RCSS/SSA လႄႈ SAC ႁူပ်ႉထူပ်းဢုပ်ႇဢူဝ်းၵၼ် တီႈၼေႇပျီႇတေႃႇ

မိူဝ်ႈၼႆႉ ဝၼ်းထီႉ 29 August 2022 (လိူၼ်သိပ်းမႂ်ႇ 4 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ် 10:00 မူင်း တေႃႇထိုင် ယၢမ်းၵၢင်ဝၼ်း 11:45 မူင်း ၸုမ်းဢုပ်ႇဢူဝ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ ၸုမ်းဢုပ်ႇဢူဝ်း SAC ႁူပ်ႉထူပ်းဢုပ်ႇဢူဝ်း ၵၼ်တီႈပယိၼ်ႉၼွင်ႇယဵၵ်ႉတႃႇ ၼေႇပျီႇတေႃႇ ဝႃႈၼႆ။

ပၢင်ႁူပ်ႉထူပ်းဢုပ်ႇဢူဝ်းၵၼ်ပွၵ်ႈၼႆႉ ၽၢႆႇၶွင်ႇသီႇဢဝ်ၶိုၼ်းၸိုင်ႈတႆး (RCSS) ႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း ဢွၼ်ႁူဝ်သေ မီး ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း (1) RCSS/SSA လႄႈ ၸဝ်ႈသိုၵ်းလူင် သႅဝ်းႁၢၼ် ၽူႈၶဝ်ႈၵေႃၵမ်ၵၢၼ် ပွင်ၵၢၼ်လူင် (CEC) ၶိုၼ်ႈႁွတ်ႈဢုပ်ႇဢူဝ်းသေ ၽၢႆႇၶွင်ႇသီႇသိုၵ်းမၢၼ်ႈသမ်ႉ ႁူဝ်ပဝ်ႈ SAC ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ ဢွၼ်ႁူဝ်သေ မီး ၵႅမ်ၸွမ်ၸိၵ်း သိုၵ်းမၢၼ်ႈ ၸူဝ်းဝိၼ်း၊ ၸွမ်သိုၵ်းလူင် မျႃႉထုၼ်းဢူး၊ ၸွမ်သိုၵ်း မူဝ်းမျိၼ်ႉထုၼ်း လႄႈ ၸွမ်သိုၵ်း ယႃႇပျေႉ ၶိုၼ်ႈႁွတ်ႈဢုပ်ႇဢူဝ်းၵႂႃႇ ဝႃႈၼႆ။

ႁူဝ်ၶေႃႈဢုပ်ႇဢူဝ်းၵၼ်ၼၼ်ႉ 1. ၵၢၼ်ၵေႃႇတင်ႈမိူင်းႁူမ်ႈတုမ်ၾႅတ်ႇတရႄႇ၊ 2. ၵၢၼ်ငမ်းယဵၼ်လႄႈ ပၢင်ဢုပ်ႇဢူဝ်းၵၢၼ်မိူင်း၊ 3. ၵၢၼ်ၵႄႈပၼ်ႁႃၵူႈလွင်ႈလွင်ႈ ယၢမ်းလဵဝ် (လက်ရှိနိုင်ငံရေး အကျပ်အတည်း ဖြေရှင်းခြင်း)၊ 4. လွင်ႈမူႇပိူင်တီႇမူဝ်ႇၶရေႇသီႇ ပႃႇတီႇၸေးၸုင်ႇ၊ 5. ၵၢၼ်ၸွႆႈထႅမ်ၵူၼ်းမိူင်း၊ 6. ၵၢၼ်ပူၵ်းပွင်ပိုၼ်ႉတီႈ ၼႆယဝ်ႉ။

တႃႇတေႁူပ်ႉထူပ်းဢုပ်ႇဢူဝ်းၵၼ်ၼႆႉ မိူဝ်ႈဝၼ်းထီႉ 28 August 2022 ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း ဢွၼ်ဢဝ်လုၵ်ႈၸုမ်း RCSS/SSA သေ လုၵ်ႉတီႈဝဵင်းတႃႈၶီႈလဵၵ်း ၶိုၼ်ႈႁိူဝ်းမိၼ် ဢွၵ်ႇၶၢဝ်းတၢင်းၵႂႃႇတီႈ ၼေႇပျီႇတေႃႇ။

ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး (RCSS) ၵေႃႈ လႆႈပိုၼ်ၽၢဝ်ႇဝႆႉဝႃႈ လွင်ႈႁူပ်ႉထူပ်း ဢုပ်ႇဢူဝ်းၵၼ်ၼႆႉ တေပဵၼ်လွၵ်းလၢႆးလီသုတ်း တႃႇၵႄႈလိတ်ႈပၼ်ႁႃၵၢၼ်မိူင်း ယၢမ်းလဵဝ်လႄႈ တႃႇႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ၵၢၼ်ပိၼ်ႇပၢႆႇ ၵေႃႇသၢင်ႈ လွင်ႈယုမ်ႇယမ်ၵၼ်ၼၼ်ႉၵေႃႈ ဢမ်ႇမီးဢမ်ႇပဵၼ် ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း