သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်း တၢႆ 40 ပၢႆ တီႈမိူင်းရၶႅင်ႇ

မိူဝ်ႈဝႃးဝၼ်းထီႉ 8 January 2025 (လိူၼ်ၵမ်မႂ်ႇ 10 ၶမ်ႈ ပီႊတႆး 2119 ၼီႈ) ယၢမ်းဝၢႆးဝၼ်းမွၵ်ႈ 13:00 မူင်းပၢႆ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၼႂ်းပိုၼ်ႉတီႈၵျွၵ်ႉၼီႇမေႃႇ ၸႄႈဝဵင်းယႅၼ်းပျႄး မိူင်းရၶႅင်ႇသေ မီးၵူၼ်းမိူင်း လႆႈတၢႆ 40 ပၢႆ မၢတ်ႇၸဵပ်း 20 ပၢႆ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈတီႈသိုဝ်ႇၶၢဝ်ႇ Irrawaddy ဝႃႈ ပိုၼ်ႉတီႈၵျွၵ်ႉၼီႇမေႃႇ ၼၼ်ႉ ၵူၼ်းမိူင်းယူႇသၢင်ႈၵိၼ်သဝ်းၼမ်ၼႃႇလႄႈ ႁိူၼ်းယေးၵေႃႈ တိတ်းၸပ်းၵၼ်ၵႂႃႇသဵင်ႈ ပေႃးဝႃႈၾႆးမႆႈၵေႃႈ လၢမ်းတိတ်းၸပ်းၵၼ် လႆႈဝႆးၼၼ်ႉယဝ်ႉ၊  မိူဝ်ႈၼႆႉဝၼ်းထီႉ 9 January လႆႈငိၼ်းထႅင်ႈဝႃႈ မီးၵူၼ်းလႆႈလူႉတၢႆ ၽိူမ်ႉၶိုၼ်ႈထႅင်ႈသေ ၶိူင်ႈၵမ်ႉၵႅမ်တႃႇယူတ်းယႃၵၼ်ၼၼ်ႉၵေႃႈ မီးလွင်ႈယၢပ်ႇၽိုတ်ႇဝႆႉ ဝႃႈၼႆ။

ဝဵင်းယႅၼ်းပျႄးၼႆႉ ၸုမ်းသိုၵ်းရၶႅင်ႇ AA တိုၵ်းသိမ်းလႆႈတီႈၼႂ်းမိုဝ်းၸုမ်းသိုၵ်းမၢၼ်ႈ မိူဝ်ႈဝၼ်းထီႉ 11 March 2024 လႄႈ ပိုၼ်ႉတီႈၼႆႉဢမ်ႇမီးပၢင်တိုၵ်းႁိုင်ယဝ်ႉသေ မိူဝ်ႈလဵဝ်ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်း ယူႇသၢင်ႈၵိၼ်သဝ်း ၼႆယူႇယဝ်ႉ။

Photo-APM

တႆးလွတ်ႈလႅဝ်း