သိုၵ်းၵူဝ်းၵၢင်ႉ MNDAA ပၼ်တၢမ်ႇတၢႆၵူၼ်းမီးတၢင်းၽိတ်း

မိူဝ်ႈၼႆႉဝၼ်းထီႉ 5 December 2024 (လိူၼ်ၸဵင်ႇမႂ်ႇ 5 ၶမ်ႈ ပီႊတႆး 2119 ၼီႈ) ယၢမ်းၵၢင်ၼႂ်ၼႆႉ ၸုမ်းသိုၵ်းၵူဝ်းၵၢင်ႉ MNDAA တႅပ်းတတ်းတြႃးပၼ်တၢမ်ႇတၢႆ ၵူၼ်းမီးတၢင်းၽိတ်း တီႈဝဵင်းလဝ်ႉၵႆႇ ၸိုင်ႈတႆးပွတ်းႁွင်ႇ။

ၸုမ်းသိုၵ်းၵူဝ်းၵၢင်ႉ MNDAA တႅပ်းတတ်းတြႃးၵူၼ်းမီးတၢင်းၽိတ်း 15 ၵေႃႉ တေႃႇၼႃႈၵူၼ်းတင်းၼမ်သေ ၼႂ်းၼၼ်ႉ ထုၵ်ႇၺႃးတၢမ်ႇတၢႆ ၸၢႆး 5 ၵေႃႉ ယိင်း 1 ၵေႃႉ လႄႈ ၶဝ်ၸိူဝ်းၼႆႉသမ်ႉ မီးတၢင်းၽိတ်း လွင်ႈၶႃႈႁႅမ်တၢႆၵူၼ်း၊ တီႉၺွပ်းၵူၼ်းယဝ်ႉ ႁႂ်ႈၵူၼ်းတၢင်းႁိူၼ်း ဢဝ်ငိုၼ်းတင်းၼမ် ၵႂႃႇထုတ်ႇဢဝ်တူဝ် ၶိုၼ်းၸိူဝ်းၼႆႉ ဝႃႈၼႆ၊ ၵူၼ်းမီးတၢင်းၽိတ်း ၸိူဝ်းၵိုတ်းလိူဝ်ဝႆႉၼၼ်ႉသမ်ႉ  ထုၵ်ႇတႅပ်းတတ်းတြႃးပၼ်တၢမ်ႇတူၵ်းၶွၵ်ႈ 10 ပီႊ−20 ပီႊ ၼႆယဝ်ႉ။

မိူဝ်ႈဝၼ်းထီႉ 24 April 2024 ၼၼ်ႉ ၵေႃႈ ၸုမ်းသိုၵ်းၵူဝ်းၵၢင်ႉ MNDAA ပၼ်တၢမ်ႇတၢႆ ၽူႈမီးၸၼ်ႉၼႂ်းၸုမ်း တႃႇ 7 ၵေႃႉ လႄႈ ၵူၼ်းမိူင်း 3 ၵေႃႉ တီႈဝဵင်းလဝ်ႉၵႆႇမိူၼ်ၵၼ် ယူႇယဝ်ႉ။

တႆးလွတ်ႈလႅဝ်း