ၾႆးမႆႈႁိူၼ်းၵဝ်ႇၵႄႇလင်ၼိုင်ႈတီႈလႃႈသဵဝ်ႈ

လၢၼ်ႉၶၢႆၶူဝ်းတႆး တီႈၼႂ်းႁိူၼ်းၵဝ်ႇၵႄႇ (ၸဵမ်မိူဝ်ႈ 1941) တီႈပွၵ်ႉ 3 ဝဵင်းလႃႈသဵဝ်ႈ ၸႄႈတွၼ်ႈလႃႈသဵဝ်ႈၼၼ်ႉ ၵိုင်ႉၵၢင်ႉလုၵ်ႉပဵၼ်ၾႆးမႆႈ တီႈၼႂ်းႁိူၼ်းလႄႈ မီးလွင်ႈလူႉသုမ်းယႂ်ႇလူင်တေႉတေႉၼႆယဝ်ႉ။

မိူဝ်ႈဝၼ်းထီႉ 28 September 2022 (လိူၼ်သိပ်းဢဵတ်းမႂ်ႇ 4 ၶမ်ႈ ပီႊတႆး 2116 ၼီႈ) ယၢမ်းႁူဝ်ၶမ်ႈ 16:00 မူင်းပၢႆၼၼ်ႉ သၢႆၾႆးၾႃႉၵိုင်ႉၵၢင်ႉသွတ်ႉ တီႈၼႂ်းႁိူၼ်းသေ  လႆႈလုၵ်ႉပဵၼ်ၾႆးႁၢဝ်ႈႁႅင်းလႄႈ ထိုင်တီႈ ဢမ်ႇတၼ်းလႆႈတေႃႉၶူဝ်းၶွင် ၼႂ်းလၢၼ်ႉ/ႁိူၼ်းယေးဢွၵ်ႇ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ “ႁိူၼ်းဢၼ်ၾႆးမႆႈၵႂႃႇၼႆႉ ပဵၼ်ႁိူၼ်းပႃႈၼၢင်းသူၺ်ႇမေႇ ၾူၼ်ၶၢဝ် (ပုလဲမိုး) ပဵၼ်ပႃး ၽူႈတႅမ်ႈၵႂၢမ်းတႆးၵေႃႉၼိုင်ႈ၊ ႁိူၼ်းလင်ၼႆႉသမ်ႉ မီးမႃးၸဵမ်မိူဝ်ႈပီႊ 1941 ပၢၼ်သိုၵ်းလုမ်ႈၾႃႉ ပွၵ်ႈၵမ်းသွင်ၼၼ်ႉယဝ်ႉ၊ ငိၼ်းၵူၼ်းႁိမ်းႁွမ်းလၢတ်ႈၵၼ်တႄႉ မိူဝ်ႈၼၼ်ႉ ၵျပၢၼ်ႇ ယၢမ်ႈမႃးပၵ်းလုမ်း တီႈႁိူၼ်းလင်ၼႆႉ” ဝႃႈၼႆ။

မိူဝ်ႈၾႆးပႆႇမႆႈႁိူၼ်းၼၼ်ႉ လႆႈႁူႉဝႃႈ ၸဝ်ႈႁိူၼ်းလႆႈပွင်ႇလႅင်းပၼ်တီႈ ၽၢႆႇၾႆးၾႃႉလူင်ပွင်ၸိုင်ႈ ႁႂ်ႈၵႂႃႇၵူတ်ႇထတ်းပၼ် သၢႆၾႆးတီႈၼႂ်းႁိူၼ်း ဢၼ်ၵွႆဝႆႉၸိူဝ်းၼၼ်ႉၼႆသေ ၽွင်းတိုၵ်ႉပႂ်ႉၽၢႆႇၾႆးၾႃႉၵႂႃႇၵူတ်ႇထတ်း ယူႇၼၼ်ႉ လႆႈပဵၼ်ၽေးၵိုင်ႉၵၢင်ႉၾႆးမႆႈဢွၼ်တၢင်း ၼႆယဝ်ႉ။

တႆးလွတ်ႈလႅဝ်း