WHO ပိုၼ်ၽၢဝ်ႇ ၸွတ်ႇတူဝ်ႈလုမ်ႈၾႃႉ ႁႂ်ႈၾၢင်ႉ COVID-19 ၸိူဝ်ႉၽၼ်းယွႆႈ 3 ဢၼ်

ဝၢႆးသေလၢႆလၢႆၸိုင်ႈမိူင်း မီးလွင်ႈၽႄႈလၢမ်းၸိူဝ်ႉမႅင်းတၢင်းပဵၼ် COVID-19 ထႅင်ႈ ၵမ်းၼိုင်ႈၼၼ်ႉ ၽၢႆႇတၢင်းၸုမ်းပၢႆးယူႇလီလုမ်ႈၾႃႉ (WHO) လႆႈပိုၼ်ၽၢဝ်ႇ ပၼ်ၾၢင်ႉၸွတ်ႇတူဝ်ႈတင်းလုမ်ႈၾႃႉ ႁႂ်ႈၾၢင်ႉတူၺ်းၸွမ်း COVID-19 ၸိူဝ်ႉၽၼ်းယွႆႈ 3 ဢၼ် မိူၼ်ၼင်ႇ XBB.1.5, XBB.1.16 လႄႈ XBB.1.9 ၼႆႉ ဝႃႈၼႆ။

မိူဝ်ႈဝႃး ဝၼ်းထီႉ 30 April 2023 (လိူၼ်ႁူၵ်းမႂ်ႇ 12 ပီႊတႆး 2117 ၼီႈ) သိုဝ်ႇၶၢဝ်ႇၼွၵ်ႈ မိူင်းလၢႆးငၢၼ်းဝႃႈ ႁူဝ်ၼႃႈၽၢႆႇ Technique ၼႂ်းၸုမ်းၽၢႆႇပၢႆးယူႇလီလုမ်ႈၾႃႉ ဢၼ်ႁပ်ႉပုၼ်ႈၽွၼ်းလုမ်းလႃးလွင်ႈၽႄႈတၢင်းပဵၼ် COVID-19 သပ်းၸႅင်ႈၶၢဝ်ႇဝႃႈ ၸိူဝ်ႉမႅင်း ဝၢႆးရၢတ်ႉ COVID-19 ဢူဝ်ႇမီႇၶရွၼ်ႇ (Omicron) လႆႈလႅၵ်ႈလၢႆႈၸိူဝ်ႉၽၼ်း ဢွၵ်ႇမႃးထႅင်ႈ 3 ၸိူဝ်ႉၽၼ်းယွႆႈ ဢၼ်တိုၵ်ႉၽႄႈလၢမ်း ၸွတ်ႇတူဝ်ႈတင်းလုမ်ႈၾႃႉ ဝႆႉယူႇယၢမ်းၽွင်းတေႃႈလဵဝ် ၼၼ်ႉပဵၼ် XBB.1.5, XBB.1.16 လႄႈ XBB.1.9 ဝႃႈၼႆ။

ၵဵဝ်ႇလူၺ်းလွင်ႈၼႆႉသေ Deborah Birx မေႃယႃၼႂ်းမိူင်းဢမေႇရိၵၢၼ်ႇ လႆႈၵၢဝ်ႇၼႄး လူင်ပွင်ၸိုင်ႈဢမေႇရိၵၢၼ်ႇ ဢၼ်ဝႆႉမဝ်မၢင် ၼႂ်းၵၢၼ်မုၼ်းလႅင်းယႃႁႄႉၵင်ႈ COVID-19 ႁႂ်ႈၸၢင်ႈႁပ်ႉမိုဝ်းၸွမ်းၸိူဝ်ႉၽၼ်းယွႆႈ သေဢမ်ႇၵႃး ယင်းလၢတ်ႈထႅင်ႈဝႃႈ ၸိူဝ်ႉမႅင်း COVID-19 ၸိူဝ်ႉၽၼ်းယွႆႈ 3 ဢၼ်ၼႆႉ တေတိုဝ်တေႃႇယႃ PaxLovid လႄႈ တေႁဵတ်းႁႂ်ႈမီးၵူၼ်းလူႉတၢႆ တိူဝ်းၶိုၼ်ႈပဵၼ် 2 ပုၼ်ႈသေ ယၢမ်းၽွင်းတေႃႈလဵဝ် ၵူၼ်းလူႉတၢႆတေႃႇဝူင်ႈမီးယူႇမွၵ်ႈ 1,000 ၵေႃႉ ဝႃႈၼႆ။

မိူဝ်ႈဝူင်ႈပူၼ်ႉမႃးၼၼ်ႉ ထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း COVID-19 ၸိူဝ်ႉၽၼ်း XBB.1.5  တီႈၼႂ်းမိူင်းဢမေႇရိၵၢၼ်ႇ 88 ၵေႃႉ၊ မိူင်းၾီႇလိပ်ႇပိၼ်ႇ သမ်ႉ 70 ၵေႃႉလႄႈ ၵူၼ်းတိတ်းၸပ်းၸိူဝ်ႉၽၼ်း XBB.1.16 သမ်ႉမီးၵႂႃႇယဝ်ႉ 27 ၸိုင်ႈမိူင်း ဝႃႈၼႆ။

တႆးလွတ်ႈလႅဝ်း