သိုၵ်းမၢၼ်ႈဢဝ်တရူၼ်းပွႆႇမၢၵ်ႇသႂ်ႇၵူၼ်းမိူင်း

ၸုမ်းသိုၵ်းပဢူဝ်း PNLA ပိုၼ်ၽၢဝ်ႇဝႃႈ မိူဝ်ႈဝၼ်းထီႉ 6 January 2025 (လိူၼ်ၵမ်မႂ်ႇ 8 ၶမ်ႈ ပီႊတႆး 2119 ၼီႈ) ယၢမ်းၵၢင်ၼႂ် 9:00 မူင်း ၸုမ်းသိုၵ်းမၢၼ်ႈ ဢဝ်တရူၼ်း ပွႆႇမၢၵ်ႇသႂ်ႇ ၼႂ်းဝၢၼ်ႈထီႇၸူင် ၸႄႈဝဵင်းသီႇသႅင်ႇ လႄႈ ၾႆးမႆႈႁိူၼ်းၵူၼ်းမိူင်း 2 လင်၊ ၵႃး 1 လမ်း ဝႃႈၼႆ။

ၽူႈမီးပုၼ်ႈၽွၼ်းၸုမ်းသိုၵ်းပဢူဝ်း  PNLA လၢတ်ႈတီႈ The People’s Voice ဝႃႈ သိုၵ်းမၢၼ်ႈၸုမ်းၼႆႉ ပၵ်းတပ်ႉဝႆႉတီႈဝၢၼ်ႈလွႆထွႆႇသေ ဢဝ်တရူၼ်းမိၼ်ၵႂႃႇ ပွႆႇမၢၵ်ႇသႂ်ႇၵူၼ်းမိူင်း၊ ၵူၼ်းမိူင်းတႄႉဢမ်ႇလႆႈတိူဝ်ႉမၢတ်ႇၸဵပ်းသင် လႄႈ တၼ်းတိူဝ်ႉၸပ်းၺႃးႁိူၼ်း လုၵ်ႉမႆႈပဵၼ်ၾႆးၵႂႃႇ၊ ၵွပ်ႈပိူဝ်ႈသိုၵ်းမၢၼ်ႈ ၵမ်းၵမ်းပွႆႇမၢၵ်ႇသႂ်ႇၼႂ်းဝၢၼ်ႈ လႄႈ ၵူၼ်းမိူင်းၵေႃႈ ဢွၼ်ၵၼ်ၵူဝ်ႁေ ဢမ်ႇႁတ်းယူႇၼႂ်းဝၢၼ်ႈယဝ်ႉ၊ တီႈဝၢၼ်ႈထီႇၸူင်ၼႆႉ ၸုမ်းသိုၵ်းႁဝ်း ဢမ်ႇလႆႈပၵ်းတပ်ႉဝႆႉ လႄႈ ဢမ်ႇလႆႈပဵၼ်ပၢင်တိုၵ်းၵၼ်တင်း သိုၵ်းမၢၼ်ႈ ဝႃႈၼႆ။

ဝၢၼ်ႈထီႇၸူင် မီးလင်ႁိူၼ်းတမ်း 100 ပၢႆ ၸုမ်းသိုၵ်းမၢၼ်ႈ ၵမ်းၵမ်းယိုဝ်းမၢၵ်ႇလူင်သႂ်ႇၼႂ်းဝၢၼ်ႈသေ ႁဵတ်းႁႂ်ႈႁိူၼ်းၵူၼ်းမိူင်း လူႉၵွႆၵႂႃႇ တၢင်းမူတ်းမီး 24 လင် ၼႆယူႇယဝ်ႉ။

တႆးလွတ်ႈလႅဝ်း