NCA-S EAO တေၶတ်းၸႂ်ႁဵတ်းသၢင်ႈ ၼင်ႇႁိုဝ်တေပဵၼ်မႃး ပၢင်ဢုပ်ႇဢူဝ်းၵၢၼ်မိူင်း ဢၼ်ပႃးၵူႈမူႇၵူႈၸုမ်း

ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းလိၵ်ႈႁူမ်ႈမၢႆ (NCA) ၸတ်းႁဵတ်းပၢင်ၵုမ် ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) ပွၵ်ႈၵမ်း (01/2022) လူၺ်ႈလၢႆးတၢင်း Online Video Conference ဝႃႈၼႆ။

ပၢင်ၵုမ် PPST (01/2022) ၼႆႉ တႄႇၸတ်းႁဵတ်း မိူဝ်ႈၼႆႉ ဝၼ်းထီႉ 5 July 2022 ယၢမ်းၵၢင်ၼႂ်သေ တေၸတ်းႁဵတ်းၵႂႃႇတေႃႇထိုင် မိူဝ်ႈၽုၵ်ႈ ဝၼ်းထီႉ 6 July 2022 ၶၢဝ်းတၢင်း 2 ဝၼ်း မီးၽူႈၶဝ်ႈၸုမ်း PPST ၶဝ်ႈႁူမ်ႈဢုပ်ႇဢူဝ်းၵၼ်ၵႂႃႇသေ ၼၢႆႇဢွင်ႇမိၼ်း ၵႅမ်ႁူဝ်ပဝ်ႈ ပႃႇတီႇမိူင်းမွၼ်းမႂ်ႇ (NMSP) ပဵၼ်ပႃးႁူဝ်ၼႃႈ ၸုမ်းၽၢႆႇဢွၼ်ႁူဝ် ၵၢၼ်ငၢၼ်း PPST မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵုမ်ၵႂႃႇ ၼႆယဝ်ႉ။

ၼႂ်းၶေႃႈမွၵ်ႇလၢတ်ႈၶေႃႈၵႂၢမ်း ၼၢႆႇဢွင်ႇမိၼ်းၼၼ်ႉ ပႃးဝႆႉဝႃႈ ၼႂ်းပၢင်ၵုမ်ၼႆႉ ႁဝ်းၶႃႈတေဢုပ်ႇဢူဝ်းၵၼ်လွင်ႈ ၵၢၼ်သိုၵ်း၊ ၵၢၼ်မိူင်း၊ ၵၢၼ်ငမ်းယဵၼ် ဢၼ်ပဵၼ်ယူႇယၢမ်းလဵဝ် လႄႈ လွင်ႈလူလွမ်တူၺ်းထိုင်ၵူၼ်းၼင်ႇၵၼ် ၸိူဝ်းၼႆႉ ဝႃႈၼႆ။

ၽွင်းတၢင်ၶိုၵ်ႉတွၼ်း ဢႃႇသီႇယၼ်ႇ H.E Prak Sokhonn ဢွၵ်ႇၶၢဝ်းတၢင်းမႃး မိူင်းႁူမ်ႈတုမ်ပွၵ်ႈၵမ်းသွင်ၼႆႉ တင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆ (NCA) 7 ၸုမ်း လႆႈႁူပ်ႉထူပ်းဢုပ်ႇဢူဝ်းၵၼ်တီႈ ၼေႇပျီႇတေႃႇ မိူဝ်ႈဝၼ်းထီႉ 1 July 2022 ၼၼ်ႉသေ ယူႇတီႈ 7 ၸုမ်း လႆႈတိုၵ်းသူၼ်းထိုင် ၽွင်းတၢင်ၶိုၵ်ႉတွၼ်း ဢႃႇသီႇယၼ်ႇၵႂႃႇဝႃႈ တႃႇၵႄႈလိတ်ႈလွင်ႈယၢပ်ႇၽိုတ်ႇ တၢင်းၵၢၼ်မိူင်း ဢၼ်ပဵၼ်ယူႇယၢမ်းလဵဝ်ၼၼ်ႉ ႁႂ်ႈၽွင်းတၢင်ၶိုၵ်ႉတွၼ်း ဢႃႇသီႇယၼ်ႇ ၸွႆႈထႅမ်ပၼ် ၼင်ႇႁိုဝ်ပေႃးတေပဵၼ်မႃး ပၢင်ဢုပ်ႇဢူဝ်းၵၢၼ်မိူင်း ဢၼ်ပႃးၵူႈမူႇၵူႈၸုမ်း၊ လွင်ႈၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ ႁႂ်ႈလႆႈတၢင်းၸွႆႈထႅမ် လွင်ႈလူလွမ်တူၺ်းထိုင်ၵူၼ်းၼင်ႇၵၼ် ၸိူဝ်းၼႆႉသေ ၼႂ်းပၢင်ၵုမ်ၼႆႉၵေႃႈ လွင်ႈဢၼ်ႁဝ်းၶႃႈ လႆႈဢုပ်ႇဢူဝ်းၵၼ်မႃးၼၼ်ႉ တေၶိုၼ်းဢုပ်ႇဢူဝ်းၵၼ် ထတ်းသၢင်ၵႂႃႇ ဝႃႈၼႆ။

ၼၢႆႇဢွင်ႇမိၼ်း ယင်းသိုပ်ႇလၢတ်ႈထႅင်ႈဝႃႈ ပိူင်လူင်မၼ်းတႄႉၵေႃႈ ပၢင်ၵုမ်ၼႂ်း ၶၢဝ်းတၢင်း 2 ဝၼ်းၼႆႉ ၸွမ်းၼင်ႇမူႇပိူင် ဢၼ် Summit တမ်းဝၢင်းဝႆႉပၼ် လႄႈ ၸွမ်းၼင်ႇၶေႃႈယိူင်းဢၢၼ်း ၵၢၼ်မိူင်း PPST မီးဝႆႉ ၼၼ်ႉသေ ပၼ်ႁႃၵၢၼ်မိူင်းၼႆႉ တေဢဝ်လၢႆးဢုပ်ႇဢူဝ်းၵၢၼ်မိူင်းသေၵႄႈလိတ်ႈ၊ ၼင်ႇႁိုဝ်ပေႃးတေပဵၼ်မႃး ပၢင်ဢုပ်ႇဢူဝ်းၵၢၼ်မိူင်း ဢၼ်ပႃးၵူႈမူႇၵူႈၸုမ်း၊ လွင်ႈတေၵႅတ်ႇၶႄပၼ်ၵူၼ်းမိူင်း ၸိူဝ်းၼႆႉ ၼင်ႇႁိုဝ်ပေႃးတေၽေႃႇၼမ်ႉၼႄတူဝ်လႆႈ လႄႈ တမ်းဝၢင်းလႆႈ လၢႆးလွၵ်းပိူင်ၼၼ်ႉ တိုၵ်းသူၼ်းႁႂ်ႈၽူႈၶိုၼ်ႈႁွတ်ႈပၢင်ၵုမ်တင်းသဵင်ႈ ဢုပ်ႇဢူဝ်းၵၼ် ႁႃလၢႆးတၢင်းမၼ်းၵႂႃႇ ဝႃႈၼႆ။

တႆးလွတ်ႈလႅဝ်း