ႁိူဝ်းမိၼ်းတူၵ်း မီးၵူၼ်းလူႉတၢႆတင်းၼမ်

မိူဝ်ႈဝၼ်းထီႉ 25 December 2024 (လိူၼ်ၸဵင်လွင်ႈ 10 ၶမ်ႈ ပီႊတႆး 2119 ၼီႈ) ႁိူဝ်းမိၼ် Azerbaijan Airlines သၢႆၵၢၼ်မိၼ် J2-8243 မီးၵူၼ်းၶီႇၸွမ်းၼိူဝ်ႁိူဝ်းမိၼ် 67 ၵေႃႉ ဢၼ်လုၵ်ႉတီႈ ဝဵင်း Baku မိူင်းဢႃႇသိူဝ်ႇပႆႇၵျၢၼ်ႇ မုင်ႈၼႃႈၵႂႃႇ မိူင်းရၢတ်ႉသျႃးပွတ်းၸၢၼ်းၼၼ်ႉ လႆႈမိၼ်ဢွၵ်ႇၼွၵ်ႈသဵၼ်ႈတၢင်းသၢႆၵၢၼ်မိၼ် သေ တူၵ်းလူင်းႁိမ်းဢၼ်တေႃႇၼႃႈ ၸွမ်းၽင်ႇပၢင်ႇလၢႆႇ Caspian  ႁိမ်းဝဵင်း Aktau မိူင်းၵႃႇသၢၵ်ႉသ်တၢၼ်ႇ လႄႈ မီးၵူၼ်းလူႉတၢႆဢမ်ႇယွမ်း 38 ၵေႃႉ၊ မၢတ်ႇၸဵပ်း 29 ၵေႃႉ ၼႂ်းၼႆႉပႃးလုၵ်ႈဢွၼ်ႇ 2 ၵေႃႉ ၼႆယဝ်ႉ။

ၽၢႆႇၵူတ်ႇထတ်းသၢႆၵၢၼ်မိၼ်ရၢတ်ႉသျႃး လႆႈလၢတ်ႈဝႃႈ ဢွၼ်တၢင်းၼႆႉ မီးလွင်ႈပၼ် ၾၢင်ႉဝႃႈ ႁိူဝ်းမိၼ်ထုၵ်ႇၺႃးၼူၵ်ႉမိၼ်ၽႃႇ ဝႃႈၼႆ။

ၽူႈလူင်ႉလႅၼ်ႇ ဢၼ်ပဵၼ် တီႈၵိူဝ်းၵုမ် ၶွမ်ႇပၼီႇၵၢၼ်မိၼ် AeroDynamic Advisory လၢတ်ႈတီႈသိုဝ်ႇၶၢဝ်ႇ Reuters ဝႃႈ လွင်ႈႁိူဝ်းမိၼ်ၽႃႇၺႃးၼူၵ်ႉ ပဵၼ်ငိူၼ်ႈငဝ်ႈ ႁဵတ်းႁႂ်ႈႁိူဝ်းမိၼ် လႆႈလူင်းၵိုတ်းတီႈဝၢင်းႁိူဝ်းမိၼ် ဢၼ်ၸမ်ၼၼ်ႉ ၵႆႉမီးယူႇသေတႃႉ ၵူၺ်းၵႃႈ ယွၼ်ႉလွင်ႈတၢင်းဢၼ်ၼႆႉသေ တေႁဵတ်းႁႂ်ႈႁိူဝ်းမိၼ် မိၼ်ဢွၵ်ႇၼွၵ်ႈသဵၼ်ႈတၢင်းၵၢၼ်မိၼ် ၵႂႃႇၵႆပေႃးတၢၼ်ႇၼၼ်ႉတႄႉ ဢမ်ႇလႅပ်ႈပဵၼ် လႆႈ ၼႆယဝ်ႉ။

ၸွမ်ၸိုင်ႈဢႃႇသိူဝ်ႇပႆႇၵျၢၼ်ႇ လႆႈလၢတ်ႈဝႃႈ ၸွမ်းၼင်ႇလႆႈႁပ်ႉၶေႃႈမုၼ်းမႃးၼၼ်ႉ ယွၼ်ႉၾိင်ႈၾႃႉဢမ်ႇလီလႄႈ ႁိူဝ်းမိၼ် လႆႈလႅၵ်ႈလၢႆႈသဵၼ်ႈတၢင်းသၢႆၵၢၼ်မိၼ် ၵူၺ်းၼႃႇ လွင်ႈႁိူဝ်းမိၼ်တူၵ်းၼၼ်ႉ ဢမ်ႇပႆႇႁူႉငိူၼ်ႈငဝ်ႈမၼ်းၼင်ႇၸႅင်ႈလႅင်းသေ တေလႆႈသိုပ်ႇၵူတ်ႇထတ်းႁႂ်ႈတႅတ်ႈတေႃးၵႂႃႇထႅင်ႈ ဝႃႈၼႆ။

ၽေးၵိုင်ႉၵၢင်ႉပွၵ်ႈၼႆႉ ပဵၼ်မႃးဝၢႆးသေ  မိူင်းရၢတ်ႉသျႃး ပွတ်းၸၢၼ်း ၺႃးတရူၼ်းၶဝ်ႈပိုတ်းယိုဝ်း ဢမ်ႇႁိုင်သင်ၼၼ်ႉၵူၺ်းၼႆယူႇ။ မိူဝ်ႈလႂ်သေဢမ်ႇဝႃႈ  ပေႃးမီးတရူၼ်းၶဝ်ႈပိုတ်းယိုဝ်းၼႆ ရၢတ်ႉသျႃးတေပိၵ်ႉဢိုတ်းဝၢင်းႁိူဝ်းမိၼ်ဝႆႉ  လႄႈ ပွၵ်ႈၵမ်းၼႆႉၵေႃႈ ဝၢင်းႁိူဝ်းမိၼ်ရၢတ်ႉသျႃး ဢၼ်ယူႇၸမ်သၢႆၵၢၼ်မိၼ်ၼၼ်ႉၵေႃႈ လႆႈပိၵ်ႉဢိုတ်းၵႂႃႇ မိူဝ်ႈယၢမ်းၵၢင်ၼႂ် ၼႂ်းဝၼ်းထီႉ 25 December 2024 ၼၼ်ႉ ၼႆယဝ်ႉ။

ယွၼ်ႉလွင်ႈတၢင်းၸိူဝ်ႉႁိုဝ်သေၵေႃႈယဝ်ႉ ၵဵဝ်ႇၵပ်းလွင်ႈ ႁိူဝ်းမိၼ် Azerbaijan Airlines သၢႆၵၢၼ်မိၼ် J2-8243 တူၵ်းၼႆႉသေ ႁဵတ်းႁႂ်ႈမီးၵူၼ်းလူႉတၢႆ တီႈဢေႇသုတ်း 38 ၵေႃႉ ၵူၼ်းမၢတ်ႇၸဵပ်း 29 ၵေႃႉ (မီးပႃး လုၵ်ႈဢွၼ်ႇ 2 ၵေႃႉ ) ၼၼ်ႉတႄႉ ထုၵ်ႇသူင်ႇယူတ်းယႃတူဝ်တီႈႁူင်းယႃ ဢၼ်မီးႁိမ်းၸမ်တီႈႁိူဝ်းမိၼ်တူၵ်း ၼၼ်ႉယဝ်ႉ ၼႆယူႇ။

တႆးလွတ်ႈလႅဝ်း