ၽူႈၵွၼ်းတိူင်းသိုၵ်း သၢမ်ၸဵင်ႇ ႁႄႉႁၢမ်ႈ လွင်ႈတေၽုၵ်ႇတူၼ်ႈမႆႉ တီႈၸႄႈဝဵင်းၵဵင်းတုင်

ယူႇတီႈ လုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး Restoration Council of Shan State – RCSS ဝဵင်းၵဵင်းတုင် လႄႈ ပေႃႈမႄႈပီႈၼွင်ႉၵူၼ်းမိူင်း ဝဵင်းၵဵင်းတုင် တေႁူမ်ႈၵၼ်ၽုၵ်ႇတူၼ်ႈမႆႉ ႁႂ်ႈသၽႃႇဝ သိင်ႇဝႅတ်ႉလွမ်ႉႁိမ်းႁွမ်း ႁၢင်ႈလီ တိူဝ်းတွၼ်းလိူဝ်ၵဝ်ႇ တီႈၼႂ်းၸႄႈဝဵင်းၵဵင်းတုင် ၼၼ်ႉ ထုၵ်ႇၽူႈၵွၼ်းတိူင်းသိုၵ်း သၢမ်ၸဵင်ႇ (တသၶ) ဝဵင်းၵဵင်းတုင် ႁႄႉႁၢမ်ႈၼႆယဝ်ႉ။

မိူဝ်ႈဝႃးဝၼ်းထီႉ 02 July 2019 ယၢမ်းဝၢႆးဝၼ်း 14:30 မူင်း ၸွမ်ႁၢၼ် ၶိၼ်ႇလၢႆႇ ၽူႈၵွၼ်းတိူင်း သိုၵ်းသၢမ်ၸဵင်ႇ (တသၶ) ဝဵင်းၵဵင်းတုင် ႁွင်ႉ ၸဝ်ႈၸူဝ်းမိူင်း ၽူႈၸတ်းၵၢၼ် လုမ်းၵပ်းသၢၼ် လူင်ပွင်ၸိုင်ႈမၢၼ်ႈ (ဢၼ် RCSS ပၵ်းလုမ်းဝႆႉတီႈဝဵင်းၵဵင်းတုင်) ၵႂႃႇႁူပ်ႉထူပ်းထိုင်တီႈတပ်ႉသေ လၢတ်ႈဝႃႈ ႁႂ်ႈတူၺ်း ႁၼ်ထိုင်သလေႇၼႃႈတႃ ၽၢႆသိုၵ်းမၢၼ်ႈ လႄႈ လွင်ႈတေၽုၵ်ႇတူၼ်ႈမႆႉၼၼ်ႉၵေႃႈ ဢမ်ႇပၼ်ၸတ်းႁဵတ်း ဝႃႈၼင်ႇၼႆ ၊ ၵဵဝ်ႇၵပ်းလူၺ်ႈလွင်ႈ သိုၵ်းမၢၼ်ႈႁႄႉႁၢမ်ႈၼႆႉသေ မၼ်းၼႄၽၢင်ႁၢင်ႈၵႂႃႇဝႃႈ ဢမ်ႇၶႂ်ႈပူၵ်းပွင် သၽႃႇဝ သိင်ႇဝႅတ်ႉလွမ်ႉ ၼႂ်းပိုၼ်ႉတီႈ ႁႂ်ႈတိူဝ်းတွၼ်း ႁၢင်ႈလီလိူဝ်ၵဝ်ႇ ယူႇယဝ်ႉ။

ၵဵဝ်ႇလူၺ်ႈၽူႈၵွၼ်းတိူင်းသိုၵ်းမၢၼ်ႈ ႁႄႉႁၢမ်ႈၼၼ်ႉသေ မိူဝ်ႈၼႆႉဝၼ်းထီႉ 03 July 2019 ယၢမ်းၵၢင်ၼႂ် 07:00 မူင်း ၸွမ်ႁၢၼ် ပွင်ၶိူဝ်း ဢွၼ်ႁူဝ်လုၵ်ႈၸုမ်း RCSS  ၊ သင်ႇၶၸဝ်ႈ ဢိၵ်ႇတင်း ပေႃႈမႄႈပီႈၼွင်ႉ ၵူၼ်းမိူင်း တီႈၸမ်တီႈၵႆတင်းၼမ် ႁူမ်ႈၵၼ်ၸတ်းႁဵတ်းပၢင်ႁူပ်ႉထူပ်း ဢွင်ႈတီႈဝတ်ႉသၢဝ်းပႅတ်ႈသေ ၸွမ်ႁၢၼ် ပွင်ၶိူဝ်း ၊ ၸဝ်ႈသိုၵ်းလူင် ၵွၼ်းၸိုၼ်ႈ ၊ ၸဝ်ႈပိုၼ်ၶမ်း လႄႈ ၽူႈမီးပၺ်ႇၺႃႇ ထႅင်ႈလၢႆၸဝ်ႈ လႆႈမွၵ်ႇလၢတ်ႈ ၶေႃႈၵႂၢမ်း ၵဵဝ်ႇၵပ်းလူၺ်ႈ ၵၢၼ်ၽုၵ်ႇသွမ်ႈတူၼ်ႈမႆႉ လႄႈ ၽေးၶဵၼ်ၵၢၼ်တႅပ်းမႆႉ ယူႇယဝ်ႉ။

ဝၢႆးသေ ပၢင်ႁူပ်ႉထူပ်းၵၼ်ယဝ်ႉတူဝ်ႈၼၼ်ႉ ၽူႈယႂ်ႇၵူၼ်းလူင် RCSS ၊ သင်ႇၶၸဝ်ႈ လႄႈ ပေႃႈမႄႈၵူၼ်းမိူင်း ဢိၵ်ႇတင်း ၽၢႆႇပႃႇမႆႉ လူင်ပွင်ၸိုင်ႈ ႁူမ်ႈၵၼ်ဢဝ်တူၼ်ႈမႆႉ ၵူႈလွင်ႈလွင်ႈ တင်းၼမ် 800 တူၼ်ႈ သေယဝ်ႉ ၵႂႃႇၽုၵ်ႇသွမ်ႈ ဢွင်ႈတီႈႁူင်းႁဵၼ်း (ပၵ) ၵျွင်းဝၢၼ်ႈငႅၼ်း ဢိူင်ႇၵၢတ်ႇတဝ်ႇ ၊ ႁူင်းႁဵၼ်းၸိူဝ်ႉၸၢတ်ႈ ထၢတ်ႈႁူဝ်သိူဝ် ဢိူင်ႇၵၢတ်ႇၽႃႉ လႄႈ တီႈႁိမ်းဝၢၼ်ႈၵၢင် ဢိူင်ႇမိူင်းလၢပ်ႈ ၸႄႈဝဵင်းၵဵင်းတုင် ၼႆယဝ်ႉ။

ၽွၼ်းလီၵၢၼ်ၽုၵ်ႇတူၼ်ႈမႆႉ ၼႆႉ ႁဵတ်းႁႂ်ႈသိင်ႇဝႅတ်ႉလွမ်ႉႁိမ်းႁွမ်းႁဝ်း ႁၢင်ႈလီတိူဝ်းတွၼ်းမႃး ၊ ႁဵတ်းႁႂ်ႈ ၼမ်ႉၵိၼ်သဵၼ်ႈသႂ် လႄႈ ၸႂ်ႉလိူင်ႇၵိုၼ်းမႃး ၊ ႁဵတ်းႁႂ်ႈလွင်ႈႁွၼ်ႉမႆႈၼၼ်ႉ လူတ်းယွမ်းၵႂႃႇ ၊ ႁဵတ်းႁႂ်ႈ ၾိင်ႈတိုၼ်းပဵၼ် သၽႃႇဝ ႁိမ်းႁွမ်းၵတ်းယဵၼ်သိူဝ်းသႃႇလီမႃး ၊ ႁဵတ်းႁႂ်ႈပၢႆးယူႇလီၵူၼ်းႁဝ်း တိူဝ်းတွၼ်း ၶႅမ်ႉမႃး လိူဝ်ၵဝ်ႇ ယူႇယဝ်ႉ။

ပၢင်ၽုၵ်ႇသွမ်ႈတူၼ်ႈမႆႉ ႁႂ်ႈၾိင်ႈတိုၼ်းပဵၼ် သၽႃႇဝႁၢင်ႈလီ တိူဝ်းတွၼ်းလိူဝ်ၵဝ်ႇ တီႈၼႂ်းၸႄႈဝဵင်းၵဵင်းတုင် ၼႆႉ တေလႆႈဝႃႈ ပဵၼ်ပွၵ်ႈၵမ်း 1 ၼႆ လႆႈႁူႉၸွမ်းမီးၼင်ႇၼႆ။

တႆးလွတ်ႈလႅဝ်း