COVID-19 ၽႄႈလၢမ်းႁၢဝ်ႈႁႅင်း ၼႂ်းမိူင်းႁူမ်ႈတုမ် ထႆး ဢဝ်ႁူမ်ႇလူမ်ႈ ၸွမ်းလႅၼ်လိၼ် ၼႅၼ်ႈၼႃလိူဝ်သေၵဝ်ႇ

ဝၢႆးသေ ၸိူဝ်ႉမႅင်း COVID-19 ၽႄႈလၢမ်းႁၢဝ်ႈႁႅင်း ထပ်းၵၼ်လၢႆဝၼ်း တီႈၼႂ်းမိူင်းႁူမ်ႈတုမ် ထႆး တိူဝ်းႁႅင်း ၸဝ်ႈၼႃႈတီႈတင်းၼမ် ဢဝ်ႁူမ်ႇလူမ်ႈၸွမ်းလႅၼ်လိၼ် ၼင်ႇႁိုဝ်တေဢမ်ႇမီးၵူၼ်းလၵ်ႉၶဝ်ႈမိူင်း။

မိူဝ်ႈဝၼ်းထီႉ 28 August 2020 (လိူၼ်ၵဝ်ႈမႂ်ႇ 10 ၶမ်ႈ ပီႊတႆး 2114 ၼီႈ) သိုဝ်ႇၶၢဝ်ႇ ThaiPBS North ဢွၵ်ႇၼႄဝႆႉဝႃႈ ဝၢႆးသေ ႁွင်ႈၵၢၼ်ၽၢႆႇပၢႆးယူႇလီ လႄႈ ၽၢႆႇလဵၼ်ႈႁႅင်း မိူင်းႁူမ်ႈတုမ် ၵူတ်ႇထပ်းထူပ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တီႈၼႂ်းမိူင်းႁူမ်ႈတုမ် လၢႆဝၼ်းထပ်းၵၼ်ၼႆႉ ၸဝ်ႈၼႃႈတီႈထႆး လႆႈၽိူမ်ႉထႅမ်ႁႅင်းသိုၵ်းတင်းၼမ် တႃႇဢဝ်ႁူမ်ႇလူမ်ႈ ၸွမ်းလႅၼ်လိၼ် ယွၼ်ႉတေၸၢင်ႈမီး ၵူၼ်းဢၼ်လုၵ်ႉၼႂ်းမိူင်းႁူမ်ႈတုမ် လၵ်ႉၶဝ်ႈၼႂ်းမိူင်းထႆး ၼႆယဝ်ႉ။

ယူႇတီႈၽူႈမီးပုၼ်ႈၽွၼ်း လႆႈသင်ႇႁႂ်ႈမီးလွင်ႈၵူတ်ႇထတ်း ၸွမ်းလႅၼ်လိၼ်ႁၢဝ်ႈႁႅင်း မိူၼ်ၼင်ႇ ၸႄႈဝဵင်းမႄသၢႆ၊ ၸႄႈဝဵင်းမႄႈၾႃႉလူင် လႄႈ ၸႄႈဝဵင်းမႄႈၸၼ် ဢိၵ်ႇတင်း ၸႄႈဝဵင်းၵဵင်းသႅၼ် ၼႂ်း 4 ၸႄႈဝဵင်းၼႆႉ ယူႇၼႂ်းၸႄႈတွၼ်ႈ ၵဵင်းႁၢႆးတင်းမူတ်း လႄႈ ပဵၼ်ၸႄႈဝဵင်းဢၼ်တိတ်းၸပ်းလႅၼ်လိၼ် တႆး-ထႆး တင်းမူတ်းၼႆယဝ်ႉ။

Photo – ThaiPBS North

ၼွၵ်ႈလိူဝ်ၼၼ်ႉ ႁွင်ႈၵၢၼ်ဢုပ်ႉပိူင်ႇၽၢႆႇၼႂ်းမိူင်း မိူင်းထႆး ယင်းလႆႈဢွၵ်ႇလိၵ်ႈထိုင် ၸႄႈဝဵင်း လႄႈ ၸႄႈတွၼ်ႈ ဢၼ်တိတ်းၸပ်းလႅၼ်လိၼ်ၵၼ် မိူင်းႁူမ်ႈတုမ်တင်းမူတ်း ႁႂ်ႈမီးလွင်ႈပႂ်ႉၵူတ်ႇထတ်း ၸွမ်းလႅၼ်လိၼ် ၼႅၼ်ႈၼႃ ၼင်ႇႁိုဝ် တေဢမ်ႇမီးၵူၼ်းၼႂ်းမိူင်းႁူမ်ႈတုမ် လၵ်ႉၶဝ်ႈမိူင်းထႆးလႆႈၼၼ်ႉ ၼႆယဝ်ႉ။

မိူဝ်ႈၼႆႉ ဝၼ်းထီႉ 28 August 2020 ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 တီႈၼႂ်းမိူင်းထႆး တိူဝ်းၶိုၼ်ႈထႅင်ႈ 6 ၵေႃႉ ႁူမ်ႈၵူၼ်းတိတ်းၸပ်းၸိူဝ်ႉမႅင်း တင်းမူတ်းမီး 3,410 ၵေႃႉ၊ ၵူၼ်းလူႉသဵင်ႈတၢႆ တင်းမူတ်းမီး 58 ၵေႃႉ၊ ၵူၼ်းဢၼ်ယူတ်းယႃ ၸိုၼ်ႈၶႅၼ်းၶိုၼ်းမီး 3,237 ၵေႃႉ ၼႆယဝ်ႉ။

ၵူၼ်းတိတ်းၸပ်းၸိူဝ်ႉမႅင်း COVID-19 တီႈၼႂ်းမိူင်းႁူမ်ႈတုမ် တႄႇၸဵမ်မိူဝ်ႈဝႃး ဝၼ်းထီႉ 27 August 2020 ယၢမ်းၵၢင်ၶိုၼ်း 20:00 မူင်း တေႃႇထိုင်မိူဝ်ႈၼႆႉ ဝၼ်းထီႉ 28 August 2020 ယၢမ်းၵၢင်ၼႂ် 08:00 မူင်း ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 42 ၵေႃႉ၊ ႁူမ်ႈၵူၼ်းတိတ်းၸပ်း ၸိူဝ်ႉမႅင်းတင်းမူတ်းမီး 628 ၵေႃႉ၊ ၵူၼ်းဢၼ်လႆႈလူႉသဵင်ႈတၢႆ မီး 6 ၵေႃႉ၊ ၵူၼ်းဢၼ်လႆႈယူတ်းယႃ ၸိုၼ်ႈၶႅၼ်းၶိုၼ်းသမ်ႉ မီး 349 ၵေႃႉ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း