ၽၵ်းယိူဝ်ႈၼၢင်းၶဵဝ်  ဢၼ်ၵူၼ်းပဵၼ်ယဵဝ်ႈဝၢၼ် ထုၵ်ႇလီငိူင်ႉဝႄႈ

တၢင်းပဵၼ်ယဵဝ်ႈဝၢၼ်ၼႆႉ ပဵၼ်မႃးယွၼ်ႉထၢတ်ႈၵိူဝ်ဝၢၼ်ၼႂ်းလိူတ်ႈသုင် သင်ဝႃႈ  ဢမ်ႇယူတ်းယႃသေ ပွႆႇဝႆႉၸိူင်ႉၼၼ်ၼႆၸိုင် ၸၢင်ႈႁဵတ်းႁႂ်ႈပဵၼ်ပၼ်ႁႃပၢႆးယူႇလီ ႁၢဝ်ႈႁႅင်း မိူၼ်ၼင်ႇ တၢင်းပဵၼ်မၢၵ်ႇႁူဝ်ၸႂ် လႄႈ မၢၵ်ႇၵႅဝ်း(တႂ်)၊ ဢိၵ်ႇ တႃမွတ်ႇ ၸႃႉၵႂႃႇၸိူဝ်းၼႆႉယဝ်ႉ။ သင်ဝႃႈလႆႈႁပ်ႉလွင်ႈယူတ်းယႃ ဢၼ်ၵုမ်ႇထူၼ်ႈၼၼ်ႉ ၸၢင်ႈၵုမ်းထိင်းလႆႈ ထၢတ်ႈၵိူဝ်ဝၢၼ်ၼႂ်းလိူတ်ႈသေ ဝႄႈလႆႈတၢင်းပဵၼ် ဢၼ်တေပေႃႇပဵၼ်မႃးထႅင်ႈတၢင်ႇမဵဝ်းၼၼ်ႉယဝ်ႉ။

Carbohydrate လႄႈ ၽၵ်းယိူဝ်ႈၼၢင်းၶဵဝ် ဢမ်ႇၼၼ် မၢၵ်ႇမႆႉမၢၵ်ႇတွၵ်ႇမၢင်ၸိူဝ်း တေဢမ်ႇမီးၽွၼ်းလီတေႃႇ ၵူၼ်းပဵၼ်တၢင်းပဵၼ်ယဵဝ်ႈဝၢၼ်။ ယွၼ်ႉၼၼ် ၵူၼ်းပဵၼ်ၼၼ်ႉ ထုၵ်ႇလီႁူႉဝႃႈ ၽၵ်းဢၼ်လႂ်ထုၵ်ႇလီၵိၼ်လႄႈထုၵ်ႇလီငိူင်ႉဝႄႈ။

ၽၵ်းယိူဝ်ႈၼၢင်းၶဵဝ် ဢၼ်ၵူၼ်းပဵၼ်ယဵဝ်ႈဝၢၼ်ထုၵ်ႇလီငိူင်ႉဝႄႈ ၼိုင်ႈၵိၼ်ၼမ် ၼိုင်ႈႁဵတ်းႁႂ်ႈထၢတ်ႈၵိူဝ်ဝၢၼ်ၼႂ်းလိူတ်ႈ ၶိုၼ်ႈသုင်မႃး

1. ဢႃႇလူး

ဢႃႇလူး 100 ၵရမ်ႇၼႆႉ မီး  Carbohydrate 12 ၵရမ်ႇ၊ ပေႃးၵိၼ်ဢႃႇလူးၼမ်ၵေႃႈ တေႁဵတ်းႁႂ်ႈ Carbohydrate ၼမ်မႃးသေ ယဵၼ်းပဵၼ်ထၢတ်ႈၵိူဝ်ဝၢၼ် ၸိုမ်းၶဝ်ႈၵႂႃႇၼႂ်းသဵၼ်ႈလိူတ်ႈ ၼၼ်ႉယဝ်ႉ။ သင်ဝႃႈတေၵိၼ်ဢႃႇလူးၼႆ ၵိၼ်ဢၼ်တူမ်ႈ တေလီလိူဝ်သေဢၼ်ၶူဝ်ႈ။

2. ၶဝ်ႈၵၢပ်ႇ

ၶဝ်ႈၵၢပ်ႇဝၢၼ်သီလိူင်ၼႆႉ ပေႃးၵိၼ် 100 ၵရမ်ႇၼႆ မီး  Carbohydrate 18 ၵရမ်ႇ 100 ၵရမ်ႇၵေႃႈ ၶႂ်ႈပဵင်းၵၼ်တင်း ၶဝ်ႈၵၢပ်ႇၼိုင်ႈႁူင်းၼၼ်ႉယဝ်ႉ။

3. မၢၵ်ႇပၵ်ႉ Butternut Squash

မၢၵ်ႇပၵ်ႉ Butternut Squash ၼႆႉ သင်ဝႃႈတႅပ်းပဵၼ်ပွတ်းပွတ်းၼႆ ၼိုင်ႈဝၢၼ်ႇၼႆႉ တေမီး Carbohydrate 16 ၵရမ်ႇ၊ ပဵၼ်ၽၵ်းယိူဝ်ႈၼၢင်းၶဵဝ်ထႅင်ႈဢၼ်ၼိုင်ႈ ဢၼ်တေလႆႈႁၢင်ႈႁႅၼ်းလီလီ သင်ဝႃႈ ၶႂ်ႈဢဝ်သႂ်ႇၼႂ်းတၢင်းၵိၼ်။ ယွၼ်ႉဝႃႈ မိူဝ်ႈဢဝ်ၵႂႃႇႁဵတ်းၶဝ်ႈမုၼ်း ၼၼ်ႉ တေႁဵတ်းႁႂ်ႈ Carbohydrate ဢၼ်ႁဝ်းၵိၼ်ၼၼ်ႉ ၼမ်မႃးလႆႈၼၼ်ႉယဝ်ႉ။

4. ထူဝ်ႇ

ထူဝ်ႇၼႆႉ လႆႈဝႃႈပဵၼ်ထႅင်ႈမဵဝ်းၼိုင်ႈ ဢၼ်မီး  Carbohydrate သုင်မိူၼ်ၵၼ်  ၼၼ်ႉယဝ်ႉ။ ထူဝ်ႇၶၢမ်းလိပ်း ၼိုင်ႈဝၢၼ်ႇၼႆႉ မီး Carbohydrate 20 ၵရမ်ႇ လႄႈ Carbohydrate တေၼမ်လိူဝ်ထူဝ်ႇတၢင်ႇမဵဝ်းႁူဝ်ပၢၵ်ႇသိမ်း 10% ၵူၺ်းၵႃႈ ဢမ်ႇလႆႈပွင်ႇဝႃႈ ႁဝ်းဢမ်ႇထုၵ်ႇလီၵိၼ်ထူဝ်ႇ။ ထူဝ်ႇၼႆႉ မီးသၢၼ်ဢႁႃႇရတင်းၼမ်သေ ယင်းမီးထၢတ်ႈ ပရူဝ်ႇတိၼ်း ၊ Fiber ၊ vitamin C ၊ vitamin E ဢၼ်လီတေႃႇတူဝ်ၶိင်းထႅင်ႈတင်းၼမ်  ၸိူင်ႉႁိုဝ်ၵေႃႈလီ မိူဝ်ႈတေၵိတ်ၼၼ်ႉ ထုၵ်ႇလီမၵ်းမၼ်ႈလွင်ႈၵိၼ် ဢမ်ႇထုၵ်ႇလီၵိၼ်ၼမ်ပူၼ်ႉတီႈ ၼၼ်ႉယဝ်ႉ

ပိၼ်ႇတႅမ်ႈ − ယိင်းၼွင်ႉ

တႆးလွတ်ႈလႅဝ်း

ဢၢင်ႈဢိင် − Sanook