မိူဝ်ႈဝၼ်းထီႉ 13 June 2022 (ဝၼ်းလိူၼ်ၸဵတ်းမူၼ်း ပီႊတႆး 2116 ၼီႈ) ယွၼ်ႉမႄႈၼမ်ႉဢူႉရူႉ ၼွင်းၶိုၼ်ႈသေ ႁဵတ်းႁႂ်ႈၼမ်ႉၼွင်းထူမ်ႈ ၶူဝ် လႄႈ သဵၼ်ႈတၢင်း ၸွမ်းၼႂ်းဝၢၼ်ႈၵမ်ႈၽွင်ႈ ဢၼ်မီးၼႂ်းၸႄႈဝဵင်းႁူမ်ႈမၢၵ်ႇလၢင်း၊ တိူင်းၸႄႈၵႅင်း ဝႃႈၼႆ။
မိူဝ်ႈဝၼ်းထီႉ 12 June 2022 ၼၼ်ႉသမ်ႉ ယွၼ်ႉၼမ်ႉၶိုၼ်ႈသုင်သေ ၼွင်း ထူမ်ႈၸွမ်းပွၵ်ႉၵမ်ႈၽွင်ႈ လႄႈၸွမ်းဝၢၼ်ႈဢၼ်မီး ၼႂ်းၸႄႈဝဵင်းၽႃၵၢၼ်ႉ မိူင်းၶၢင် မိူၼ်ၵၼ် ဝႃႈၼႆ။
ၵူၼ်းဝၢၼ်ႈ ၼႂ်းၸႄႈဝဵင်းၽႃၵၢၼ်ႉၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇဝႃႈ “မိူဝ်ႈၶမ်ႈဝႃးတႄႉ ၼမ်ႉၼွင်းၶိုၼ်ႈႁႅင်းဝႆႉ၊ ၼႂ်ၼႆႉတႄႉ ၼမ်ႉယွမ်းၶိုၼ်းယဝ်ႉ ၵူၺ်းၵႃႈ ပွၵ်ႉဢၼ်မီးတႅမ်ႇတႄႉ ၼမ်ႉတိုၵ်ႉထူမ်ႈဝႆႉယူႇ” ဝႃႈၼႆ။
ၽၢႆႇၾိင်ႈၾႃႉရႃႇသီႇ လၢမ်းၶၢတ်ႈဝႆႉဝႃႈ ၼႂ်းဝူင်ႈဝၢင်ႈၼႆႉ ၸွမ်းပိုၼ်ႉတီႈ ၼႂ်းတိူင်းၸႄႈၵႅင်းပွတ်းႁွင်ႇ၊ ၼႂ်းမိူင်းၶၢင် ၊ ၼႂ်းမိူင်းတႆးပွတ်းႁွင်ႇ လႄႈ ပွတ်းဢွၵ်ႇ ၸိူဝ်းၼႆႉ ၾူၼ်ၸၢင်ႈတေတူၵ်းႁႅင်းလႄႈ လိူဝ်ၼၼ်ႉ မႄႈၼမ်ႉဢီႇရႃႇဝတီႇ(ၼမ်ႉၵဵဝ်) လႄႈမႄႈၼမ်ႉၶျိၼ်းတႂိၼ်းၵေႃႈ ၸၢင်ႈၼွင်းၶိုၼ်ႈၼႆ လူင်ပွင်ၸိုင်ႈ NUG ၊ ႁွင်ႈၵၢၼ်ၽၢႆႇတူၺ်းထိုင်လူလွမ်ၵူၼ်းလႄႈ ၽွင်းလူင်ၽၢႆႇၵႅတ်ႇၶႄ ပိုၼ်ၽၢဝ်ႇၼႄဝႆႉၼင်ႇၼႆ။
လႆႈႁူႉထႅင်ႈဝႃႈ မိူဝ်ႈၼႂ်းဝၼ်းထီႉ 13 June 2022 ယၢမ်းဝၢႆးဝၼ်း 15:00 မူင်းၼၼ်ႉ ၵူၼ်းၸၢႆးၵေႃႉၼိုင်ႈ မိူဝ်ႈၽွင်းတိုၵ်ႉတၢၵ်ႇၾူၼ်ထႆၼႃးယူႇ တီႈဝၢၼ်ႈတွင်ႇတူႇသု ၸႄႈဝဵင်းပႃႇၵိူဝ် တိူင်းပႃႇၵိူဝ်ၼၼ်ႉ ထုၵ်ႇၾႃႉၽႃႇ လူႉတၢႆၵႂႃႇ ဝႃႈၼႆ။
ယွၼ်ႉတႄႇၶဝ်ႈၼႂ်းႁူဝ်ႁိုဝ်ႉၶၢဝ်းၾူၼ်ယဝ်ႉလႄႈ ငဝ်းလၢႆးၾိင်ႈၾႃႉၾူၼ်လူမ်း ဢမ်ႇတၢႆတူဝ် ၽေးသၽႃႇဝလႅၵ်ႈလၢႆႈလႄႈ ထုၵ်ႇလီလႆႈၾၢင်ႉသတိတေႉတေႉ ယူႇယဝ်ႉ။
တႆးလွတ်ႈလႅဝ်း