COVID-19 ၸိူဝ်ႉၽၼ်း Omicron လႄႈ Delta ၽႄႈလၢမ်းမိူဝ်ႈလဵဝ်ၵၼ် ၵူၼ်းတိတ်းၸပ်းတိူဝ်းၶိုၼ်ႈသုင်ႁႅင်း

မိူဝ်ႈဝၼ်းထီႉ 29 December 2021 သိုဝ်ႇၶၢဝ်ႇ Reuters လၢႆးငၢၼ်းဝႆႉဝႃႈ ၵူၼ်းတိတ်းၸပ်းၸိူဝ်ႉမႅင်း COVID-19 တူဝ်ႈလုမ်ႈၾႃႉ ၼႂ်းၶၢဝ်းတၢင်း 7 ဝၼ်းပူၼ်ႉမႃးၼႆႉ ႁူဝ်ၼပ်ႉၵူၼ်းတိတ်းၸပ်းၶိုၼ်ႈသုင်မႃးထႅင်ႈ ယွၼ်ႉ COVID-19 ၸိူဝ်ႉၽၼ်းမႂ်ႇ Omicron ၽႄႈလၢမ်းလႆႈဝႆးသေ ဢမ်ႇၸၢင်ႈၵုမ်းထိင်းလႆႈလႄႈ လူင်ပွင်ၸိုင်ႈၼႂ်းလၢႆၸိုင်ႈမိူင်းၵေႃႈ ၶတ်းၸႂ်ၵုမ်းထိင်းလွင်ႈၽႄႈလၢမ်းၸိူဝ်ႉမႅင်းၼႆႉ ၼင်ႇႁိုဝ် တေဢမ်ႇမႃးတုမ်ႉတိူဝ်ႉတေႃႇ ပၢႆးမၢၵ်ႈမီးလႆႈၼႆယူႇယဝ်ႉ။

ၵူၼ်းတိတ်းၸပ်း COVID-19 ၽတ်ႉၽဵင်ႇ တေႃႇဝၼ်းၼႆႉ မီးၸမ်ထိုင် 900,000 ၵေႃႉ တႄႇၼပ်ႉမႃး မိူဝ်ႈဝၼ်းထီႉ 22-28 December 2021 ၼႆယူႇယဝ်ႉ။

ၸုမ်းပၢႆးယူႇလီလုမ်ႈၾႃႉ WHO ၵေႃႈ ဢွၵ်ႇမႃးပၼ်ၾၢင်ႉဝႃႈ ၸိူဝ်ႉၽၼ်း Omicron လႄႈ Delta တေႁဵတ်းႁႂ်ႈ မီးၵူၼ်းတိတ်းၸပ်းတိူဝ်းၶိုၼ်ႈသုင်မႃးထႅင်ႈလႄႈ ၵူၼ်းၶဝ်ႈယူတ်းယႃတူဝ်တီႈၼႂ်းႁူင်းယႃ ဢိၵ်ႇတင်း ၵူၼ်းလူႉသဵင်ႈတၢႆ တေၼမ်မႃးထႅင်ႈၼႆသေ မီးလွင်ႈမႆႈၸႂ်ဝႃႈ သင်ၸိူဝ်ႉမႅင်းသွင်ၸိူဝ်ႉၽၼ်း ၽႄႈလၢမ်းမိူဝ်ႈလဵဝ်ၵၼ်ၼႆ  တေၽႄႈလၢမ်းလႆႈငၢႆႈလႄႈ လႆႈဝႆးသေ ႁဵတ်းႁႂ်ႈ ပဵၼ်ၽေး ဢၼ်ယႂ်ႇလူင်မႃးယူႇ ၼႆယဝ်ႉ။

ပႅၵ်ႉသမ်ႉထူပ်းႁၼ်ဝႃႈ ၸိူဝ်ႉၽၼ်း Omicron ၼၼ်ႉ ဢမ်ႇႁၢႆႉႁႅင်းတၢၼ်ႇ ၸိူဝ်ႉၽၼ်း Delta ၼႆသေတႃႉ ၵူၺ်းၵႃႈ ၵူၼ်းတိတ်းၸပ်းၸိူဝ်ႉမႅင်းၼၼ်ႉ ႁဵတ်းႁႂ်ႈ ႁူင်းယႃလၢႆၸိုင်ႈမိူင်း တေလႆႈႁပ်ႉမိုဝ်းၵႂႃႇၸွမ်းမၼ်းလႄႈ တေမီးၵူၼ်းပဵၼ်လူၼ်ႉႁူင်းယႃ မႃးၶိုၼ်းထႅင်ႈပွၵ်ႈၼိုင်ႈ ၼႆယဝ်ႉ။

တႆးလွတ်ႈလႅဝ်း