KNU/KNLA တိုၵ်းသိမ်းလႆႈၶိုၼ်း ၼႃႈလိၼ်ငဝ်ႈၸိုင်ႈၵဝ်ႇ

ပိုၼ်ႉတီႈ မႃႇၼႄႇပလေႃး ဢၼ်မီးၼႂ်းၸႄႈတွၼ်ႈပႃးဢၢၼ်ႇ လႄႈ ပဵၼ်ငဝ်ႈၸိုင်ႈၵဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း KNU/KNLA ၼၼ်ႉ မိူဝ်ႈလဵဝ်တၢင်းၽၢႆႇ ၸုမ်းသိုၵ်း KNU/KNLA ၶိုၼ်းတိုၵ်းသိမ်းလႆႈၼႂ်းမိုဝ်းသိုၵ်းမၢၼ်ႈ မိူဝ်ႈဝၼ်းထီႉ 16 December 2024 (လိူၼ်ၸဵင်လွင်ႈ 1 ၶမ်ႈ ပီႊတႆး 2119 ၼီႈ) ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ပတူဝ်ႇၸေႃးတေႃးၼီး ၽူႈၶၢၼ်ပၢၵ်ႇ တပ်ႉသိုၵ်း KNLA လၢတ်ႈတီႈသိုဝ်ႇၶၢဝ်ႇ RFA ဝႃႈ တပ်ႉပၢင်သဝ်းသိုၵ်းမၢၼ်ႈ ဢၼ်ၵိုတ်းတပ်ႉ ၵမ်းလိုၼ်းသုတ်း တီႈၼႂ်းၼႃႈလိၼ်ငဝ်ႈၸိုင်ႈၵဝ်ႇၼၼ်ႉ ယိုၼ်ယၼ်လႆႈဝႃႈ ပၢင်သဝ်းသိုၵ်းမၢၼ်ႈလူႉၵွႆယဝ်ႉ၊ လွင်ႈႁူဝ်ယွႆႈယႅမ်းမၼ်းတႄႉ ၽူႈမီးပုၼ်ႈၽွၼ်း ၼႂ်းၼႃႈသိုၵ်းၶဝ် တိုၵ်ႉသိုပ်ႇၵူတ်ႇထတ်းဝႆႉယူႇလႄႈ ဢမ်ႇပႆႇလၢႆးငၢၼ်းၶိုၼ်ႈမႃး၊ ၽွင်းပၢင်တိုၵ်းၼၼ်ႉ ၸုမ်းသိုၵ်းမၢၼ်ႈ ၸႂ်ႉပႃးႁိူဝ်းမိၼ် တိုၵ်းၸွႆႈလႄႈ ပွႆႇမၢၵ်ႇလူင်တင်းၼမ် ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ တပ်ႉပၢင်သဝ်းသိုၵ်းမၢၼ်ႈ ဢၼ်ၵိုတ်းၵမ်းလိုၼ်းသုတ်း ၼႂ်းၼႃႈလိၼ်မႃႇၼႄႇပလေႃး ၼႆႉ ဢဵၼ်ႁႅင်းသိုၵ်းၶဝ် တေမီးမွၵ်ႈ 100 ပၢႆ လႄႈ မိူဝ်ႈလဵဝ်တႄႉ KNLA သိမ်းပႅတ်ႈယဝ်ႉ၊ ၽွင်းပၢင်တိုၵ်းၼၼ်ႉ လႆႈငိၼ်းဝႃႈ ၽူႈၵွၼ်းတပ်ႉ KNLA လႆႈတူၵ်းသုမ်းၵႂႃႇ ၼႂ်းပၢင်တိုၵ်းၵေႃႉၼိုင်ႈ ဝႃႈၼႆ။

မႃႇၼႄႇပလေႃး ငဝ်ႈၸိုင်ႈၵဝ်ႇ KNU/KNLA ၼႆႉ ၵေႃႇတင်ႈၶိုၼ်ႈမႃးမိူဝ်ႈပီႊ 1975 လႄႈ ၽူႈဢွၼ်ႁူဝ်ပဵၼ် ၸွမ်သိုၵ်းလူင် ၸေႃးပူဝ်ႇမျႃႉ၊ ဝၢႆးမႃးၵွပ်ႈတၢင်းႁၼ်ထိုင် ၽူႈဢွၼ်ႁူဝ်ဢမ်ႇမိူၼ်ၵၼ် လႄႈ ၸုမ်းသိုၵ်းယၢင်း လႆႈတႅၵ်ႇၵၼ် ပဵၼ်လၢႆမူႇလၢႆၸုမ်းသေ ထုၵ်ႇသိုၵ်းမၢၼ်ႈထူဝ်းသိုၵ်းတေႃႇ မိူဝ်ႈပီႊ 1992 လႄႈ သိုၵ်းမၢၼ်ႈယိုတ်းလႆႈ မႃႇၼႄႇပလေႃး မိူဝ်ႈပီႊ 1995 ၼၼ်ႉယူႇယဝ်ႉ။

တႆးလွတ်ႈလႅဝ်း