ၾူၼ်တူၵ်းၼမ်ႉၼွင်းထူမ်ႈ တီႈဝဵင်းတႃႈၶီႈလဵၵ်း

ယွၼ်ႉၾူၼ်တူၵ်းႁႃႇယႂ်ႇႁႃႇလူင် ဢမ်ႇထၢတ်ႇတင်းၶိုၼ်းလႄႈ မိူဝ်ႈၼႆႉဝၼ်းထီႉ 11 August 2021 (လိူၼ်ၵဝ်ႈမႂ်ႇ 4 ၶမ်ႈ ပီႊတႆး 2115 ၼီႈ) ယၢမ်းၵၢင်ၼႂ်ၼႆႉ ႁဵတ်းႁႂ်ႈၼမ်ႉၼွင်းလူၵ်ႈထူမ်ႈ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၼႆယဝ်ႉ။

ၼမ်ႉႁူၺ်ႈၼမ်ႉလွႆ ၼွင်းလူၵ်ႈထူမ်ႈ ပွၵ်ႉဝၢၼ်ႈၵွင်း ၸွမ်းသဵၼ်ႈတၢင်းလူင်ရတၼႃႇ လႆလူင်းၵႂႃႇၸူးထိုင် ၼႂ်းၵၢတ်ႇပယိၼ်ႉၼွင်ႇ ဢၼ်ယူႇတီႈပိုၼ်ႉတီႈတႅမ်ႇ လႄႈ တီႈပွၵ်ႉၵၢတ်ႇလေႃႉ ဢၼ်ၸမ်ၵၼ်တင်း မႄႈၼမ်ႉသၢႆၼၼ်ႉၵေႃႈ ၼမ်ႉထူမ်ႈယူႇၵမ်ႈၽွင်ႈ ၼႆယဝ်ႉ။

ယွၼ်ႉၼမ်ႉၼွင်းလူၵ်ႈထူမ်ႈပွၵ်ႈၼႆႉသေ ႁဵတ်းႁႂ်ႈလိၼ်ၵူမ်ႇလိၼ်ငႂ်ႈ ၶမ်ၵိုတ်းၸွမ်းသဵၼ်ႈတႃႈသၢႆတၢင်း လႄႈ ၼႂ်းႁိူၼ်းယေးဝႆႉတင်းၼမ် ၼႆယဝ်ႉ။

မိူၼ်ၼင်ႇ တီႈလုမ်းၵဵပ်းၶွၼ်ႇ ၸႄႈဝဵင်းတႃႈၶီႈလဵၵ်း ဢၼ်မီးႁိမ်းၽင်ႇၼမ်ႉၼၼ်ႉ ၼမ်ႉၼွင်းယိုင်ႈဝႆႉၼႂ်းဝၢင်းလုမ်းလႄႈ ၽၢႆႇၶႄၾႆးၶဝ် လႆႈဢဝ်လူတ်ႉၵႃး ၵႂႃႇလုတ်ႇၼမ်ႉဢွၵ်ႇသေ ႁဵတ်းလိူမ်ႈလႆႇမူတ်းသႂ်ပၼ် ဝႃႈၼႆ။

တေႃႇထိုင်မိူဝ်ႈၼႆႉယၢမ်းဝၢႆးဝၼ်းၼႆႉတႄႉ ၾူၼ်ႁိူတ်ႇၵႂႃႇယဝ်ႉလႄႈ ၼမ်ႉႁူၺ်ႈၼမ်ႉလွႆ ဢၼ်လႆလူင်းမႃးၼၼ်ႉ ယွမ်းလူင်းၵႂႃႇၶိုၼ်းၽွင်ႈယဝ်ႉ၊ ၵူၺ်းၵႃႈ တွင်ႉၾႃႉတိုၵ်ႉငိုပ်းတၼ်ဝႆႉယူႇလႄႈ ၾူၼ်တေၸၢင်ႈတူၵ်းထႅင်ႈယူႇ ဝႃႈၼႆ။

Photo – CJ

တႆးလွတ်ႈလႅဝ်း