RCSS/SSA ၸီႉသင်ႇၵူႈတပ်ႉ ၵူႈၼႃႈတီႈ ႁႂ်ႈၵိုတ်းယင်ႉ လွင်ႈၵဵပ်းသိုၵ်းမႂ်ႇတီႈၵူၼ်းမိူင်း ၸူဝ်ႈၶၢဝ်း

လူလွမ်တူၺ်းႁၼ်ထိုင် ပုၼ်ႈပၢင်ႈပေႃႈမႄႈၵူၼ်းမိူင်း ဢၼ်ယူႇသၢင်ႈၵိၼ်သဝ်း ၼႂ်းၸိုင်ႈတႆးသေ ယူႇတီႈလုမ်းပွင်ၵၢၼ်သိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆး (RCSS/SSA) လႆႈၸီႉသင်ႇၵူႈတပ်ႉၸုမ်း ၵူႈသၢႆသိုၵ်း ၵူႈၼႃႈတီႈ ႁႂ်ႈၵိုတ်းယင်ႉ လွင်ႈၵဵပ်းသိုၵ်းမႂ်ႇ တီႈၵူၼ်းမိူင်းဝႆႉၸူဝ်ႈၶၢဝ်း ၼႆယဝ်ႉ။

မိူဝ်ႈဝၼ်းထီႉ 3 September 2022 (လိူၼ်သိပ်းမႂ်ႇ 9 ၶမ်ႈ ပီႊတႆး 2116 ၼီႈ) ယူႇတီႈလုမ်းပွင်ၵၢၼ်သိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA)  ငဝ်ႈၸိုင်ႈလွႆတႆးလႅင်း လႆႈၸီ့သင်ႇၽူႈၵွၼ်းတပ်ႉ ၵူႈတပ်ႉၸုမ်း ၵူႈသၢႆသိုၵ်း ၵူႈၼႃႈတီႈဝႃႈ တင်ႈတႄႇဝၼ်းထီႉ 3 September 2022 ၼႆႉၵႂႃႇ ႁႂ်ႈၵိုတ်းယင်ႉ လွင်ႈၵဵပ်းသိုၵ်းမႂ်ႇဝႆႉၵမ်းလဵဝ် ဝႃႈၼႆ၊ ၼႂ်းၶေႃႈၸီႉသင်ႇ ဢၼ်မီး ၸွမ်ႁၢၼ် ၶိူဝ်းငိုၼ်း ၵႅမ်ႁူဝ်ပဝ်ႈ (2) RCSS လႄႈ ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆး (SSA) ပဵၼ်ၽူႈလူင်းလၢႆးမိုဝ်းၶေႃႈသင်ႇဝႆႉၼၼ်ႉ တႅမ်ႈဝႆႉဝႃႈ ၼင်ႇႁိုဝ် တေပဵၼ်ၵၢၼ်ယွမ်းယွၼ်ႇ ၵၢၼ်ႁၢပ်ႇၼၵ်းပႃးပၢၼ်ႈလူင် ပေႃႈမႄႈၵူၼ်းမိူင်းတႆးႁဝ်း၊ ၽွင်းယၢမ်းဝၼ်းမိူဝ်ႈၼႆႉ ၵူၼ်းမိူင်းႁဝ်းလႆႈထူပ်း တၢင်းယၢပ်ႇၽိုတ်ႇ ဝႆႉၵူႈၽၢႆႇၽၢႆႇ လႆႈၶၢမ်ႇတင်းၸုမ်းယိပ်းၵွင်ႈၵၢင်ႇၵူႈၸုမ်းၸုမ်းၶဝ် တဵၵ်းၵဵပ်းၶၢၼ်းၵိၼ် ၵမ်ႈၽွင်ႈသမ်ႉပေႃးယူႇဢမ်ႇလႆႈသေ လႆႈၸုၼ်ႉၶူဝ်းၶွင် ႁိူၼ်းယေး တိူၵ်ႇႁႆႈလွၵ်းၼႃး မႃႉလႃးဝူဝ်းၵႂၢႆး ပၢႆႈဢွၵ်ႇၼွၵ်ႈမိူင်းၵေႃႈ မီးတင်းၼမ်၊ ယွၼ်ႉၼၼ်လႄႈ ၼင်ႇႁိုဝ်ႁႂ်ႈပေႃႈမႄႈၵူၼ်းမိူင်းႁဝ်းၶႃႈ ပေႃးတေလႆႈႁဵတ်းႁႃၵိၼ် လဵင်ႉတွင်ႉၵႂႃႇမိူဝ်းၼႃႈ ၵတ်းၵတ်းယဵၼ်ယဵၼ်ၼၼ်ႉ ႁႂ်ႈၵူႈတပ်ႉၸုမ်း ၵူႈၼႃႈတီႈဢုပ်ႉပိူင်ႇ ၵိုတ်းယင်ႉၵၢၼ်ၵဵပ်းသိုၵ်းမႂ်ႇဝႆႉၵမ်းလဵဝ် ၼႆယဝ်ႉ။

ၵူၺ်းၵႃႈ သင်ၸိူဝ်ႉဝႃႈ မီးၽူႈမီးၼမ်ႉၸႂ်ႁၵ်ႉၸိူဝ်ႉၸၢတ်ႈ မီးၸေႇတၼႃႇ ၶႂ်ႈၶဝ်ႈၸွႆႈႁၢပ်ႇထၢမ်းၵၢၼ်ၸိူဝ်ႉၸၢတ်ႈယူႇ ပေႃးၼႆၸိုင် ယူႇတီႈၶွင်ႇသီႇဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တေပိုတ်ႇပၼ်တိုဝ်ႉတၢင်း ႁပ်ႉတွၼ်ႈ ၶဝ်ႈပဵၼ်သိုၵ်း (3) ပီႊ တေႃႇထိုင် သိုၵ်းလွၼ်ႉ ၸွမ်းၼင်ႇၵၢင်ၸႂ်ၸဝ်ႈၵဝ်ႇမီးၼၼ်ႉ ယူႇၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း