လူမ်းလႅင်ႉလူင် Tornado ၽတ်ႉၶဝ်ႈၼႂ်းဢမေႇရိၵၢၼ်ႇ 6 ၸႄႈမိူင်း ၵူၼ်းတၢႆဢမ်ႇယွမ်း 80 ၵေႃႉ

တႄႇၸဵမ်မိူဝ်ႈဝၼ်းထီႉ 10-11 December 2021 သေ လူမ်းလႅင်ႉလူင် tornado ထူဝ်းၽတ်ႉၶဝ်ႈ ဢမေႇရိၵၢၼ်ႇ  6 ၸႄႈမိူင်း Kentucky, Illinois, Arkansas, Mississippi, Tennessee လႄႈ Missouri ၼႆ ယဝ်ႉ။

ႁွင်ႈၵၢၼ်လူင်ၽၢႆႇပႂ်ႉၵူတ်ႇထတ်းၾိင်ႈၾႃႉရႃႇသီႇဢမေႇရိၵၢၼ်ႇ လၢႆးငၢၼ်းဝႃႈ မီးလူမ်းလႅင်ႉလူင် Tornado ဢမ်ႇယွမ်း 50 လုၵ်ႈ ၽတ်ႉထူဝ်းၶဝ်ႈမိူဝ်ႈလဵဝ်ၵၼ်လႄႈ မီးၵူၼ်းႁၢႆလၢႆဢမ်ႇယွမ်း 100 ပၢႆ ၵူၼ်းလူႉတၢႆ မီးၵႂႃႇ 88 ၵေႃႉယဝ်ႉသေ တေၸၢင်ႈမီးၵူၼ်းလူႉတၢႆတိူဝ်းၶိုၼ်ႈထႅင်ႈၼႆယူႇ။ ၼွၵ်ႈလိူဝ်မီးၵူၼ်းလူႉတၢႆယဝ်ႉ လင်ႁိူၼ်းၵူၼ်းၵေႃႈမီးလွင်ႈလူႉသုမ်းတင်းၼမ်ယူႇယဝ်ႉ။ ၸႄႈမိူင်းဢၼ်လူႉသုမ်းၼမ်လိူဝ်ပိူၼ်ႈၼႆႉ ပဵၼ်ၸႄႈမိူင်း Kentucky  ၼႆယူႇ။

မိူဝ်ႈဝၼ်းထီႉ 14 December 2021 (လိူၼ်ၸဵင်မႂ်ႇ 11 ၶမ်ႈ ပီႊတႆး 2116 ၼီႈ) ၼႆႉၵေႃႈ ၸွမ်ၸိုင်ႈ သျီႇ ၵျိၼ်းၽိင်ႇ တၢင်တူဝ်လူင်ပွင်ၸိုင်ႈလႄႈ ၵူၼ်းမိူင်းၶႄႇသေ ဢွၵ်ႇမႃးလၢတ်ႈ မွင်ၸႂ်ၸွမ်း တေႃႇၸၢဝ်းၶိူဝ်းဢမေႇရိၵၢၼ်ႇ ဢၼ်လႆႈထူပ်းၽေးသၽႃႇဝႁၢႆႉႁႅင်းၼႆႉလႄႈ ႁဵတ်းႁႂ်ႈမီးၵူၼ်းလူႉတၢႆတင်းၼမ် ဢိၵ်ႇၶူဝ်းၶွင်ႁိူၼ်းယေးလူႉၵွႆတင်းၼမ် ဝႃႈၼႆ။

တႆးလွတ်ႈလႅဝ်း