ၸူၼ်ပႃးၵွင်ႈ ၶဝ်ႈၸူၼ်ၼႂ်းလၢၼ်ႉၵူၼ်းမိူင်း လႄႈယိုဝ်းတၢႆၸဝ်ႈလၢၼ်ႉ

မိူဝ်ႈၼႂ်းဝၼ်းထီႉ 05 January 2025 (လိူၼ်ၵမ်မႂ်ႇ 7 ၶမ်ႈ ပီႊတႆး 2119 ၼီႈ) ၶၢဝ်းယၢမ်း 17:30 မူင်း မီးၵူၼ်းၸၢႆး 3 ၵေႃႉ ပႃးၵွင်ႈၶဝ်ႈၸူၼ်ၼႂ်းလၢၼ်ႉၵူၼ်းမိူင်းလႄႈ ယိုဝ်းတၢႆပႃးၸဝ်ႈလၢၼ်ႉၵေႃႉၼိုင်ႈ တီႈၼႂ်းပွၵ်ႉ (2) ဝဵင်းၵုၼ်ႁဵင် ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ “တီႈႁိူၼ်းလင်ၼၼ်ႉ ၶဝ်တေၶၢႆဝႆႉၶူဝ်းၵုၼ်ႇၵူႈလွင်ႈလွင်ႈဢေႃႈ ၸိုဝ်ႈၸဝ်ႈလၢၼ်ႉႁွင်ႉဝႃႈ လုင်းသႅင်ယႃႈ+ပႃႈငိုၼ်းဢိင်ႇ လႄႈၶဝ်မီးလုၵ်ႈသၢဝ်ၵေႃႉၼိုင်ႈၶႃႈဢေႃႈ ပိူင်ပဵၼ်မၼ်းတႄႉမီးၵူၼ်းၸၢႆး 3 ၵေႃႉ ၶီႇၵႃးၶလွင်းသီၶၢဝ်လမ်းၼိုင်ႈ မႃးၸွမ်းၵၼ်သေ မႃးၸူၼ်တီႈလၢၼ်ႉ လုင်းသႅင်ယႃႈၶဝ် ၽွင်းၼၼ်ႉၵေႃႉပဵၼ်လုင်းသႅင်ယႃႈ တိုၵ်ႉၵဵပ်းသိမ်းလၢၼ်ႉ လုၵ်ႈသၢဝ်ၶဝ်သမ်ႉ ယူႇၼႂ်းသိုင်ႇၾႆး လႅၼ်ႈၶဝ်ႈမႃးၼႂ်းႁိူၼ်း၊ ပႃႈငိုၼ်းဢိင်ႇသမ်ႉ တိုၵ်ႉၵႂႃႇဢၢပ်ႇၼမ်ႉၼႆဢေႃႈ ၸူၼ်ဢဝ်ၵွင်ႈငႃၵေႃႉပဵၼ်လုၵ်ႈသၢဝ်ၶဝ်သေ ၸင်ႇယိုဝ်းတၢႆလုင်းသႅင်ယႃႈ ၼႆဢေႃႈ” လၢတ်ႈၼႄၼင်ႇၼႆ။

ယင်းလၢတ်ႈၼႄထႅင်ႈဝႃႈ “ၵူၼ်းၸူၼ် 3 ၵေႃႉဢၼ်မႃးၸူၼ်ၼၼ်ႉၵေႃႈ လၢတ်ႈၵႂၢမ်းမၢၼ်ႈလႄႈၵႂၢမ်းတႆးဢမ်ႇပေႃးပီႇ ၵေႃႉၼိုင်ႈတူဝ်သုင်သုင် ထႅင်ႈ 2 ၵေႃႉ ပွၵ်းပွၵ်းပၢၼ်ၵၢင်ၼႆႉၶႃႈ ၵွင်ႈထႆႇ CCTV ဢၼ်တိတ်းဝႆႉတီႈလၢၼ်ႉၼၼ်ႉၵေႃႈ ၶဝ်ယႃႉၵွႆပႅတ်ႈမူတ်းဢေႃႈ” လၢတ်ႈၼင်ႇၼႆ။

ထိုင်မိူဝ်ႈၼႆႉဝၼ်းထီႉ 06 January 2025 ယူႇတီႈၸဝ်ႈၼႃႈတီႈၽၢႆႇဢုပ်ႉပိူင်ႇ တပ်ႉသိုၵ်းၸိုင်ႈတႆး RCSS/SSA ဢွၼ်ႁႅင်းၵူၼ်းၵမ်ႈၽွင်ႈ မိူဝ်းၸွႆႈထႅမ်ပၼ်ငိုၼ်းတွင်းတီႈႁိူၼ်းဢၼ်ထုၵ်ႇၸူၼ်ၼၼ်ႉသေ တွင်ႈထၢမ်ပႃးလွင်ႈတၢင်းပိူင်ပဵၼ် ဢၼ်လႆႈပဵၼ်ၵႂႃႇလႄႈ တေသိုပ်ႇၵူတ်ႇထတ်းၶေႃႈမုၼ်းပိူင်ပဵၼ်မၼ်းၵႂႃႇ ၼႆယဝ်ႉ။

တႆးလွတ်ႈလႅဝ်း