WHO ပၵ်းတႃတူၺ်းၸွမ်း COVID-19 ၸိူဝ်ႉၽၼ်းမိဝ် (Mu) ၽႄႈလၢမ်းယဝ်ႉ 39 မိူင်း

ၸုမ်းပၢႆးယူႇလီလုမ်ႈၾႃႉ မႆႈၸႂ်ဝႃႈ ၸိူဝ်ႉမႅင်း COVID-19 ၸိူဝ်ႉၽၼ်းမိဝ် (Mu) တေၸၢင်ႈတိုဝ်ယႃႈယႃ ႁဵတ်းႁႂ်ႈယႃႈယႃဢၼ်မီးယူႇယၢမ်းလဵဝ် ဢမ်ႇၸႂ်ႉတိုဝ်းလႆႈ ဝႃႈၼႆ။

မိူဝ်ႈဝႃး ဝၼ်းထီႉ 1 September 2021 (လိူၼ်ၵဝ်ႈလွင်ႈ 10 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ New York Post ဢွၵ်ႇၼႄဝႆႉဝႃႈ ၸုမ်းပၢႆးယူႇလီလုမ်ႈၾႃႉ (World Health Organization – WHO) ၵူတ်ႇထူပ်းႁၼ်ၸိူဝ်ႉမႅင်း COVID-19 လႅၵ်ႈလၢႆႈၸိူဝ်ႉၽၼ်းမႂ်ႇ သႅၼ်း B.1.621 ဢမ်ႇၼၼ် ၽႃႇသႃႇၵရိၵ်ႉ (Greek) ႁွင်ႉဝႃႈ ၸိူဝ်ႉၽၼ်း မိဝ် (Mu)၊ ယၢမ်းလဵဝ် WHO လႆႈမၵ်းမၼ်ႈၸိူဝ်ႉၽၼ်းမိဝ် ပဵၼ်ၸိူဝ်ႉၽၼ်း ဢၼ်လီသူၼ်ၸႂ်ပႂ်ႉတူၺ်းၸွမ်း ယွၼ်ႉထူပ်းႁၼ်ဝႃႈၸိူဝ်ႉမႅင်းၼႆႉ တေၸၢင်ႈၵႅၼ်ႇၶႅင် လိူဝ်သေယႃႈယႃႁႄႉၵင်ႈၸိူဝ်ႉမႅင်း ဢၼ်လုမ်ႈၾႃႉၸႂ်ႉတိုဝ်းယူႇယၢမ်းလဵဝ်ၼႆႉ ဝႃႈၼႆ။

ၸိူဝ်ႉမႅင်း COVID-19 ၸိူဝ်ႉၽၼ်းမိဝ်ၼႆႉ တႄႇၵူတ်ႇထူပ်းႁၼ် ပွၵ်ႈဢွၼ်တၢင်းသုတ်း တီႈၼႂ်းမိူင်း ၵူဝ်ႇလမ်ႇပီႇယႃႇ (Colombia) မိူဝ်ႈၼႂ်းလိူၼ် January 2021 ပူၼ်ႉမႃးသေ၊ ယၢမ်းလဵဝ်ၸိူဝ်ႉမႅင်းၼႆႉ လႆႈၽႄႈလၢမ်းၸွတ်ႇတူဝ်ႈၵႂႃႇ 39 မိူင်းယဝ်ႉလႄႈ ၵူၺ်းသမ်ႉမီးၶေႃႈမုၼ်းဢွၵ်ႇမႃးဝႃႈ ၸိူဝ်ႉမႅင်း ၸိူဝ်ႉၽၼ်းမိဝ် (Mu) ၼႆႉ တေၸၢင်ႈတိုဝ်ယႃႈယႃႁႄႉၵင်ႈ ငၢႆးမိူၼ်ၵၼ်တင်း ၸိူဝ်ႉၽၼ်းသႅၼ်း B.1.351 ဢမ်ႇၼၼ် ၸိူဝ်ႉၽၼ်းပေႇတႃႇ (Beta) ၼႆလႄႈ လွင်ႈၼႆႉ ၽူႈလူင်ႉလႅၼ်ႇၶဝ် လၢတ်ႈဝႃႈ ထုၵ်ႇလီၵူတ်ႇထတ်းတူၺ်း ႁႂ်ႈပေႃးႁူႉငဝ်ႈႁၢၵ်ႈၸိူဝ်ႉၽၼ်းမိဝ်ၼႆႉ တႅတ်ႈတႅတ်ႈတေႃးတေႃး ၼႆယဝ်ႉ။

Photo Credit: EPA

မိူဝ်ႈၼႆႉ ဝၼ်းထီႉ 2 September 2021 သိုဝ်ႇၶၢဝ်ႇ Japan Times ၵေႃႈဢွၵ်ႇၼႄဝႆႉဝႃႈ ၽၢႆႇပၢႆးယူႇလီ မိူင်းၵျုႇပၢၼ်ႇ ယိုၼ်ယၼ်လၢတ်ႈဝႃႈ ၵူတ်ႇထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း COVID-19 ၸိူဝ်ႉၽၼ်းမိဝ် (Mu) 2 ၵေႃႉ တီႈၶူင်ႇႁိူဝ်းမိၼ်၊ ၵေႃႉၼိုင်ႈ ပဵၼ်ၼၢင်းယိင်း ဢႃႇယု 40 ပီႊ လုၵ်ႉတီႈမိူင်း UAE ၶဝ်ႈမႃး လႄႈ ထႅင်ႈၵေႃႉၼိုင်ႈၵေႃႈ ပဵၼ်ၼၢင်းယိင်း ဢႃႇယု 50 ပီႊ လုၵ်ႉတီႈမိူင်း UK ၶဝ်ႈမႃး တင်းသွင်ၵေႃႉ ဢမ်ႇမီးၾၢင်ႁၢင်ႈၸပ်းတၢင်းပဵၼ်သင်သေလွင်ႈ ၼႆယဝ်ႉ။

တႄႇၸဵမ်မိူဝ်ႈ ၼႂ်းပၢႆပီႊ 2019 ပူၼ်ႉမႃး တေႃႇထိုင်ယၢမ်းလဵဝ် ၸိူဝ်ႉမႅင်း COVID-19 ၽႄႈလၢမ်းၵႂႃႇ 221 မိူင်း တူဝ်ၼပ်ႉၵူၼ်းတိတ်းၸပ်းၸိူဝ်ႉမႅင်း ၸွတ်ႇတူဝ်ႈတင်းလုမ်ႈၾႃႉမီး 219,281,860 ၵေႃႉ၊ ၵူၼ်းလူႉသဵင်ႈတၢႆမီး 4,545,392 ၵေႃႉ လႄႈ ၵူၼ်းဢၼ်ယူတ်းယႃၸိုၼ်ႈၶႅၼ်းၶိုၼ်းမီး 196,074,195 ၵေႃႉ ၸွမ်းၼင်ႇၶေႃမုၼ်း https://www.worldometers.info/coronavirus/ ဢွၵ်ႇၼႄဝႆႉ မိူဝ်ႈၼႆႉဝၼ်းထီႉ 2 September 2021 ၶၢဝ်းယၢမ်း 11:30 မူင်း။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း