ႁိူၼ်းၵူၼ်းပၢႆႈၽေး တီႈပင်းၵလႃးတဵတ်သ်ႉ ထုၵ်ႇၾႆးမႆႈၵႂႃႇ 1,200 လင်

မိူဝ်ႈဝၼ်းထီႉ 9 January 2022 (လိူၼ်ၵမ်မႂ်ႇ 8 ၶမ်ႈ ပီႊတႆး 2116 ၼီႈ) ၼႆႉ လူင်ပွင်ၸိုင်ႈ မိူင်းပင်း ၵလႃးတဵတ်သ်ႉ လၢတ်ႈၵႂႃႇဝႃႈ လႆႈမီးလွင်ႈၾႆးမႆႈ ဢွင်ႈတီႈၵူၼ်းပၢႆႈၽေး Cox’s Bazar ၼၼ်ႉသေ ရူဝ်ႇႁိၼ်ႇၵျႃႇ ဢၼ်ပဵၼ်ၵူၼ်းပၢႆႈၽေး 5,000 ပၢႆ လႆႈလူႉသုမ်းတီႈယူႇ တၼ်းသဝ်းၵႂႃႇယူႇ ဝႃႈၼႆ။

ၶိၼ်းရွၼ်ႁူဝ်းသေး Kamran Hossain ၽူႈဢဝ်ႁူမ်ႇလူမ်ႈ ဢွင်ႇတီႈပၢႆႈၽေးၼၼ်ႉလၢတ်ႈဝႃႈ ႁိူၼ်းၵူၼ်းပၢႆႈၽေး ဢၼ်ပၵ်းလၵ်းမႆႉပူၵ်ႇသေ ဢဝ်ၽႃႈယၢင်မုင်းႁူမ်ႈဝႆႉၸိူဝ်းၼၼ်ႉ ထုၵ်ႇၾႆးမႆႈၵႂႃႇၼႆႉ တေမီးယူႇ 1,200 လင်သေ ၾႆးတႄႇမႆႈ ယၢမ်းတၢမ်းၶမ်ႈ 16:40 မူင်း တေႃႇထိုင် 18:30 မူင်း ၸင်ႇၵွႆႈ မွတ်ႇယဵၼ်ၵႂႃႇယူႇ ၾႆးလႆႈတႄႇမႃး ယွၼ်ႉသင်တႄႉၵေႃႈ ဢမ်ႇႁူႉၸွမ်းဝႃႈၼႆ။

လိူၼ်ထူၼ်ႈသၢမ် ပီႊပူၼ်ႉမႃးၼၼ်ႉၵေႃႈ ၾႆးယၢမ်ႈမႆႈဢွင်ႈတီႈ ၵူၼ်းပၢႆႈၽေးၼႆႉ မႃးယဝ်ႉပွၵ်ႈၼိုင်ႈသေ မိူဝ်ႈၼၼ်ႉ မီးၵူၼ်းလူႉတၢႆယူႇ 15 ၵေႃႉ လႄႈ ၵူၼ်း 50,000 ၵေႃႉ ၼႆႉ လူႉသုမ်းၶူဝ်းၶွင်ႁိူၼ်းယေးၵႂႃႇယူႇဝႃႈၼႆ။

ၵူၼ်းပၢႆႈၽေးၵေႃႉၼိုင်ႈၵေႃႈလၢတ်ႈဝႃႈ ဢွင်ႈတီႈၵူၼ်းပၢႆႈၽေးၼႆႉ ၾႆးၵမ်းၵမ်းမႆႈယူႇ ၵူၺ်းၼႃႇ ဢမ်ႇမီးဝႆႉ ၶိူင်ႈတႃႇႁူတ်းၾႆးမွတ်ႇၾႆး သေဢမ်ႇၵႃး ၼမ်ႉၵေႃႈဢမ်ႇမီးလႄႈ တႃႇႁူတ်းၾႆးၵေႃႈ ယၢပ်ႇဝႆႉယူႇ ၽိုၼ်လိၵ်ႈၽိုၼ်လၢႆး ဢၼ်လွင်ႈယႂ်ႇၸိူဝ်းၼႆႉၵေႃႈ ပႃးၵႂႃႇၼႂ်းၾႆးမူတ်းယဝ်ႉဝႃႈၼႆ။

ဝူင်ႈပူၼ်ႉမႃးၼၼ်ႉၵေႃႈ ၾႆးမႆႈ ဢွင်ႈတီႈၵူၼ်းပၢႆႈၽေး ထႅင်ႈတီႈၼိုင်ႈသေ ႁူင်းယႃဢၼ်ၽုၺ်ႇဝႆႉတႃႇယူတ်းယႃပၼ်  ၵူၼ်းပၢႆႈၽေး ၸိူဝ်းပဵၼ်တၢင်းပဵၼ် COVID-19 ၵေႃႈ မႆႈပႃးၵႂႃႇၸွမ်းၼႂ်းၾႆးသေ လွင်ႈလူႉသုမ်းတႄႉၵေႃႈ ဢမ်ႇမီးဝႃႈၼႆ။

ဢွင်ႈတီႈၵူၼ်းပၢႆႈၽေး ၼႂ်းမိူင်းပင်းၵလႃးတဵတ်သ်ႉၼႆႉ မီးၸၢဝ်းၶိူဝ်းရူဝ်ႇႁိၼ်ႇၵျႃႇ ဢၼ်လုၵ်ႉ မိူင်းႁူမ်ႈတုမ်သေ ၵႂႃႇယူႇၼၼ်ႉ မီးယူႇ 850,000 ပၢႆၼႆႉသေ လူင်ပွင်ၸိုင်ႈ မိူင်းႁူမ်ႈတုမ် ဢၼ်ဢမ်ႇယွမ်းႁပ်ႉၶေႃႈၵႂၢမ်းဝႃႈ ရူဝ်ႇႁိၼ်ႇၵျႃႇၼၼ်ႉၵေႃႈ လၢတ်ႈဝႃႈ တေၵူတ်ႇထတ်း ၶေႃႈမုၼ်း ၵူၼ်းၸိူဝ်းၼႆႉသေ ႁပ်ႉဢဝ်ၶိုၼ်းယူႇၼႆသေတႃႉ ႁၢၼ်ႉတေႃႇထိုင်ယၢမ်းလဵဝ် ပႆႇႁၼ် လူင်းမိုဝ်းႁဵတ်းသၢင်ႈသင်လႆႈ ဝႃႈၼႆ။

တႆးလွတ်ႈလႅဝ်း