းၶဝ်ၵဵပ်းၾၢင်ႉဝႆႉလႄႇၼေႃႈ၊ ဢၼ်ထူပ်းတၢင်းယၢပ်ႇ ၽိုတ်ႇယူႇၼႆႉသမ်ႉ ပဵၼ်ၵူၼ်းမိူင်းၸိူင်ႉႁဝ်းၼႆႉၼႃႇ ဝႃႈၼႆ။

ယွၼ်ႉၼမ်ႉမၼ်းၶိူင်ႈၸၢၵ်ႈၶၢတ်ႇ လႄႈ ပၢမ်ႉၼမ်ႉမၼ်းယႂ်ႇၸိူဝ်းၼႆႉၵေႃႈ ဢွၼ်ၵၼ်ၵိုတ်းၶၢႆဝႆႉဝႃႈၼႆ၊ ၵူၼ်းမိူင်းၸိူဝ်းမီးၼမ်ႉမၼ်းထၢတ်ႈသီႇ ၼၼ်ႉသမ်ႉ ဢဝ်ဢွၵ်ႇမႃးၶၢႆ ၼိုင်ႈၵႃႇလၢၼ်ႇ 25,000 ပျႃး လႄႈ ၵူၼ်းမိူင်းမီးလွင်ႈယၢပ်ႇၽိုတ်ႇ တႃႇသိုဝ်ႉၸႂ်ႉၼႂ်းၵၢၼ်ငၢၼ်း ၼႆယဝ်ႉ။

မိူဝ်ႈၼႂ်းလိူၼ် April 2022 ၼၼ်ႉၵေႃႈ ၵႃႈၶၼ်ၼမ်ႉမၼ်းၶိူင်ႈၸၢၵ်ႈ တီႈဝဵင်းၽႃၵၢၼ်ႉ ယၢမ်ႈၶိုၼ်ႈသုင်ထိုင် ၼိုင်ႈၵႃႇလၢၼ်ႇ 30,000 ပျႃး ဝႃႈၼႆ။

တႆးလွတ်ႈလႅဝ်း
ၶေႃႈမုၼ်း−The Voice of Shan-NI

Facebook

ၶၢဝ်ႇလိုၼ်းသုတ်း