RCSS လႄႈ NSPNC ႁူပ်ႉထူပ်းဢုပ်ႇဢူဝ်းၵၼ်

မိူဝ်ႈၼႆႉ ဝၼ်းထီႉ 30 August 2022 (လိူၼ်သိပ်းမႂ်ႇ 5 ၶမ်ႈ ပီႊတႆး 2116 ၼီႈ) ၸုမ်းဢုပ်ႇဢူဝ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ ၸုမ်းဢုပ်ႇဢူဝ်း လွင်ႈငမ်းယဵၼ် ၶွင်ႇသီႇသိုၵ်းမၢၼ်ႈ (NSPNC) ႁူပ်ႉထူပ်းဢုပ်ႇဢူဝ်းၵၼ် တီႈႁူင်းႁေႃး NSPNC ၼေႇပျီႇတေႃႇ ဝႃႈၼႆ။

ပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ ၽၢႆႇၶွင်ႇသီႇဢဝ်ၶိုၼ်းၸိုင်ႈတႆး RCSS ႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း ဢွၼ်ႁူဝ်သေ မီး ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း (1) ၊ ၸဝ်ႈသိုၵ်းလူင် သႅဝ်းႁၢၼ် ၽူႈၶဝ်ႈၵေႃၵမ်ၵၢၼ်ပွင်ၵၢၼ်လူင် (CEC) ၊ ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇမုၵ်ႉၸုမ်း၊ ၸဝ်ႈသိုၵ်း ၸၢႆးႁၢၼ် လႄႈ ၸၢႆးလႅင်း ၶွမ်ႇမတီႇ ၽၢႆႇဢွၼ်ႁူဝ်ၶိုင်ပွင်လွင်ႈငမ်းယဵၼ် RCSS ၶဝ်ႈႁူမ်ႈဢုပ်ႇဢူဝ်းၵႂႃႇသေ ၽၢႆႇ NSPNC သမ်ႉ ၸွမ်သိုၵ်း ယႃႇပျေႉ ႁူဝ်ၼႃႈၸုမ်းဢုပ်ႇဢူဝ်းလွင်ႈငမ်းယဵၼ်၊ ၸွမ်သိုၵ်း မူဝ်းမျိၼ်ႉထုၼ်း၊ ၸွမ်သိုၵ်း မိၼ်းၼွင်ႇ လႄႈ ၸွမ်သိုၵ်း ဝိၼ်းပူဝ်ႇသျဵင်ႇ ၶဝ်ႈႁူမ်ႈဢုပ်ႇဢူဝ်းၵႂႃႇ ဝႃႈၼႆ။

တီႈပၢင်ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇဝႃႈ မိူဝ်ႈဝႃး ဝၼ်းထီႉ 29 August 2022 ႁဝ်းၶႃႈလႄႈ ႁူဝ်ပဝ်ႈ SAC ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ လႆႈဢုပ်ႇဢူဝ်းၵၼ်ၵႂႃႇ လွင်ႈၵေႃႇတင်ႈ မိူင်းႁူမ်ႈတုမ်ၾႅတ်ႇတရႄႇ၊ လွင်ႈငမ်းယဵၼ်လႄႈ ပၢင်ဢုပ်ႇဢူဝ်းၵၢၼ်မိူင်း၊ လွင်ႈၵႄႈၶႆပၼ်ႁႃၵူႈလွင်ႈလွင်ႈ ဢၼ်ပဵၼ်ယူႇယၢမ်းလဵဝ်၊ လွင်ႈမူႇပိူင်တီႇမူဝ်ႇၶရေႇသီႇ ပႃႇတီႇၸေးၸုင်ႇ၊ လွင်ႈၸွႆႈထႅမ်ၵူၼ်းမိူင်း၊ လွင်ႈပူၵ်းပွင်ပိုၼ်ႉတီႈ ၸိူဝ်းၼႆႉ သွင်ၽၢႆႇ လႆႈပိၼ်ႇပၢႆႇ ဢုပ်ႇဢူဝ်းငူပ်ႉငီႉၵၼ် ၼင်ႇၸႅင်ႈလႅင်းလႄႈ တေလႆႈဝႃႈ ပဵၼ်ႁႅင်းဢီးလူင် ဢၼ်ၼိုင်ႈ ၼိူဝ်သဵၼ်ႈတၢင်းၵၢၼ်ငမ်းယဵၼ် လႄႈ တႃႇၵေႃႇတင်ႈ မိူင်းႁူမ်ႈတုမ်ၾႅတ်ႇတရႄႇၼၼ်ႉယူႇ ဝႃႈၼႆ။

ၵၢၼ်ငမ်းယဵၼ်ၼႆႉ ဢမ်ႇၸႂ်ႈဝႃႈ ပဵၼ်ၵၢၼ်ဢၼ်ႁဵတ်းလႆႈငၢႆႈ၊ ၵွပ်ႈၼၼ် လူဝ်ႇဝႆႉ ၸႂ်ယႂ်ႇၸႂ်ယၢဝ်းသေ ႁဵတ်းသၢင်ႈၵႂႃႇလူၺ်ႈပိၼ်ႇပၢႆႇၵေႃႇသၢင်ႈလွင်ႈယုမ်ႇယမ်ၵၼ်၊ သင်ဝႃႈဢမ်ႇမီးလွင်ႈယုမ်ႇယမ်ၵၼ်ၼႆ တေဢမ်ႇလႆႈလွင်ႈၽွမ်ႉႁူမ်ႈ၊ ပေႃးဢမ်ႇမီး လွင်ႈၽွမ်ႉႁူမ်ႈၵေႃႈ ၵၢၼ်ငမ်းယဵၼ်ၼၼ်ႉ တေဢမ်ႇဢွင်ႇမၢၼ်လႆႈ၊ သင်ဝႃႈ ၵူႈမူႇၵူႈၸုမ်း ၶဝ်ႈႁူမ်ႈပႃးသေ ၶတ်းၸႂ်ႁဵတ်းသၢင်ႈၵႂႃႇၵွၼ်ႇ ၸင်ႇတေၵေႃႇတင်ႈလႆႈ လွင်ႈငမ်းယဵၼ်ဢၼ်မၼ်ႈၵိုမ်းယိုၼ်းယၢဝ်းၼၼ်ႉယဝ်ႉ ဝႃႈၼႆ။

ယွၼ်ႉပၼ်ႁႃၵၢၼ်မိူင်းသေ မိူင်းႁူမ်ႈတုမ်ႁဝ်းၶႃႈ ဢမ်ႇၼိမ်သဝ်း၊ လႆႈထူပ်း ပၼ်ႁႃလွင်ႈသုၵ်ႉယုင်ႈ ၵူႈလွင်ႈလွင်ႈယူႇယဝ်ႉ။ ၵွပ်ႈၵၢၼ်မိူင်းဢမ်ႇၼိမ်လႄႈ ႁဵတ်းႁႂ်ႈတုမ်ႉတိူဝ်ႉ လွင်ႈယူႇသၢင်ႈၵိၼ်သဝ်းပေႃႈမႄႈၵူၼ်းမိူင်း။ ဢၼ်ပေႃႈမႄႈ ၵူၼ်းမိူင်း ထူပ်းတၢင်းယၢပ်ႇၽိုတ်ႇ လွင်ႈယူႇသၢင်ႈၵိၼ်သဝ်းၼၼ်ႉၵေႃႈ ႁဵတ်းႁႂ်ႈ တုမ်ႉယွၼ်ႈၵၢၼ်မိူင်းယူႇမိူၼ်ၵၼ်။ ယွၼ်ႉၵၢၼ်မိူင်းဢမ်ႇၼိမ်သေ ႁဵတ်းႁႂ်ႈတုမ်ႉ ယွၼ်ႈပႃး ၵၢၼ်ပၢႆးမၢၵ်ႈမီး လႄႈ ၵၢၼ်ငၢၼ်းတၢင်ႇဢၼ်ထႅင်ႈလၢႆလၢႆလွင်ႈ၊ ယွၼ်ႉၼႆလႄႈ တေလႆႈဝႆႉ ၽွၼ်းလီၸိုင်ႈမိူင်း လႄႈ ၽွၼ်းလီပေႃႈမႄႈၵူၼ်းမိူင်း တၢင်ႇၶီႈမွမ်ႈၸွမ်ႁူဝ်သေ ၶႂ်ႈတိုၵ်းသူၼ်းဝႃႈ ပၼ်ႁႃၵၢၼ်မိူင်းၼႆႉ ႁႂ်ႈဢဝ်ၵၢၼ်မိူင်း သေၵႄႈလိတ်ႈၵႂႃႇ၊ ဢဝ်ၵၢၼ်သိုၵ်းသေ ၵႄႈလိတ်ႈပၼ်ႁႃၵၢၼ်မိူင်းဢမ်ႇလႆႈ ဢၼ်ဝႃႈၼၼ်ႉ ပူၼ်ႉမႃးၶၢဝ်းတၢင်း 70 ပီႊပၢႆၼႆႉ ပဵၼ်တွၼ်ႈသွၼ်ဝႆႉၸႅင်ႈလႅင်းယူႇ။

လၢႆးတၢင်းဢၼ်တေၵႄႈလိတ်ႈပၼ်ႁႃၵၢၼ်မိူင်းလႆႈတႄႉၵေႃႈ လုၵ်ႉတီႈၵူႈမူႇ ၵူႈၸုမ်း ဝၢႆႇၼႃႈၶဝ်ႈႁႃၵၼ် ႁူပ်ႉထူပ်းဢုပ်ႇဢူဝ်းငူပ်ႉငီႉၵၼ်သေ ႁူမ်ႈၵၼ်ႁႃလၢႆးၵႄႈလိတ်ႈ လႄႈ သိုပ်ႇၶတ်းၸႂ်ႁဵတ်းသၢင်ႈၵႂႃႇ တႃႇၵေႃႇတင်ႈလႆႈ မိူင်းႁူမ်ႈတုမ်ၾႅတ်ႇတရႄႇ တီႇမူဝ်ႇၶရေႇသီႇ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း