Social Media ပဵၼ်လၢပ်ႇသွင်ၶူမ်း ၽွၼ်းလီၽွၼ်းၸႃႉ ယူႇတီႈၵၢၼ်ၸႂ်ႉတိုဝ်း

Social Media ပဵၼ်  တူင်ႇဝူင်း Online  ဢၼ်ၵူၼ်းၵူႈၵေႃႉ ၸၢင်ႈပၼ် တၢင်းႁၼ်ထိုင်၊ ႁပ်ႉႁူႉၶၢဝ်ႇငၢဝ်း လႆႈလၢႆလၢႆမဵဝ်း လႆႈၶိုတ်းတၼ်းလုမ်ႈၾႃႉ ဢမ်ႇဝႃႈ ၵေႃႉၸႂ်ႉတိုဝ်းပဵၼ်ၽႂ် လုၵ်ႉတီႈလႂ်မႃးၵေႃႈယဝ်ႉ  ပေႃးဝႃႈမီး Social Media account ၵူႈမဵဝ်းမဵဝ်းၵေႃႈ ၸၢင်ႈၶဝ်ႈထိုင်ၶေႃႈမုၼ်းဢၼ်ႁဝ်းလူဝ်ႇၼၼ်ႉ ၵူႈဢၼ်။ ႁဝ်းတေႁၼ်လႆႈဝႃႈ Technology  ၶိုပ်ႈၼႃႈဝႆး ၽႃၵၼ်တင်း Social Media မႃး ဢမ်ႇၵိုတ်းဢမ်ႇယင်ႉ။  ၸိူင်ႉႁိုဝ်ၵေႃႈလီ ၵူႈလွင်ႈလွင်ႈၼႂ်းလုမ်ႈၾႃႉ ၼႆႉ မီးၽွၼ်းလီ လႄႈ ၽွၼ်းႁၢႆႉ ၵိုၵ်းၵၼ်မႃးယူႇ။ Social Media ၵေႃႈတေႃႈၼင်ႇၼၼ် တိုၼ်းမီး 2 ပိူင်ၼႆႉမိူၼ်ၵၼ် ယူႇတီႈဝႃႈ ၽႂ်ဢဝ်ၵႂႃႇၸႂ်ႉတိုဝ်းၸိူင်ႉႁိုဝ် ႁႂ်ႈလႆႈၽွၼ်းလီႁႃႉ ဢမ်ႇၼၼ် လႃႈလီႈၸႂ်ႉ ထိုင်တီႈလႆႈႁပ်ႉၽွၼ်းႁၢႆႉ ယွၼ်ႉမၼ်း ၼႆၼၼ်ႉၵူၺ်း ။

ၽွၼ်းလီ ဢၼ်လႆႈတီႈ ၵၢၼ်ၸႂ်ႉတိုဝ်း Social Media

ၸူဝ်ႈပႆႇၵႂႃႇတူၺ်း ၽွၼ်းႁၢႆႉၸႃႉမၼ်းၼၼ်ႉ ႁဝ်းမႃးတူၺ်း ၽွၼ်းလီ ဢၼ်ႁဝ်းလႆႈ တီႈၵၢၼ်ၸႂ်ႉတိုဝ်း Facebook, Line လႄႈ Social Network တၢင်ႇဢၼ်ၼႆႉၵွၼ်ႇဝႃႈ မီးသင်ၽွင်ႈ-

  1. လႆႈႁူႉၸၵ်းဢူၺ်းၵေႃႉၼမ် လၢႆၸၢဝ်းၶိူဝ်း

ဢမ်ႇယၢမ်ႈႁၼ်တူဝ်တေႉၵၼ်သေတႃႉ ယွၼ်ႉၵၢၼ်ၸႂ်ႉတိုဝ်းသေ ၸၢင်ႈႁဵတ်းႁႂ်ႈ ႁဝ်းလႆႈႁူႉၸၵ်းၵူၼ်းလႆႈ ၵူႈတီႈ ၵူႈမိူင်း ၵူႈၸၢဝ်းၶိူဝ်း လုၵ်ႉတီႈႁူႉၸၵ်းၼိူဝ် ဢွၼ်ႇလၢႆးသေ မၢင်ၵေႃႉပဵၼ်ဢူၺ်းလီၵၼ် ပဵၼ်ၸူႉၸူဝ်းၵၼ်ၵႂႃႇၵေႃႈ မီးတင်းၼမ်ယူႇ ။

Social Media ပဵၼ်လၢပ်ႇသွင်ၶူမ်း ၽွၼ်းလီၽွၼ်းၸႃႉ ယူႇတီႈၵၢၼ်ၸႂ်ႉတိုဝ်း

  1. ႁူႉၶိုတ်းတၼ်းလုမ်ႈၾႃႉ ၸဵမ်ၶၢဝ်ႇငၢဝ်း ပိူင်ပဵၼ် လွင်ႈလၢၵ်ႇလၢႆး။

မိူဝ်ႈၵူႈပွၵ်ႈ တၢင်ႇဝၢၼ်ႈတၢင်ႇဝဵင်း ၼႂ်းမိူင်းတႆးႁဝ်းၵူၺ်း တႃႇတေႁူႉဝႃႈ မီးလွင်ႈလၢၵ်ႇလၢႆးသင် ပေႃႇပဵၼ်မႃး ၶၢဝ်ႇငၢဝ်းမႂ်ႇမႂ်ႇမီးသင် ၽႂ်ႁဵတ်းသင်ယူႇ ၸိူဝ်းၼႆႉ ၽိူဝ်ႇၸူဝ်ႈတေႁူႉတေငိၼ်းမၢင်လွင်ႈ ၵူၼ်းၼႂ်းဝၢၼ်ႈဢၼ်ပဵၼ် ယူႇၼၼ်ႉ ပေႃးလိုမ်းဝွႆးဝွႆးယဝ်ႉႁဝ်းၸင်ႇႁူႉ မိူဝ်ႈလဵဝ်တႄႉ တီႈလႂ်ပဵၼ်သင် ႁူႉႁၼ်လႆႈၸွမ်းၵမ်းလဵဝ် တူဝ်ႈတင်းလုမ်ႈၾႃႉ။

  1. Media Network ပဵၼ်တီႈသွၵ်ႈႁႃႁဵၼ်းႁူႉ ပိုၼ်ႉႁူႉပၢႆးႁၼ်မႂ်ႇမႂ်ႇ

တူဝ်ယၢင်ႇ ၵူၼ်းဢၼ်ဢမ်ႇယၢမ်ႈႁဵတ်းၶဝ်ႈၽၵ်း ႁဵတ်းႁိုဝ်ႁဵတ်းၶဝ်ႈၽၵ်းဝၢၼ်၊ သင်ထူပ်းၺႃးၽေးသၽႃႇဝ မဵဝ်းလႂ်ထုၵ်ႇလီဢဝ်တူဝ်လွတ်ႈၼင်ႇႁိုဝ်၊ ဢမ်ႇယၢမ်ႈၶိုၼ်ႈႁူင်းႁဵၼ်းဢင်းၵိတ်ႉ ၵွပ်ႈသင်လႄႈၶႅၼ်ႇလိၵ်ႈဢင်းၵိတ်ႉ၊ လၢႆးလုမ်းလႃးလုၵ်ႈဢွၼ်ႇ တႃႇမႄႈလုၵ်ႈဢွၼ်ႇမႂ်ႇၸိူဝ်းၼႆႉ မိူဝ်ႈလဵဝ် ႁႃလႆႈၼႂ်း Network ၼႂ်း Media လႆႈၵမ်းလဵဝ် သွၼ်ႇႁႂ်ႈ မေႃလိၵ်ႈ မီးၾူၼ်း မီးၶွမ်ႇပိဝ်ႇတိူဝ်ႇ လႄႈ ဢိၼ်ႇတိူဝ်ႇၼႅတ်ႉ။

  1. လႆႈလူင်းမိုဝ်းႁဵတ်းသၢင်ႈၵၢၼ်ငၢၼ်း လွင်ႈမႂ်ႇမႂ်ႇဢၼ်လီသူၼ်ၸႂ် ႁူမ်ႈၵူၼ်းၼမ် ၸဵမ်ၵႆၸဵမ်ၸမ်

ၽူႈလူလိၵ်ႈႁဝ်းၶဝ်တေႁၼ်ၵၼ်ယူႇ မိူဝ်ႈလဵဝ်မီးမႃး App ႁဵၼ်းလိၵ်ႈသွၼ်လၢႆး၊ သွၼ်ၵၢၼ်တူဝ်ထူပ်း၊ သွၼ်ႁွင်ႉၵႂၢမ်း၊ လဵၼ်ႈႁႅင်း ဢိၵ်ႇထႅင်ႈၼမ်လၢႆ လိူဝ်သေၼၼ်ႉ မိူၼ်ၼင်ႇ ယူႇၵေႃႉမိူင်းမိူင်းသေ ႁွင်ႉၵႂၢမ်းၸွမ်းၵၼ်၊ ယူႇၵႆၵၼ်ၵေႃႉသိၵ်ႈၵမ်ႇၽႃႇသေ ၶိုၼ်ႈပၢင်ၵုမ်ႁူမ်ႈၵၼ်ၼိူဝ်ဢွၼ်ႇလၢႆး ၸိူဝ်းၼႆႉ။

  1. မီးငိုၼ်းၶဝ်ႈလူၺ်ႈလွင်ႈႁဵတ်းသၢင်ႈၼိူဝ်ဢွၼ်ႇလၢႆး။

လၢႆးလႆႈငိုၼ်းၶဝ်ႈ ယွၼ်ႉၵၢၼ်ၸႂ်ႉတိုဝ်း Social Network ၼႆႉ မၢင်ၸိူဝ်း ၵႃႉၶၢႆၶူဝ်းၶွင်၊ ႁပ်ႉပဵၼ်ၵူၼ်းႁဵတ်းပၼ်ၵၢၼ်ၵႄႈၵၢင်ၵူၼ်းသိုဝ်ႉၵူၼ်းၶၢႆ (Agent)၊  ဢူၼ်းငိုၼ်းလႅၵ်ႈငိုၼ်း၊ တႅမ်ႈလိၵ်ႈ၊ youtuber ၊ ၵူၼ်းတူၺ်း လႄႈ ၸွႆႈတဵၵ်း Like, Shere  ၶရိပ်ႉဢၼ်ပိူၼ်ႈႁဵတ်းတၢင်ႇ၊ ၵူၼ်းပိုၼ်ၽၢဝ်ႇၵဵမ်းၸိူဝ်းၼႆႉ  ၸၢင်ႈလႆႈငိုၼ်းၶဝ်ႈယွၼ်ႉမၼ်းယူႇ သင်မေႃႁဵတ်းမေႃဝၢင်းၽႅၼ်လီလီ ၸဵမ်ၸဝ်ႈႁူင်းၵၢၼ် မုၵ်ႉၸုမ်းလၢႆလၢႆဢၼ်ၵေႃႈ ၸႂ်ႉပဵၼ်သဵၼ်ႈတၢင်းၵၢတ်ႇၵႃႉၶၢႆ သဵၼ်ႈမႂ်ႇလႆႈယူႇမိူၼ်ၵၼ်။

  1. လူတ်းယွမ်းၵႃႈၸႂ်ႉၸၢႆႇလၢႆလၢႆပိူင်

ႁႃငိုၼ်းလႆႈၵူၺ်းဢမ်ႇၵႃး ၵႃႈၸႂ်ႉၸၢႆႇၵေႃႈယွမ်းလူင်း မိူၼ်ၼင်ႇ ၵႃႈလူတ်ႉၵႃႈၵႃး ဢၼ်ဢမ်ႇၵိုင်ႇသဵင်ႈ၊ ၵႃႈတိတ်းတေႃႇၵပ်းသၢၼ်ၶၢမ်ႈမိူင်း (မိူဝ်ႈဢွၼ်တၢင်းတႄႉ တႃႇလႆႈငိၼ်းသဵင်ၵၼ်ၼၼ်ႉ လႆႈသဵင်ႈၵႃႈလူတ်ႉၵႃး ၵႃႈႁိူဝ်း ၸင်ႇၵႂႃႇၸူးၵၼ်သေ ႁၼ်ၼႃႈၵၼ်လႆႈ ဢၼ်ငၢႆႈလိူဝ်ၼၼ်ႉသမ်ႉ သိုပ်ႇၾူၼ်းႁႃၵၼ်သေ ဢုပ်ႇဢူဝ်းထွမ်ႇသဵင်ၵၼ် လႆႈသဵင်ႈငိုၼ်းၾူၼ်း ၼင်ႇၵဝ်ႇ)  ၵႃႈသိုဝ်ႉပပ်ႉ ယွၼ်ႉၼိူဝ်ဢွၼ်ႇလၢႆးပိူၼ်ႈတၢင်ႇဝႆႉယူႇ၊ ၵႃႈၶိုၼ်ႈႁဵၼ်းမၢင်ၸိူဝ်ႉမၢင်ပိူင်။ ၵႃႈတူၺ်းငဝ်းတူင်ႉ ၸိူဝ်းၼႆႉ ၵမ်ႈၼမ် ပိူၼ်ႈတၢင်ႇဝႆႉၼိူဝ်ဝႅပ်ႉသၢႆႉယူႇလႄႈ ဢမ်ႇလႆႈၵႂႃႇႁႃသိုဝ်ႉ ဢမ်ႇလႆႈသဵင်ႈငိုၼ်းသိုဝ်ႉယဝ်ႉ လႆႈဝႃႈ ၵႃႈၸႂ်ႉၸၢႆႇလၢႆၸိူဝ်ႉလၢႆပိူင် လူတ်းလူင်းၵႂႃႇၼမ်တေႉတေႉ။

  1. ၵပ်းသိုပ်ႇၵပ်းသၢၼ်ၵၼ် ၶိုတ်းတၼ်းဝႆးၽၢႆ

ငိၼ်းၵူၼ်းထဝ်ႈလၢတ်ႈဝႃႈ ပၢၼ်ၵူႈပွၵ်ႈၼၼ်ႉ ၽူဝ်ၽၢတ်ႇႁိူၼ်းၵႂႃႇႁဵတ်းၵၢၼ် ၵႆၵႆ တေသူင်ႇၶၢဝ်ႇငၢဝ်းပၼ်လုၵ်ႈမေးတၢင်းႁိူၼ်းၼၼ်ႉ လႆႈတႅမ်ႈပဵၼ်လိၵ်ႈ ꧤၢၵ်ႇၶေႃႈၵႂၢမ်းပိူၼ်ႈဢဝ်ၼၼ်ႉ လႆႈၸႂ်ႉၶၢဝ်းယၢမ်းႁိုင်ဝႃႈႁိုင် မၢင်ပွၵ်ႈသမ်ႉ ဢဝ်ႁၢႆလၢႆပႅတ်ႈပွတ်းတၢင်းဢမ်ႇထိုင်ႁိူၼ်းၵေႃႈမီးၼမ် မိူဝ်ႈလဵဝ်တႄႉ ဢမ်ႇမိူၼ်ၵူႈပွၵ်ႈယဝ်ႉ ၶႂ်ႈဢုပ်ႇၽႂ်ၶႂ်ႈႁၼ်ၼႃႈၽႂ် သွၼ်ႇႁႂ်ႈမီးၾူၼ်း မီးဢိၼ်ႇတိူဝ်ႇၼႅတ်ႉ တင်းသွင်ၽၢႆႇ တိုၼ်းၵပ်းသိုပ်ႇၵၼ်လႆႈ ၶိုတ်းတၼ်း ဝႆးၽၢႆၼႃႇ ငိုၼ်းၵေႃႈဢမ်ႇသဵင်ႈၼမ်ပဵင်းၵူႈပွၵ်ႈ၊ ၵၢၼ်ၵေႃႈၸဵဝ်းယဝ်ႉ လွင်ႈၶွင်ႉၶမ်ဢေႇ။

  1. ၸၢင်ႈၸႂ်ႉပဵၼ်ဢွင်ႈတီႈပိုၼ်ၽၢဝ်ႇ လၢႆလၢႆပိူင်။

ၸဵမ်ၶၢဝ်ႇငၢဝ်း လွင်ႈလၢၵ်ႇလၢႆး လွင်ႈႁဵတ်းသၢင်ႈ လွင်ႈၾၢင်ႉၽေး ပၼ်တၢင်းႁူႉတၢင်းႁၼ် ဢမ်ႇၼၼ် လွင်ႈမူၼ်ႈလွင်ႈတုၵ်ႉ ဢၼ်ႁဝ်းလႆႈႁူပ်ႉထူပ်း၊ လွင်ႈၼႃႈႁိူၼ်း လွင်ႈလမ်ႇလွင်ႈဢၼ်ႁဝ်းၶႂ်ႈၵဵပ်းဝႆႉ ပဵၼ်တီႈမၢႆတွင်းၸိူဝ်းၼႆႉ ၸၢင်ႈပိုၼ်ၽၢဝ်ႇဝႆႉၼိူဝ်ဢွၼ်ႇလၢႆး မၼ်းတေဢမ်ႇႁၢႆၵႂႃႇပႅတ်ႈႁဝ်းတၢင်းလႂ်။

  1. လူတ်းလွင်ႈသုၵ်ႉၸႂ် ၊ သၢင်ႈလွင်ႈသိူဝ်းၸႂ်။

ဢၼ်ၶႃႈႁဝ်းၵျိူၵ်ႈၸႂ်ၼႃႇၼႆႉ လွင်ႈပၼ်တၢင်းသိူဝ်း လွင်ႈဢဝ်ပဵၼ်ယႃႁိူဝ်ႉမွႆႈ ၶီငဝ်ႁၢႆ လူၺ်ႈၵၢၼ်တူၺ်းၸိူင်း ထွမ်ႇၵႂၢမ်း တူၺ်းႁုၼ်ႉၼူဝ် ဢိၵ်ႇပႃး လူလိၵ်ႈ တူၺ်းၸိူင်းဢၼ်ပၼ်တၢင်းႁူႉတၢင်းႁၼ် တၢင်းၶႆႈၸႂ်ႁဝ်းၼၼ်ႉယဝ်ႉ မီးၸဵမ်ၼႂ်း YouTube, Facebook, line, TikTok လႄႈ Application တၢင်ႇဢၼ်ထႅင်ႈ။

  1. ၽိူမ်ႉၼမ်ႉၵတ်ႉ ၵၢၼ်ႁႃလဵင်ႉတွင်ႉ

ယႃႇထၢင်ႇဝႃႈဢမ်ႇမီးၵၢၼ်ၽိူမ်ႉၼမ်ႉၵတ်ႉၵၢၼ်ႁႃလဵင်ႉတွင်ႉ ယွၼ်ႉၸႂ်ႉတိုဝ်း Social Network ၵမ်ႈၽွင်ႈ ဢမ်ႇမီးၵၢၼ်ႁဵတ်းႁႃလဵင်ႉတွင်ႉ တူၺ်းၼႂ်း YouTube သေယိူင်ႈၸွမ်း လိုၼ်းသုတ်း လႆႈလီလႆႈပဵၼ်ၵႂႃႇၵေႃႈမီးတင်းၼမ်။ ယူႇတီႈတၢင်းၶတ်းၸႂ် ယူႇတီႈထၢၼ်ႈၸႂ်ႁဝ်း ၶႂ်ႈၶိုၼ်ႈယႂ်ႇမွၵ်ႈႁိုဝ်ၼၼ်ႉၵူၺ်း ၸိူင်ႉၵႂၢမ်းပိူၼ်ႈဝႃႈ တိၼ်မိုဝ်းပဵၼ်ၶႃႈတွင်ႉ ၽႂ်ဢမ်ႇႁွင်ႉပၼ်လၢႆ ၼႆၼၼ်ႉယဝ်ႉ။

ၽွၼ်းၸႃႉ ဢၼ်လႆႈမႃးတီႈ ၵၢၼ်ၸႂ်ႉတိုဝ်း Social Media

ႁူဝ်ၶေႃႈပိုၼ်ႉႁူႉႁူဝ်ၼႆႉၵေႃႈလၢတ်ႈဝႆႉယူႇဝႃႈ ပဵၼ်လၢပ်ႇသွင်ၶူမ်း မီးၽွၼ်းလီ မီးၽွၼ်းၸႃႉၼင်ႇၵၼ် လဵၼ်ႈယဝ်ႉတေပၼ်ၽွၼ်းလီႁႃႉ ပၼ်ၽွၼ်းႁၢႆႉၸႃႉၵူၼ်းၸႂ်ႉတိုဝ်းမၼ်းၼႆၼၼ်ႉ ယူႇတီႈလွင်ႈဢၼ်ႁဝ်း ၸႂ်ႉမၼ်းၵူၺ်းလႄႈ မႃးတူၺ်းဝႃႈ ၸၢင်ႈပၼ်ၽေးၸိူင်ႉႁိုဝ်ၽွင်ႈ-

  1. ၵုမ်ႇသူၼ်ၸႂ်ၸွမ်းပူၼ်ႉတီႈသေ လူႉၵၢၼ်လူႉငၢၼ်း

ၵူၼ်းႁဝ်းမၢင်ၸိူဝ်း တိတ်းၸပ်း Social Media ႁႅင်းပူၼ်ႉတီႈ လႄႈ ႁဵတ်းသင်ယူႇၵေႃႈ ၸႂ်ၸပ်းဝႆႉ ၼႂ်းၾူၼ်းၼႂ်းၶွမ်ႇပိဝ်ႇတိူဝ်ႇၵူၺ်း ႁဵတ်းသင်ဢမ်ႇယဝ်ႉဢမ်ႇတူဝ်ႈ ဢမ်ႇပႃးၸႂ်ပႃးၶေႃး ဢမ်ႇထိုင်တီႈထိုင်တၢင်း ႁဵတ်းႁႂ်ႈလူႉသုမ်းၼႃႈၵၢၼ်၊ သုမ်းၵၢၼ်ႁဵၼ်းၸွမ်းမၼ်း ယွၼ်ႉၼၼ်လႄႈ ထုၵ်ႇလီလဵၼ်ႈႁႂ်ႈၵိုင်ႇငၢမ်ႇ။

  1. ၵၢၼ်ၵပ်းသိုပ်ႇၵပ်းသၢၼ်ၸွမ်းၵူၼ်းႁိမ်းႁွမ်းလူတ်းယွမ်းႁႅင်း

ၵွပ်ႈၵုမ်ႇၵပ်းသိုပ်ႇၵပ်းသၢၼ်ၸွမ်း ၵူၼ်းၼႂ်းဢွၼ်ႇလၢႆးၵူၺ်းလႄႈ ဢမ်ႇသူၼ်ၸႂ်ၵူၼ်းႁိမ်းႁွမ်း ဢၼ်ယူႇၼႂ်းၽဝတေႉတေႉႁဝ်း၊ လိုၼ်းသုတ်း လွင်ႈၸမ်ၸႂ် လွင်ႈၵပ်းသိုပ်ႇၵပ်းသၢၼ်တင်း ၵူၼ်းႁိမ်းႁွမ်း လူတ်းယွမ်းဢေႇမႃး ယဵၼ်းပဵၼ်ၵူၼ်းဢမ်ႇၶဝ်ႈဢွၵ်ႇတူင်ႇဝူင်းၵူၼ်းပႅတ်ႈ ၼႃႈၵၢၼ်ၸၢင်ႈလုတ်ႈႁၢမ်းယွၼ်ႉမၼ်းလႆႈ ဢူၺ်းၵေႃႉၸမ်ၸႂ် ဢၼ်ၸႂ်ယႂ်ႇလႆႈၼၼ်ႉ ဢမ်ႇမီးယဝ်ႉ။

  1. ဢမ်ႇၶတ်းၸႂ်ၶူင်သၢင်ႈဝူၼ်ႉဢွၵ်ႇမႃး ပၢႆးဝူၼ်ႉၶိုၵ်ႉၶိုၵ်ႉလႄႈ ၼမ်ႉၵတ်ႉတေၸၢင်ႈလူတ်းယွမ်း ၸိူင်ႉထိူင်းၵႂႃႇ။

ဢၼ်ပိူၼ်ႈတၢင်ႇဝႆႉၼၼ်ႉ မီးၶေႃႈမုၼ်းၸေႉၸုင်ႇ လူဝ်ႇသင် ႁႃဢဝ်မႃးၸႂ်ႉလႆႈၵမ်းလဵဝ် ႁဵတ်းႁႂ်ႈၵူၼ်းႁဝ်းဢမ်ႇဝူၼ်ႉဢွၵ်ႇမႃး တၢင်းႁူႉမႂ်ႇမႂ်ႇ လၢႆးႁဵတ်းသၢင်ႈ တၢင်းႁၼ်ထိုင်ဢၼ်လၢၵ်ႇလၢႆးသင်ယဝ်ႉလႄႈ လုၵ်ႉတီႈပဵၼ်ၵူၼ်းဢွၵ်းဢေႃလႅတ်း ယဵၼ်းပဵၼ်ၵူၼ်းဢွၵ်းထိုင်ႉၵႂႃႇ ၵမ်းလွႆးလွႆးယူႇယဝ်ႉ။ ဢၼ်ၼႆႉလီၵူဝ်လိူဝ်သေပိူၼ်ႈသုတ်း ၼႂ်းၽွၼ်းႁၢႆႉၸႃႉ ၵၢၼ်ၸႂ်ႉတိုဝ်းၾူၼ်း ယိုင်ႈပဵၼ်ၼႂ်းပၢၼ်လုၵ်ႈဢွၼ်ႇ ၽွင်းလူဝ်ႇႁုၼ်ႈမုၼ်းၼၼ်ႉ ယိုင်ႈလႆႈႁပ်ႉၽွၼ်းယွၼ်ႈႁၢႆႉႁႅင်းတေႉတေႉ။

Social Media ပဵၼ်လၢပ်ႇသွင်ၶူမ်း ၽွၼ်းလီၽွၼ်းၸႃႉ ယူႇတီႈၵၢၼ်ၸႂ်ႉတိုဝ်း

  1. တေယဵၼ်းပဵၼ်ၵူၼ်းဢၼ် ၵျိူၵ်ႈတုၵ်းယွၼ်း ႁႂ်ႈပိူၼ်ႈသူၼ်ၸႂ်ၸဝ်ႈၵဝ်ႇ ၵႂႃႇပႅတ်ႈ

ၵွပ်ႈဝႃႈ ၽွင်းႁဝ်းလဵၼ်ႈ Social Media, Social Network ၼၼ်ႉ တေတၢင်ႇ ၶႅပ်းႁၢင်ႈ ၶေႃႈၵႂၢမ်း Video ဢၼ်ႁႂ်ႈပိူၼ်ႈမႃးတဵၵ်း ၵျိူၵ်ႈၸႂ် တဵၵ်းပၼ်တၢင်းႁၼ်ထိုင် တဵၵ်းသိုပ်ႇပိုၼ်ၽႄႈ ပၼ်ၵူၺ်းလႄႈ ႁိုင်မႃး ၼႂ်းၽဝတေႉႁဝ်းၵေႃႈ တေယဵၼ်းပဵၼ်ၵူၼ်းဢၼ် ၶႂ်ႈႁႂ်ႈပိူၼ်ႈသူၼ်ၸႂ်  ပိူၼ်ႈၸွမ်းၸႂ် ၶႂ်ႈႁႂ်ႈပိူၼ်ႈဢဝ်တၢင်းႁၼ်ထိုင်ႁဝ်းဝႃႈၵူႈပွၵ်ႈၵႂႃႇပႅတ်ႈ။   တၢင်းယၢမ်ႈၸိူင်ႉၼႆ ၽႂ်ၵေႃႈဢမ်ႇၵျိူၵ်ႈလႄႈ လိုၼ်းသုတ်း တေဢမ်ႇမီးၽႂ်ၶႂ်ႈလဵၼ်ႈၵေႃႉ ၶႂ်ႈႁဵတ်းၵၢၼ်ႁူမ်ႈႁဝ်း။

  1. လိူင်းၸိူင်းၸႂ်ႁၢဝ်ႈ ၸႂ်ဝႆး ဢမ်ႇမီးလွင်ႈယိူၼ်ႉၵၼ်ႈ

လွင်ႈတၢင်း လွင်ႈႁဵတ်းသၢင်ႈ ဢၼ်ပိူၼ်ႈတၢင်ႇၼိူဝ် Social Midea, Social Network  ၼၼ်ႉ မီးၵူႈမဵဝ်း ၸဵမ်လီဢိၵ်ႇၸႃႉ ၵူၼ်းႁဝ်းႁၼ်ယဝ်ႉ‌​​မေႃယိူင်ႈၸွမ်း‌ ဢၼ်ယိူင်ႈၸွမ်းလွင်ႈလီသေ လႆႈလီလႆႈပဵၼ်ၵႂႃႇ ၵေႃႈမီးယူႇ ၵူၺ်းၵႃႈ ၵမ်ႈဢေႇ။ လွင်ႈဢမ်ႇလီသမ်ႉ မီးၵူၼ်းယိူင်ႈၸွမ်းၼမ် မိူၼ်ၼင်ႇ မၢင်ၵေႃႉ ပဵၼ်ၵူၼ်းမိူၵ်ႈမႂ်ႈ လိူင်းၸိူင်း ၽူႈလၵ်ႉၵူၼ်းၸူၼ် ဢိၵ်ႇ ၵူၼ်းဢဝ်ၸႂ်ၸဝ်ႈၵဝ်ႇဝႃႈၼၼ်ႉ  ၶဝ်ယိူင်ႈၼႂ်းၼင်ၼႂ်းၸိူင်း ၼႂ်းဢၼ်ပိူၼ်ႈတၢင်ႇဝႆႉၼၼ်ႉ ၵမ်ႈၼမ်ဢမ်ႇၸႂ်ႈႁိုဝ်၊ လွင်ႈၼိုင်ႈသမ်ႉ  ၶႂ်ႈတူၺ်းသင် ႁႃလႆႈဝႆးၼႃႇ ဢမ်ႇလႆႈပႂ်ႉ၊ လွင်ႈၼႆႉ ပဵၼ်ပၼ်ႁႃယႂ်ႇလူင် ဢၼ်ႁဵတ်းႁႂ်ႈၵူၼ်းႁဝ်း မီးၸႂ်ႁၢဝ်ႈ ၸႂ်ဝႆး ဢမ်ႇမီးလွင်ႈယိူၼ်ႉၵၼ်ႈ ၼိူသ်ၵူၼ်းတၢင်ႇၵေႃႉ။

  1. ၶၢၼ်ႉဢိူၼ်

ၵုမ်ႇမိုင်ႉလဵၼ်ႈ Social Midea, Social Network ၵူၺ်း ဢမ်ႇသူၼ်ၸႂ် ႁဵတ်းသၢင်ႈၼႃႈၵၢၼ်တႃငၢၼ်း ပိုၼ်ႉပွႆႇလွင်ႈယူႇသဝ်းၵိၼ်ယႅမ်ႉ ဢမ်ႇပူၵ်းပွင် ၼမ်ႉၵတ်ႉ၊ ဢမ်ႇပူၵ်းပွင်ၼႃႈႁေႃတေႃႁိူၼ်း  ၶႂ်ႈႁူၵ်ႉႁၢမ်းဝူၺ်ႇႁင်ႈ ၸိူင်ႉႁိုဝ်ၵေႃႈယဝ်ႉ ဢမ်ႇသူၼ်ၸႂ် လွင်ႈၵႂၢမ်း‌သေႉၵႂၢမ်းၼေး၊ လႆႈၵိၼ်ၵေႃႈၵိၼ် ဢမ်ႇလႆႈၵိၼ်ၵေႃႈယိူၼ်ႉဢဝ် လိုၼ်းသုတ်း ၸၢင်ႈပႃးၵၼ်ဢိုပ်းယွၼ်ႉမၼ်းလႆႈၵွၼ်ႇယဝ်ႉ။

  1. ၼႃႈႁိူၼ်းလူႉ

တေလႆႈႁၼ်ယူႇ ၼႃႈႁိူၼ်းမၢင်ဢၼ် လႆႈလူႉၵႂႃႇယွၼ်ႉၵၢၼ်ၸႂ်ႉတိုဝ်း Social Midea, Social Network သေ ၵမ်ႈၽွင်ႈဢမ်ႇသူၼ်ၸႂ်ၵူၼ်းၼႂ်းၼႃႈႁိူၼ်း ၶၢၼ်ႉဢိူၼ်၊  ၸႂ်ႉလၢႆးႁုၵ်းႁၢႆႉတေႃႇၵၼ် ဢိၵ်ႇတင်း မၢင်ၵေႃႉမေႃဢုပ်ႇၵဝ်း ၸူႉၸူဝ်းၼိူဝ်ဢွၼ်ႇလၢႆးၼၼ်ႉ ၸၢင်ႈႁဵတ်းႁႂ်ႈၼႃႈႁိူၼ်းလူႉ ယူႇယဝ်ႉ။

  1. ဢမ်ႇမီးလွင်ႈသုၼ်ႇတူဝ်

မီးၽူႈယႂ်ႇၵေႃႉၼိုင်ႈလၢတ်ႈဝႃႈ တႆးႁဝ်းၼႆႉ ပေႃးၶႂ်ႈႁူႉလွင်ႈလပ်ႉၶဝ် ႁႂ်ႈတူၺ်းၼိူဝ်ဢွၼ်ႇလၢႆး ၼႆ မႅၼ်ႈတေႉ၊ ယွၼ်ႉလွင်ႈသုၼ်ႇတူဝ် ၸဵမ်လွင်ႈလဵၵ်ႉလွင်ႈယႂ်ႇ လွင်ႈတုၵ်ႉလွင်ႈသိူဝ်း၊ ႁဵတ်းသင် မိူဝ်ႈလႂ် ၸွမ်းၽႂ် ၊ ဢိၵ်ႇတင်း လွင်ႈၵၢၼ်ငၢၼ်းၸဝ်ႈၵဝ်ႇၵေႃႈတၢင်ႇၼိူဝ်ဢွၼ်ႇလၢႆး ႁဵတ်းႁႂ်ႈပိူၼ်ႈႁၼ်ၶေႃႈမုၼ်းႁဝ်း ၵႂၢမ်းလပ်ႉႁဝ်း၊ လွင်ႈၼႆႉ ဢမ်ႇထုၵ်ႇလီပဵၼ် ယွၼ်ႉၸၢင်ႈဢဝ်ၽေးၶဝ်ႈမႃးၼႂ်းၽဝႁဝ်းယဝ်ႉ။

  1. လႆႈႁပ်ႉၽေးၶဵၼ် လူၺ်ႈဢမ်ႇႁူႉတူဝ်

ဢမ်ႇလူဝ်ႇႁႃၵႆ ဢမ်ႇလူဝ်ႇတူၺ်းၵႆ တူၺ်းဢဝ်မိူင်းႁဝ်း မၢင်ၵေႃႉ လဵၼ်ႈၾူၼ်းလဵၼ်ႈသင်သေ တၢင်ႇၶေႃႈၵႂၢမ်း တၢင်ႇ Location ႁဝ်းလႄႈ ပိူၼ်ႈႁၼ်ယဝ်ႉ ၸၢင်ႈႁဵတ်းႁၢႆႉႁဝ်းလႆႈ။ မိူၼ်ၼင်ႇ လၵ်ႉတီႉၺွပ်း လၵ်ႉပႂ်ႉပေႃႉထုပ်ႉ ၵၼ်ႉၸၼ်လူလၢႆ ဢဝ်တၢႆ မိူင်းႁဝ်းၼမ်ပိူဝ်ႇလိူဝ်ႉ၊ လၢႆးၼိုင်ႈသမ်ႉ လူင်းတိုၼ်းလၢင်းၸွမ်းပိူၼ်ႈတၢင်းဢွၼ်ႇလၢႆး မိူဝ်ႈတႄႇတႄႉ လႆႈငိုၼ်းၸွမ်းတေႉ သေတႃႉ ႁိုင်မႃးပေႃးႁဝ်းလူင်းတိုၼ်းၼမ် မီးၵူၼ်းသႂ်ႇငိုၼ်းၼမ်ၼႆ ပိူၼ်ႈလႅၼ်ၵိၼ်ငိုၼ်းႁဝ်းသေ ပလွၵ်ႉပႅတ်ႈႁဝ်း၊ ႁဝ်းသမ်ႉဢမ်ႇၸၢင်ႈၸွမ်းၶႆႈတၢင်းလႂ် သုမ်းပႅတ်ႈလၢႆလၢႆ၊ ၵမ်ႈၽွင်ႈ ၺႃးပိူၼ်ႈ ႁႅၵ်ႉၶေႃႈမုၼ်းသုၼ်ႇတူဝ်ဢၼ်လပ်ႉလပ်ႉႁဝ်း  ဢဝ်ၶေႃႈမုၼ်းၼၼ်ႉ ၵႂႃႇႁဵတ်းလွင်ႈဢမ်ႇလီ လိုၼ်းသုတ်းႁဝ်းသမ်ႉ ပဵၼ်ၵေႃႉၺႃးၵိၼ်တၢင်းၽိတ်း မၼ်းၼၼ်ႉယဝ်ႉ။ ၵွပ်ႈၼၼ် ယႃႇပေတၢင်ႇ လွင်ႈသုၼ်ႇတူဝ် လွင်ႈလပ်ႉႁဝ်း ၼိူဝ်ဢွၼ်ႇလၢႆး၊ ႁႂ်ႈမေႃၸႂ်ႉ ယႃႇႁႂ်ႈပဵၼ်ဝႃႈ ၶူမ်းၼိုင်ႈၶႄတူဝ် ၶူမ်းၼိုင်ႈ ထိူဝ်တူဝ် ယွၼ်ႉဢွၼ်ႇလၢႆး။

  1. သုမ်းၶၢဝ်းယၢမ်း

ဢၼ်လီၶေႃးၶူမ်ၼႆႉ ၵမ်ႈၽွင်ႈ သုမ်းၶၢဝ်းယၢမ်းပႅတ်ႈလၢႆ ပူၼ်ႉၵႂႃႇပဵၼ်ဝၼ်း ပဵၼ်ဝၼ်း ယွၼ်ႉ Social media မိူၼ်ၼင်ႇ တူၺ်းၼင် ၸိူင်း လဵၼ်ႈၵဵမ်း ဢိၵ်ႇလၢႆလၢႆမဵဝ်း ဢမ်ႇဝူၼ်ႉႁၢင်ႈႁႅၼ်း တႃႇႁပ်ႉမိုဝ်းၸွမ်းၽဝမိူဝ်းၼႃႈသင် ၽႂ်လၢတ်ႈၵေႃႈဢမ်ႇထွမ်ႇ ၵူၺ်းဢမ်ႇၵႃး ယင်းၸႂ်လမ်ပႃးၵေႃႉလၢတ်ႈႁဝ်း ၵေႃႉၶတ်းၸႂ်မူၼ်ႉမႄးႁဝ်း သေယဝ်ႉ ၵွပ်ႈၸႂ်ႉသေသုမ်းလူင်ၵႂႃႇၵူႈမဵဝ်း သုမ်းငိုၼ်း သုမ်းၶၢဝ်းယၢမ်း သုမ်းတိုဝ်ႉတၢင်းလီ ဢၼ်တေၶဝ်ႈမႃးၸူးႁဝ်း ယူႇယဝ်ႉ။

  1. ပၢႆးယူႇလီလူႉ

ဢၼ်ထီႉၼိုင်ႈၼႆႉ ပဵၼ်တႃ၊ တႃႁဝ်းလႆႈၸိုၼ်ႇတူၺ်းၾႆးၼႃႈၾူၼ်း၊ ၼႃႈၶွမ်ႇပိဝ်ႇတိူဝ်ႇ၊ ၼႃႈ TV ႁိုင်ႁိုင်လႄႈ တႃတေႁႅင်ႈ တေလႅင် တေၶူမ်းမႃး ဝၢႆးၼၼ်ႉသမ်ႉ ယဵၼ်းပဵၼ်တႃၽႃႈ တႃမူဝ်း တႃလၢႆး ဢိၵ်ႇတင်း သမႃႇထိပွတ်း လိူဝ်ၼၼ်ႉ မီးထႅင်ႈတၢင်းပဵၼ်လၢႆလၢႆဢၼ် ၸဵမ်ႁူင်းၶဝ်ႈၸဵပ်း ႁူဝ်ၶႆႈႁူဝ်ၸီး ႁူဝ်မဝ်း ႁႅင်းဢူၼ်ႈ လိူတ်ႈၶိုၼ်ႈ လမ်းသႆႈၸဵပ်းယဵၼ်းၸိူဝ်းၼႆႉ ဢၼ်ဢမ်ႇလႆႈလၢတ်ႈမီးထႅင်ႈတင်းၼမ်။

ဢၼ်ၼႆႉ ပဵၼ်ၽွၼ်းလီၽွၼ်းၸႃႉၵၢၼ်ၸႂ်ႉတိုဝ်း Social Media, Social Network ၼၼ်ႉယဝ်ႉ။ ၶႂ်ႈဝႃႈႁင်းၽႂ်သေမႃးလၢတ်ႈလွင်ႈၼႆႉဢမ်ႇၸႂ်ႈ ၵူၺ်းၵႃႈ လွင်ႈပဵၼ်တေႉမီးတေႉမၼ်း ၼႂ်းၶၢဝ်ႇၵေႃႈႁၼ် ႁိမ်းႁွမ်းႁဝ်းၵေႃႈပဵၼ် မၢင်ၵေႃႉ ႁူပ်ႉထူပ်းတီႈတူဝ်ၸဝ်ႈၵဝ်ႇၵွၼ်ႇဢမ်ႇၸႂ်ႈႁိုဝ်။ လွင်ႈလႂ်ၵေႃႈယဝ်ႉ ပေႃးဢမ်ႇမီးဢမ်ႇပဵၼ်ဢွၼ်တၢင်း ဢမ်ႇတွၼ်ႉႁၼ်ပိူၼ်ႈတၢင်ႇဝႆႉ ႁႂ်ႈပဵၼ်တွၼ်ႈသွၼ် တႃႇၵူၼ်းတင်းၼမ်သေပိူင်။

ၵွပ်ႈၼၼ် Social Media, Social Network ၼႆႉ ဢမ်ႇၸႂ်ႈဝႃႈ ဢမ်ႇထုၵ်ႇလီလဵၼ်ႈ ၵူၺ်းၼႃႇ မိူဝ်ႈလႂ်မိူဝ်ႈၸႂ်ႉဢွၼ်ႇလၢႆးယူႇၵေႃႈ ႁႂ်ႈတူဝ်ၵဝ်ႇ ၼႃႈႁိူၼ်း မုၵ်ႉၸုမ်း ၸိူဝ်ႉၶိူဝ်း ဝၢၼ်ႈမိူင်းၸဝ်ႈၵဝ်ႇ လႆႈၶိုၼ်ႈယႂ်ႇ လႆႈလီလႆႈပဵၼ်ယွၼ်ႉမၼ်းတႃႉ။

ပိၼ်ႇတႅမ်ႈ – Moa Hua Ling(JN)  vs  ယိင်းၸၼ်လူႇ

ဢၢင်ႈဢိင် − https://tuemaster.com

https://www.girlsallaround.com/social-media-cons/

 

Facebook

ၶၢဝ်ႇလိုၼ်းသုတ်း