လၢၼ်ႉယိုဝ်းမၢၵ်ႇၵၢင်ႇၵွၼ် ၼႂ်းပွႆးၶၢဝ်းၵတ်း ၵဵင်းမႆႇ ပႅတ်ႉလႅၼ်ၵႃႈၶၼ်

မိူဝ်ႈၼႆႉဝၼ်းထီႉ 9 January 2025 (လိူၼ်ၵမ်မႂ်ႇ 9 ၶမ်ႈ ပီႊတႆး 2119 ၼီႈ) သိုဝ်ႇၶၢဝ်ႇထႆး လၢႆးငၢၼ်း ၵဵဝ်ႇလူၺ်ႈလွင်ႈ လၢၼ်ႉယိုဝ်းမၢၵ်ႇၵၢင်ႇၵွၼ် ဢမ်ႇၼၼ် ၸၢမ်းမိုဝ်းမႅၼ်ႈ လၢတ်ႈဝႃႈ 1 ၵွင် 20 ဝၢတ်ႇ၊ ဝၢႆးသေပိူၼ်ႈယိုဝ်းယဝ်ႉ သမ်ႉလၢတ်ႈဝႃႈ 1 လုၵ်ႈ 20 ဝၢတ်ႇ ႁဵတ်းသင်ဢမ်ႇဢၢၼ်ႇလိၵ်ႈတီႈပၢႆႉ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းၵေႃႉဢၼ်ထုၵ်ႇၺႃးၸဝ်ႈလၢၼ်ႉပႅတ်ႉလႅၼ်ၼၼ်ႉ လႆႈတႅမ်ႈတၢင်ႇၼိူဝ် Facebook ဝႃႈ မိူဝ်ႈၼႆႉၶႃႈတင်းတႆးၵေႃႉ လႆႈၵႂႃႇဢႅဝ်ႇလႄႇ ပွႆးၶၢဝ်းၵတ်း (งานฤดูหนาว) သေ ၵႂႃႇႁၼ်လၢၼ်ႉယိုဝ်းမၢၵ်ႇၵၢင်ႇၵွၼ် လႄႈ လႆႈၵႂႃႇထၢမ် တူၺ်းၵႃႈၶၼ်မၼ်း၊ ၵမ်းၼၼ်ႉ ၸဝ်ႈလၢၼ်ႉလၢတ်ႈဝႃႈ 1 ၵွင် 20 ဝၢတ်ႇ ၶႃႈၵေႃႈ တူၵ်းၸႂ် ႁဵတ်းသင်ၵႃႈၶၼ်ပေႉထုၵ်ႇ လႄႈ သမ်ႉလႆႈလုၵ်ႈမၼ်းၼမ် ၸိူဝ်းႁဝ်းၵေႃႈ ၶိုၼ်းလႆႈထၢမ်ၵႂႃႇထႅင်ႈၵမ်းၼိုင်ႈသေ ၸဝ်ႈလၢၼ်ႉၵေႃႈတွပ်ႇဝႃႈ ၸႂ်ႈယဝ်ႉ ၼႆလႄႈ ၸိူဝ်းႁဝ်းၵေႃႈ ၶိုၼ်းၸၢႆႇငိုၼ်းၵႂႃႇ 20 ဝၢတ်ႇ ယိုဝ်းတေႃႇပေႃးမူတ်း ဝႃႈၼႆ။

ဝၢႆးသေယိုဝ်းယဝ်ႉ တေဢၢင်ႈပႆဢွၵ်ႇလၢၼ်ႉၵႂႃႇၼၼ်ႉ ၸဝ်ႈလၢတ်ႈႁွင်ႉလၢတ်ႈဝႃႈ တင်းမူတ်းမႅၼ်ႈယူႇ 1,200 ဝၢတ်ႇ ယွၼ်ႉသိုဝ်ႉ 2 ၵွင်၊ ၸိူဝ်းႁဝ်းၵေႃႈ ဢွၼ်ၵၼ်တူၺ်း ၼႃႈၵၼ်သေ ထၢမ်ၶိုၼ်းဝႃႈ ၵႃႈၶၼ်တႄႉတႄႉမၼ်းသမ်ႉၵႃႈႁိုဝ်လႃႇၼႆလႄႈ ၸဝ်ႈလၢၼ်ႉတွပ်ႇဝႃႈ 1 လုၵ်ႈ 20 ဝၢတ်ႇ၊ ဢၼ်ႁဝ်းၶႃႈယိုဝ်းၵႂႃႇတင်းမူတ်းသမ်ႉ 30 လုၵ်ႈ လႄႈ ၸဝ်ႈလၢၼ်ႉဝႃႈ ႁဵတ်းသင်ဢမ်ႇဢၢၼ်ႇလိၵ်ႈတီႈပၢႆႉဢၼ်တႅမ်ႈဝႆႉ၊ ယွၼ်ႉတူဝ်လိၵ်ႈမၼ်းလဵၵ်ႉၼႃႇသေဢမ်ႇၵႃး သမ်ႉတိုၼ်ႇတဵၼ်ႈ ၶႂ်ႈယိုဝ်းၼႃႇသေ ဢမ်ႇတၼ်းလႆႈဢၢၼ်ႇ ဝႃႈၼႆ။

ၸိူင်ႉႁိုဝ်ၵေႃႈလီ ၸိူဝ်းႁဝ်းလၢတ်ႈဝႃႈ တေႁွင်ႉပလိၵ်ႈ ဢမ်ႇၼၼ် ၽူႈၸတ်းၵၢၼ်ပၢင်ပွႆး ၵေႃႉမႃးဢုပ်ႇၵႄႈလိတ်ႈၼႆ လႄႈ ၸဝ်ႈလၢၼ်ႉၶိုၼ်းဝႃႈ ပေႃးၼၼ် ဢမ်ႇတၢပ်ႈၸၢႆႇယဝ်ႉ ဝႃႈၼႆ။

လွင်ႈလႅၼ်မၢပ်ႇၵႃႈၶၼ်ၵုၼ်ႇၶၢႆၸိူင်ႉၼႆ မီးထႅင်ႈလၢႆပိူင် တူဝ်ယၢင်ႇထႅင်ႈဢၼ်ၼိုင်ႈ မိူၼ်ၼင်ႇ တီႈၼႃႈလၢၼ်ႉသႂ်ႇပၢႆႉလိၵ်ႈဝႆႉဝႃႈ မၢၵ်ႇမူင်ႈသိၵ်ႈ 1ၸွၵ်း 10 ဝၢတ်ႇ ပေႃးဢဝ်တႄႉတႄႉသမ်ႉဝႃႈ မၢၵ်ႇမူင်ႈၸွၵ်း30 ဝၢတ်ႇ 10ဝၢတ်ႇၼၼ်ႉပဵၼ်ၵႃႈၼမ်ႉၽိတ်ႉၵပ်းမၼ်း ၼႆၵေႃႈမီး ၵွပ်ႈၼၼ်တေသိုဝ်ႉသင် ႁႂ်ႈတူၺ်း ႁႂ်ႈထၢမ်ၵႃႈၶၼ်မၼ်းလီလီသေ ၸင်ႇသိုဝ်ႉၼႆ တေၸၢင်ႈႁႄႉၵင်ႈ ဢမ်ႇႁႂ်ႈတူၵ်းလွၵ်းၵူၼ်းၵႃႉၶဝ်လၢႆးၼိုင်ႈယူႇ။

တႆးလွတ်ႈလႅဝ်း