Finland-Sweden တေၸၢင်ႈၶဝ်ႈပဵၼ်လုၵ်ႈၸုမ်းဢူၺ်းလီ NATO

ဝၢႆးသေ ရၢတ်ႉသျႃး ၶဝ်ႈတိုၵ်းယူႇၶရဵၼ်း တႄႇၸဵမ်မိူဝ်ႈ ဝၼ်းထီႉ 24 February 2022 ၼၼ်ႉ လႆႈႁၼ်ဝႃႈမီးလွင်ႈလႅၵ်ႈလၢႆႈၵႂႃႇတင်းၼမ် ပိူင်တႅၵ်ႈဢၼ်လႆႈႁၼ်ၸႅင်ႈလႅင်းတႄႉ မိူၼ်ၼင်ႇ ၾိၼ်လႅၼ်ႇ၊ သဝိတ်ႉတႅၼ်ႊ  Finland-Sweden သွင်ၸိုင်ႈမိူင်းဢၼ်ယူႇၼႂ်းတွၼ်ႈ သၵႅၼ်ႊတီႊၼေးဝီးယႃး Scandinavia ဢၼ်မီးၼႂ်းၵေႈၵၢင်ၼေႃႇဝေး Norway လႄႈ ရၢတ်ႉသျႃး Russia မီးသၢႆငၢႆၶႂ်ႈၶဝ်ႈပဵၼ်လုၵ်ႈၸုမ်းဢူၺ်းလီ ၼႃႇတူဝ်း NATO ၵူၺ်းရၢတ်ႉသျႃးဢမ်ႇၶႂ်ႈႁႂ်ႈ NATO သိုပ်ႇၶႂၢၵ်ႈလၢမ်း ဢႃႇၼႃႇၸၢၵ်ႈတိူဝ်းၼမ်မႃး လိူဝ်သေၼႆႉဝႃႈၼႆ။

သွင်ၸိုင်ႈမိူင်း ၾိၼ်ႊလႅၼ်ႊ−သဝိတ်ႉတႅၼ်ႊ Finland-Sweden ဢမ်ႇပႆႇလႆႈပဵၼ်လုၵ်ႈ ၸုမ်းဢူၺ်းလီ NATO ၼႆသေတႃႉ ၵူၺ်းၵႃႈ ပဵၼ်ဝႆႉၽူႈႁူမ်ႈတိုၼ်းၸွမ်းၸုမ်းႁူမ်ႈမိုဝ်း တင်းၽၢႆႇၵႅတ်ႇၶႄၶဝ်လႄႈ ၸင်ႇလႆႈၽိုၵ်းၵၢၼ်သိုၵ်း ႁူမ်ႈၵၼ်ၼင်ႇမၵ်းမၼ်ႈဝႆႉၶပ်ႉမၢႆၵဝ်ႇ ၼႂ်းမိူင်း ၼေႃႇဝေး Norway မိူဝ်ႈလိူၼ် March ပူၼ်ႉမႃးဝႃႈၼႆ။

ရွႆးတိူဝ် Reuters လၢႆးငၢၼ်းဝႃႈ ၵၢၼ်ၽိုၵ်းသိုၵ်းႁူမ်ႈၵၼ် ၸိုဝ်ႈဝႃႈ ၶူဝ်းရႅတ်ႉသပွၼ်း  “Cold Response” ဢၼ်ၸတ်းႁဵတ်းတီႈၼေႃႇဝေး Norway မိူဝ်ႈလိူၼ်ပူၼ်ႉမႃးၼႆႉ ပဵၼ်ၽႅၼ်ၵၢၼ် ဢၼ်လႆႈတမ်းဝၢင်းဝႆႉ ၸဵမ်မိူဝ်ႈရၢတ်ႉသျႃးပႆႇၶဝ်ႈတိုၵ်းယူႇၶရဵၼ်းၼၼ်ႉယဝ်ႉ ရွႆးတိူဝ်ႉႁၢႆးငၢၼ်းၶၢဝ်ႇဝႆႉၼင်ႇၼႆ။

ၸွမ်ႁၢၼ်သတီၾႅၼ်ၼွတ်ႉသတူၼ်ႊ ၶွင်သဝိတ်ႉတဵၼ်ႊ Major General Stefan Nordstrom of Sweden လၢတ်ႈတီႈသိုဝ်ႇၶၢဝ်ႇ ရွႆးတိူဝ် Reuters ဝႃႈ ငဝ်းလၢႆးလွင်ႈမၼ်းၼိမ်သဝ်းၼႂ်းယူးရူပ်ႉတင်းမူတ်း လႅၵ်ႈလၢႆႈၵႂႃႇယဝ်ႉ လွင်ႈၼႆႉသင်ႁဝ်းတူၺ်းဢမ်ႇႁၼ် ၸိုင် ပွင်ႇဝႃႈ ႁဝ်းမီးပၢႆးဝူၼ်ႉဢၼ်သိုဝ်ႈယူဝ်း ၼႃႇပူၼ်ႉတီႈယဝ်ႉ ၵွပ်ႈၼၼ် ႁဝ်းၵေႃႈ လူဝ်ႇလႅၵ်ႈလၢႆႈၸွမ်းငဝ်းလၢႆးယဝ်ႉ ဝႃႈၼႆ။

ၾိၼ်ႇလႅၼ်−သဝိတ်ႉတႅၼ်ႊ Finland – Sweden မီးႁူဝ်ၼပ်ႉၵူၼ်းတင်းသွင်မိူင်းႁူမ်ႈၵၼ် 16 လၢၼ်ႉၵေႃႉ ဢမ်ႇပႆႇၶဝ်ႈႁူမ်ႈပဵၼ်လုၵ်ႈၸုမ်း NATO ၼႆသေတႃႉ ဢၼ်လႆႈပဵၼ်ဢူၺ်းလီ ၸုမ်းႁူမ်ႇလူမ်ႈ security group လွင်ႈမၼ်ႈၼိမ်သဝ်းၼႆႉ မၢႆထိုင်တေလႆႈႁပ်ႉတၢင်းၸွႆႈထႅမ် တီႈၸုမ်းဢူၺ်းလီ NATO ဢမ်ႇႁၢင်ႉ လွင်ႈလႆႈႁပ်ႉတၢင်းၸွႆႈ ထႅမ်ၸိူင်ႉၼႆ လွင်ႈယႂ်ႇတႄႉတႄႉ ယွၼ်ႉရၢတ်ႉသျႃးၶဝ်ႈတိုၵ်း ယူႇၶရဵၼ်းပွၵ်ႈၼႆႉ ႁွင်ႉဝႃႈ ၵၢၼ်တူင်ႉၼိုင်ၶိုၵ်ႉတွၼ်းၽၢႆႇၵၢၼ်သိုၵ်း (military special operations) ဝႃႈၼႆ။

Finland မီးလႅၼ်လိၼ် 1,300 ၵီလူဝ်ႇမီတိူဝ်ႊ ဢၼ်တိတ်းၸပ်းလႅၼ်လိၼ်ရၢတ်ႉသျႃး လႄႈယၢမ်ႈထုၵ်ႇ ရၢတ်ႉသျႃး ၶဝ်ႈတိုၵ်းၼႂ်းပီ 1939 လႄႈပီ 1944 မိူဝ်ႈပူၼ်ႉမႃး၊ ၵူၼ်းမိူင်း Finland 96,000 ၵေႃႉဢမ်ႇၼၼ် 100% လႂ် 2.5 လႆႈလူႉတၢႆၼႂ်းပၢင်တိုၵ်းတင်းရၢတ်ႉသျႃးတၢင်းမူတ်း လႄႈရၢတ်ႉသျႃး လႆႈလႅၼ်လိၼ်ၵႂႃႇၵမ်ႈၽွင်ႈသေၸင်ႇလႆႈထွၼ်သိုၵ်းဢွၵ်ႇ Finland ၵႂႃႇဝႃႈၼႆ။

တင်ႈတေႇဢဝ်ၼၼ်ႉမႃး Finland လႆႈသၢင်ႈဢဵၼ်ႁႅင်းတႃႇၵႅတ်ႇၶႄတူဝ်ၵဝ်ႇၼမ်တိူဝ်းမႃး ထႅင်ႈ ၽၢႆႇၼိုင်ႈၵေႃႈ  သၢင်ႈလွင်ႈၸမ်ၸႂ်တၢင်းရၢတ်ႉသျႃး ယူႇဝႃႈၼႆ။ ၸိူင်ႉႁိုဝ်ၵေႃႈလီ မိူဝ်ႈဝၼ်းထိ 28 March ပူၼ်ႉမႃး ၸွမ်ၸိုင်ႈသူဝ်ႇလီၼီၼီသတူဝ်း Soli Ninisto ၶွင် Finland  ထၢမ်ထိုင် NATO ဝႃႈ မီးလၵ်းၼမ်း လွင်ႈတႅတ်ႈတေႃးၸိူင်ႉႁိုဝ်ၽွင်ႈတႃႇႁပ်ႉလုၵ်ႈၸုမ်း ဢူၺ်းလီမႂ်ႇဝႃႈၼႆ။ လိူဝ်သေၼၼ်ႉ ၽွင်းလူင်ၽၢႆႇ ၼွၵ်ႈမိူင်း Finland လၢတ်ႈဝႃႈ လႆႈဢုပ်ႇၸွမ်းၼႂ်းဢူၺ်းလီ NATO တင်း 30 မိူင်းယဝ်ႉ။ တေသိုပ်ႇယိုၼ်ႈလိၵ်ႈထိုင် သၽႃး Finland ၵၢင်လိူၼ် April ၼႆႉဝႃႈၼႆ။ သိုဝ်ႇၶၢဝ်ႇ Reuters လၢႆးငၢၼ်းဝႃႈ လွင်ႈရၢတ်ႉသျႃးၶဝ်ႈတိုၵ်းယူႇၶရဵၼ်း ပွၵ်ႈၼႆႉ ပိုတ်ႇႁူပိုတ်ႇတႃပၼ်လႄႈႁဵတ်းႁႂ်ႈၵူၼ်းမိူင်း Finland ၶဝ်ႈႁၢပ်ႇထၢမ်းၵၢၼ်သိုၵ်းတၢင်းၼမ်ဝႃႈၼႆ။

တွၼ်ႈတႃႇ Finland တႄႉမိူဝ်ႈပူၼ်ႉမႃးၵေႃႈယၢမ်ႈလၢတ်ႈဝႃႈလွင်ႈယူႇၵၢင်ပဵၼ်တၢင်းတီႈလီတီႈ သုတ်းပဵၼ်ၽွၼ်းလီတႃႇၵူၼ်းမိူင်းဝႃႈၼႆသေတႃႉ ၊ တေႃႇပေႃးထိုင် ရၢတ်ႉသျႃး ၶဝ်ႈတိုၵ်းတွၼ်ႈ  ၶရၢႆးမီးယႃး Crimea ၶွင်ယူႇၶရဵၼ်း မိူဝ်ႈ 8 ပီႊ ပူၼ်ႉမႃး ၊ Finland ၸင်ႇလႆႈၶိုၼ်းသၢင်ႈ ဢဵၼ်ႁႅင်းတပ်ႉသိုၵ်း ႁႂ်ႈၵႅၼ်ႇၶႅင်ၶိုၼ်ႈမႃးထႅင်ႈဝႃႈၼႆ။ မိူဝ်ႈပူၼ်ႉမႃးလၢႆဝၼ်း ၼႆႉၵေႃႈ Finland လၢတ်ႈဝႃႈတေၽိူမ်ႉထႅမ်ပၼ် ငိုၼ်းတပ်ႉသိုၵ်း ထႅင်ႈ 2 ပူၼ်ႈဝႃႈၼႆ။

မိူဝ်ႈဝၼ်းထိ 2 March ပူၼ်ႉမႃး ၽူဝ်းလ်ၶွင်တီႇမူဝ်ႇသၵူပ်ႉ Polls by Demoscops ဢၼ်ႁဵတ်းၵၢၼ်ပၼ်လိၵ်ႈပိုၼ်ၽၢဝ်ႇ ဢႅၾ်ႉတွၼ်ႊပလတႅတ်ႉ Aftonbladet လၢတ်ႈဝႃႈ ၵူၼ်းမိူင်း Finland 71% လွမ်ၵူဝ်ၽေးသိုၵ်းရၢတ်ႉသျႃးတိုဝ်းၼမ်ၶိုၼ်ႈ ပေႃးတႅၵ်ႈတူၺ်း မိူဝ်ႈလိူၼ် January 41% ၵူၺ်းဝႃႈၼႆ။

တၢင်းၽၢႆႇၵၢၼ်မိူင်းၶွင် Finland တိုၵ်ႉသိုပ်ႇလဵပ်ႈႁဵၼ်း လွင်ႈၽၢႆႇၵႅတ်ႇၶႄလွင်ႈၼိမ်သဝ်း ၼႂ်းဢႃၼႃႇၵၢတ်ႈ ၸွမ်ၽွင်းမႅၵ်ႉသ်တႃႇလႅၼ်ႊၼႃ ဢႅၼ်တႃႇသူၼ်ႊ McDalena Andersson လၢတ်ႈၵႂႃႇမိူဝ်ႈဝၼ်းထိ 30 March ဝႃႈလူဝ်ႇပႂ်ႉတူၺ်းလွင်ႈဢၼ်တေပိုတ်ႇပၢင်ႇၼေ ၼႂ်းလိူၼ် May ၵူၺ်းဝႃႈၼႆ။သိုဝ်ႇၶၢဝ်ႇ Reuters လႆႈယွၼ်းတၢင်းႁၼ်ထိုင်တီႈရၢတ်ႉသျႃးၵဵဝ်ႇၵပ်းပၼ်ႁႃ ယူႇၶရဵၼ်း ယူႇၵူၺ်းဢမ်ႇလႆႈၶေႃႈတွပ်ႇၶိုၼ်းဝႃႈ ၼႆ ။ ၸိူင်ႉႁိုဝ်ၵေႃႈလီ ၽွင်းလူင်ၽၢႆႇၼွၵ်ႈမိူင်းရၢတ်ႉသျႃး လၢတ်ႈၵႂႃႇၼႂ်းဝၼ်းထိ 12  March ပူၼ်ႉမႃးတႄႉဝႃႈ သင် Finland-Sweden ၶဝ်ႈႁူမ်ႈပဵၼ်လုၵ်ႈၸုမ်း ဢူၺ်းလီ NATO တၢင်းသွင်ၸိုင်ႈမိူင်း တေလႆႈထူပ်း လွင်ႈဢၼ်ဝူၼ်ႉဢမ်ႇထိုင် တၢင်းၵၢၼ်မိူင်း လႄႈ တၢင်းၵၢၼ်သိုၵ်းဝႃႈၼႆ။

ဢိင်-https://www.voathai.com

တႆးလွတ်ႈလႅဝ်း