သိုၵ်းထႆး ၵူတ်ႇထတ်း တီႉၺွပ်းလႆႈယႃႈမ တီႈလႅၼ်လိၼ် တႆး−ထႆး တင်းၼမ်

မိူဝ်ႈၼႆႉဝၼ်းထီႉ 26 November 2024 (လိူၼ်သိပ်းသွင်လွင်ႈ 11 ၶမ်ႈ ပီႊတႆး 2118 ၼီႈ) သိုၵ်းထႆး ဢၼ်ဢွၵ်ႇလဵပ်ႈယၢမ်းၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈ ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇၼၼ်ႉ ထူပ်းႁၼ်ၵူၼ်းဢၼ်မီး လွင်ႈလီထၢင်ႇထိူမ် မွၵ်ႈ 10−15 ၵေႃႉ တဵင်ႇထူင်ၵေႃႇၸၢၼ်ႈလူင် ပႆလတ်း ၶၢမ်ႈလႅၼ်လိၼ် ၶဝ်ႈၵႂႃႇၼႂ်းမိူင်းထႆးလႄႈ ၽၢႆႇသိုၵ်းထႆး တေယွၼ်းၶဝ်ႈၵူတ်ႇ ၵူၺ်းၵႃႈ  ၸိူဝ်းၶဝ်သမ်ႉ ဢွၼ်ၵၼ်ပႅတ်ႈၶူဝ်းၶဝ်သေ လႅၼ်ႈပၢႆႈၶဝ်ႈထိူၼ်ႈၵႂႃႇ ၵမ်းလဵဝ် ၼႆယဝ်ႉ။

ဝၢႆးၼၼ်ႉ သိုၵ်းထႆး ၸင်ႇလႆႈၶဝ်ႈၵူတ်ႇထတ်းတီႈၼၼ်ႈသေ ထူပ်းႁၼ် ထူင်ပိူဝ်ႉ ဢၼ်ဢဝ်ထူင်ၵေႃႇၸၢၼ်ႈသေႁဵတ်းဝႆႉ တင်းမူတ်း 17 ထူင် ၼႂ်းမၼ်းသႂ်ႇဝႆႉ ယႃႈမ ႁူမ်ႈတင်းမူတ်းတေမီးယူႇမွၵ်ႈ 2,600,000 မဵတ်ႉ လႄႈ ၽၢႆႇၸဝ်ႈၼႃႈတီႈသိုၵ်းထႆး တေသိုပ်ႇၵူတ်ႇထတ်း ၼႂ်းပိုၼ်ႉတီႈၵႂႃႇထႅင်ႈ ဝႃႈၼႆ။

မိူဝ်ႈၼႂ်းဝၼ်းထီႉ 24 November 2024 ၼၼ်ႉၵေႃႈ သိုၵ်းထႆး လႆႈႁပ်ႉၶၢဝ်ႇ တေမီး ၵူၼ်းလၵ်ႉတေႃႉသူင်ႇယႃႈမ ၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈ ၸႄႈတွၼ်ႈၵဵင်းႁၢႆး − ၸႄႈတွၼ်ႈၵဵင်းမႆႇ ၼႆလႄႈ  ၸင်ႇလႆႈဢွၵ်ႇပႂ်ႉၵူတ်ႇထတ်း ထူပ်းႁၼ်ၵႃးဢၼ်လီထၢင်ႇထိူမ် သေ လႆႈလမ်းၸွမ်း တေႃႇပေႃးထိုင်တီႈ ဝၢၼ်ႈၶႄးဝူဝ်းတမ်ႊ ပွၵ်ႉ 12 ဢိူင်ႇမႄႈယၢဝ်း ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆးသေ ၵူတ်ႇထတ်းတီႉၺွပ်းလႆႈယႃႈမ ႁူမ်ႈတင်းမူတ်းမွၵ်ႈ 5,000,000 မဵတ်ႉ ၵူၼ်းႁေႃႈၵႃးတေႃႉသူင်ႇတႄႉ တၼ်းပၢႆႈလွတ်ႈၵႂႃႇလႆႈ ၼႆယဝ်ႉ။

ၵူၼ်းဢၼ်ၵဵဝ်ႇၶွင်ႈၸွမ်းယႃႈမဝ်းၵမ်ၼၼ်ႉ ၽၢႆႇတၢင်းၸဝ်ႈၼႃႈတီႈထႆးၶဝ် တေသိုပ်ႇၸွမ်းသွၵ်ႈႁႃ တႃႇဢဝ်မႃးပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈ မိူင်းမီးၼၼ်ႉ ဝႃႈၼႆ။

တႄႇၸဵမ်မိူဝ်ႈဝၼ်းထီႉ 1 October 2024 တေႃႇထိုင် ဝၼ်းထီႉ 17 November 2024 ၸုမ်းၽၢႆႇၽဵဝ်ႈမူၺ်ႉယႃႈမဝ်းၵမ် မိူင်းထႆးပွတ်းႁွင်ႇ တီႉၺွပ်းလႆႈယႃႈမ 30,067,480 မဵတ်ႉ၊ ယႃႈဢၢႆႉသ် 1,777 ၵီႇလူဝ်ႇၵရမ်ႇ၊ ယႃႈၾိၼ်ႇၽိူၵ်ႇ 140 ၵီႇလူဝ်ႇၵရမ်ႇ၊ Ketamine 615.86 ၵီႇလူဝ်ႇၵရမ်ႇ၊ Happy Water 4.8 ၵီႇလူဝ်ႇၵရမ်ႇ၊ သၢၼ်ၶေးမီး 880 တၢၼ်ႇ လႄႈ ၵူၼ်းဢၼ်ၵဵဝ်ႇၶွင်ႈၸွမ်းယႃႈမဝ်းၵမ်ထႅင်ႈ 36 ၵေႃႉ ၼႆယဝ်ႉ။

တႆးလွတ်ႈလႅဝ်း