ၵူၼ်းသႄႉသွမ်း ၽူႈမီးၼမ်ႉၸႂ်ၵူၼ်းမိူင်းတႆး လႄႈ ပီႈၼွင်ႉထႆးၼၼ်ႉ ဢမ်ႇၵဵဝ်ႇၶွင်ႈမုၵ်ႉၸုမ်း RCSS/SSA

ၵဵဝ်ႇလူၺ်ႈလွင်ႈ ၵူၼ်းမိူင်းတႆး၊ ပီႈၼွင်ႉထႆး လႄႈ ၵူၼ်းတၢင်ႇပိုၼ်ႉတီႈ မီးၼမ်ႉၸႂ် ၽိူၵ်ႇၸိုၼ်ႈၶၢဝ်သႂ်သေ ၵႂႃႇၸွႆႈထႅမ်ပၼ် ၵူၼ်းမိူင်း၊ လုၵ်ႈႁဵၼ်း ႁူင်းႁဵၼ်းၸိူဝ်ႉၸၢတ်ႈ တီႈငဝ်ႈၸိုင်ႈလွႆတႆးလႅင်းၼၼ်ႉ မီးၵူၼ်းၵေႃႉၼိုင်ႈ လႆႈတႅမ်ႈလိၵ်ႈသႄႉသွမ်းယႃႉၵဝ်း ၸွမ်းၼိူဝ် Online သေ ထိုင်တီႈႁဵတ်းႁႂ်ႈ ၽူႈမီးၼမ်ႉၸႂ်ၶဝ် ၸႂ်ဢမ်ႇလီ လႄႈ ထၢင်ႇၽိတ်းထၢင်ႇပိူင်ႈၼိူဝ် မုၵ်ႉၸုမ်း RCSS/SSA ယူႇယဝ်ႉ။

လွႆတႆးလႅင်း ငဝ်ႈၸိုင်ႈ RCSS/SSA ၼႆႉ မီးတိတ်းၸပ်းလႅၼ်လိၼ် ထႆး သေ မီးၵူၼ်းမိူင်း ၸိူဝ်းပၢႆႈၽေးပၢင်တိုၵ်း လႄႈ လုၵ်ႈႁဵၼ်း ၼေႃႇတႅၼ်းၶိူဝ်း ဢၼ်တိုၵ်ႉႁဵၼ်းပၺ်ႇၺႃႇ တႃႇတေမႃးပဵၼ် ၽူႈဢွၼ်ႁူဝ်တႆးမိူဝ်းၼႃႈၼၼ်ႉ ယူႇသၢင်ႈၵိၼ်သဝ်းဝႆႉၵေႃႈပိူင်ၼိုင်ႈ၊ ၼင်ႇႁိုဝ်ပေႃးတေပဵၼ်ၵၢၼ်ၵမ်ႉၸွႆႈထႅမ် ၶိူင်ႈၵမ်ႉၵႅမ်တီႈလုၵ်ႈႁဵၼ်း၊ ၽၢႆႇပၢႆးပၺ်ႇၺႃႇ၊ ၽၢႆႇယူႇလီ ၼႆသေ ၽူႈမီးၼမ်ႉၸႂ် ၵူၼ်းမိူင်းတႆး ၊ ပီႈၼွင်ႉတႆး ၼႂ်းမိူင်းထႆး လႄႈ ၵူၼ်းမိူင်း/မေႃယႃၼႂ်းမိူင်းထႆး ဢိၵ်ႇပႃး ၵူၼ်းတၢင်ႇပိုၼ်ႉတီႈ ၵႂႃႇၸွႆႈထႅမ်ၸွမ်းၼင်ႇပွင်ပဵၼ်လႆႈ လႄႈ ပၼ်ပႃးပိုၼ်ႉႁူႉထႅင်ႈ တင်းၼမ်သေ ယူႇတီႈၽူႈမီးပုၼ်ႈၽွၼ်း မုၵ်ႉၸုမ်း RCSS/SSA ၵေႃႈ လႆႈတၢင်တူဝ်ၵူၼ်းမိူင်း ဢိၵ်ႇပႃး လုၵ်ႈႁဵၼ်းတင်းသဵင်ႈ ယိၼ်းၸူမ်းၶွပ်ႈၸႂ်ယႂ်ႇ ၼမ်ထိုင်တီႈ ပီႈၼွင်ႉတႆး ပီႈၼွင်ႉထႆး လႄႈ ၽူႈမီးၼမ်ႉၸႂ်ၸေႇတၼႃႇၶဝ် ၵူႈၸဝ်ႈၵူႈၵေႃႉယူႇယဝ်ႉ။

ၵွပ်ႈပိူဝ်ႈလွင်ႈၸွႆႈထႅမ်ၸိူဝ်းၼႆႉလႄႈ ႁဵတ်းႁႂ်ႈမီးၵူၼ်းမၢင်ၵေႃႉ ဢမ်ႇသႂ်ႇၸိုဝ်ႈတႄႉ ဢမ်ႇသႂ်ႇႁၢင်ႈတႄႉၼၼ်ႉ မႆႈၸႂ်ႁိုဝ် ဢမ်ႇႁၢၼ်ႉၸႂ်ႁိုဝ် ဢမ်ႇထုၵ်ႇတႃႁိုဝ် ထိုင်တီႈလႆႈတႅမ်ႈလိၵ်ႈ မဵဝ်းဢမ်ႇၸိုဝ်ႈဢမ်ႇၸႂ်ႈလူင်းၼိူဝ် Online ၵႂႃႇလႄႈ ႁဵတ်းႁႂ်ႈတုမ်ႉတိူဝ်ႉ ၽူႈမီးၼမ်ႉၸႂ်  ပီႈၼွင်ႉတႆး−ထႆး လႄႈ ၵဵဝ်ႇလူၺ်ႈလွင်ႈ ၸိူဝ်းၼႆႉသေ ယူႇတီႈ ၽူႈမီးၼမ်ႉၸႂ်ၶဝ်ၵေႃႈ လႆႈတွင်ႈထၢမ် လွင်ႈတၢင်းမႃးတီႈ ၽူႈယႂ်ႇၵူၼ်းလူင် RCSS/SSA လႄႈ ယူႇတီႈၽူႈယႂ်ႇၵူၼ်းလူင် RCSS/SSA ၵေႃႈလႆႈတွပ်ႇပၼ်ၵႂႃႇဝႃႈ “ၵူၼ်းၸိူဝ်းသႄႉသွမ်းထိုင် ၽူႈမီးၼမ်ႉၸႂ်ၶဝ်ၼၼ်ႉ ဢမ်ႇၸႂ်ႈၵူၼ်းၼႂ်းမုၵ်ႉၸုမ်း လႄႈ ဢမ်ႇၸႂ်ႈၵူၼ်းဢၼ်ယူႇသၢင်ႈၵိၼ်သဝ်း ၼိူဝ်လွႆတႆးလႅင်း၊ ပိူၼ်ႈၶႂ်ႈႁႂ်ႈႁဝ်း တႅၵ်ႇယၢႆႈၵၼ်သေ ၸင်ႇပိုၼ်ၽႄႈသႄႉသွမ်းၵူၺ်း” ဝႃႈၼႆယူႇယဝ်ႉ။

ၼႂ်းလိူၼ် November 2024 ၼႆႉ မီးၵူၼ်းမိူင်းလၢႆလၢႆၵေႃႉ ဢမ်ႇၶႂ်ႈဢွၵ်ႇၸိုဝ်ႈ လႄႈ ဢဝ်ငိုၼ်းတွင်းသူင်ႇထိုင်ပၼ်တီႈ ၵေႃႉသိုၵ်းၵေႃႉႁၢၼ် တပ်ႉသိုၵ်းၸိုင်ႈတႆး RCSS/SSA ၸိူဝ်းယူႇဝႆႉၼႃႈသိုၵ်းၼၼ်ႉၵေႃႈ ယူႇတီႈမုၵ်ႉၸုမ်း RCSS/SSA ပဵၼ်ဢၼ်ယိၼ်းၸူမ်းလႄႈ ဢဝ်ၵုင်ႇမုၼ်မိူၼ်ၵၼ် ယူႇယဝ်ႉ။

တႆးလွတ်ႈလႅဝ်း