ၽႅၼ်ႇလိၼ်ဝႆ (ဢိင်ႇသၼ်ႇ) တီႈၼႂ်းၸႄႈဝဵင်းၵဵင်းတုင် လႄႈ ၸႄႈဝဵင်းတႃႈၶီႈလဵၵ်း

မိူဝ်ႈဝၼ်းထီႉ 21 July 2022 (လိူၼ်ပႅတ်ႇလွင်ႈ 9 ၶမ်ႈ ပီႊတႆး 2116 ၼီႈ) ယၢမ်းၵၢင်ၶိုၼ်းၼၼ်ႉ ပဵၼ်ၽေးသၽႃႇဝၽႅၼ်ႇလိၼ်ဝႆ (ဢိင်ႇသၼ်ႇ) ၼႂ်းၸႄႈဝဵင်း ၵဵင်းတုင် လႄႈ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇသေ ႁဵတ်းႁႂ်ႈႁူဝ်ႉဢုတ်ႇ ႁိူၼ်းယေးၵူၼ်းမိူင်း လူႉၵွႆၵူၼ်ႇပင်းၵမ်ႈၽွင်ႈ ၼႆယဝ်ႉ။

ႁွင်ႈၵၢၼ်ၾိင်ႈၾႃႉရႃႇသီႇ ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇၵႂႃႇဝႃႈ ယၢမ်းၵၢင်ၶိုၼ်း 23:37 မူင်းၼၼ်ႉ ၽႅၼ်ႇလိၼ်ဝႆ (ဢိင်ႇသၼ်ႇ) ႁႅင်းသၼ်ႇဝႆ ၸၼ်ႉႁၢႆႉႁႅင်း (Strong) 6.1  ရိၵ်ႇတိူဝ်ႇ တၢင်းလိုၵ်ႉလူင်းတႂ်ႈလိၼ် 8 ၵီႇလူဝ်ႇမီႇတိူဝ်ႇ ၽၢႆႇဢွၵ်ႇဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ဝႃႈၼႆ။

ယၢမ်းၵၢင်ၶိုၼ်း 23:10 မူင်းၼၼ်ႉၵေႃႈ ၽႅၼ်ႇလိၼ်ဝႆ ႁႅင်းသၼ်ႇဝႆ ၸၼ်ႉပၢၼ်ၵၢင် (Moderate) 5.3 ရိၵ်ႇတိူဝ်ႇ တၢင်းလိုၵ်ႉလူင်းတႂ်ႈလိၼ် 6 ၵီႇလူဝ်ႇမီႇတိူဝ်ႇ ၽၢႆႇႁွင်ႇဝၼ်းဢွၵ်ႇ ဝဵင်းၵဵင်းတုင် ဝႃႈၼႆ။

ယွၼ်ႉပဵၼ်ၽေးသၽႃႇဝ ၽႅၼ်ႇလိၼ်ဝႆ ၼႂ်းၸႄႈဝဵင်းၵဵင်းတုင်ၼႆႉသေ ႁူဝ်ႉဢုတ်ႇ လႄႈ ႁိူၼ်းယေးၵူၼ်းမိူင်း လႆႈလူႉၵွႆၵူၼ်ႇပင်းယူႇၵမ်ႈၽွင်ႈ ၼႆယဝ်ႉ။

ၵူၼ်းမိူင်းဝဵင်းတႃႈၶီႈလဵၵ်းလၢတ်ႈဝႃႈ တီႈၼႂ်းၸႄႈဝဵင်းတႃႈၶီႈလဵၵ်းၵေႃႈ ယၢမ်းၵၢင် ၶိုၼ်းမွၵ်ႈ 11:30 မူင်းၼၼ်ႉ ၽႅၼ်ႇလိၼ်ဝႆၵႂႃႇပွၵ်ႈၼိုင်ႈ၊ တၢင်းႁိုင်ၽႅၼ်လိၼ်ဝႆ မီး 10-15 သႅၵ်ႉၵၢၼ်ႉၼႆႉ ႁိူၼ်းပေႃးသၼ်ႇလူင်ၵႂႃႇ ဝႃႈၼႆ။

တႄႇတီႈသုၼ်ၵၢင် ၽႅၼ်ႇလိၼ်ဝႆ ၼႂ်းၵႄႈၼႃႈလိၼ် ၸႄႈဝဵင်းၵဵင်းတုင် လႄႈ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇသေ တီႈၼႂ်းၸႄႈတွၼ်ႈၵဵင်းႁၢႆး၊ ၸႄႈတွၼ်ႈလမ်းပုၼ်း၊ ၸႄႈတွၼ်ႈၵဵင်းမႆႇ ၸိုင်ႈထႆးၵေႃႈ ၽႅၼ်ႇလိၼ်ဝႆ မိူၼ်ၵၼ် ၼႆယဝ်ႉ။

ၵဵဝ်ႇလူၺ်ႈလွင်ႈၽႅၼ်ႇလိၼ်ဝႆပွၵ်ႈၼႆႉ ယူႇတီႈႁွင်ႈၵၢၼ်လူလွမ်ပႂ်ႉတူၺ်း ၽေးၽႅၼ်ႇလိၼ်ဝႆ မိူင်းထႆး (TMD) ၵေႃႈ ပိုၼ်ၽၢဝ်ႇဝႆႉဝႃႈ မိူဝ်ႈဝၼ်းထီႉ 21 July 2022 တင်ႈတႄႇယၢမ်းၵၢင်ၶိုၼ်း 22:34 မူင်း ၼႂ်းၶၢဝ်းတၢင်း 7 ၸူဝ်ႈမူင်းပၢႆၵူၺ်း ၽႅၼ်ႇလိၼ်ဝႆ တီႈၼႂ်းၵႄႈ ၼႃႈလိၼ် ၸႄႈဝဵင်းၵဵင်းတုင် လႄႈ ၸႄႈဝဵင်းတႃႈၶီႈလဵၵ်း ႁူမ်ႈတင်းမူတ်း 48 ပွၵ်ႈသေ ၼႂ်းၼၼ်ႉ ဢၼ်ၽႅၼ်ႇလိၼ်ဝႆႁႅင်း မီး 4 ပွၵ်ႈ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း