WHO လၢမ်းၶၢတ်ႈဝႆႉ ထႅင်ႈ 2 ပီႊ ၸိူဝ်ႉမႅင်း COVID-19 တေမူတ်းႁၢႆၵႂႃႇ

ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းႁၢဝ်ႈႁႅင်း မီးၶၢဝ်းတၢင်း 8 လိူၼ် ဢမ်ႇပႆႇမီးယႃႈယႃႁႄႉၵင်ႈ WHO လၢမ်းၶၢတ်ႈဝႆႉဝႃႈ ထႅင်ႈ 2 ပီႊ ၸိူဝ်ႉမႅင်း COVID-19 တေမူတ်းႁၢႆၵႂႃႇ ၼႂ်းလုမ်ႈၾႃႉလႆႈ။

မိူဝ်ႈဝၼ်းထီႉ 22 August 2020 (လိူၼ်ၵဝ်ႈမႂ်ႇ 4 ၶမ်ႈ ပီႊတႆး 2114 ၼီႈ) သိုဝ်ႇၶၢဝ်ႇ ThaiPBS News ဢွၵ်ႇၼႄဝႆႉ ၵဵဝ်ႇလူၺ်ႈ ႁူဝ်ၼႃႈၸုမ်းပၢႆးယူႇလီလုမ်ႈၾႃႉ World Health Organization (WHO) ၸပ်းၸႅင်ႈၶၢဝ်ႇဝႆႉဝႃႈ ယူႇတီႈ WHO သေ လၢမ်းၶၢတ်ႈဝႆႉ ႁဝ်းၶႃႈတေၵုမ်းထိင်း လွင်ႈၽႄႈလၢမ်းၸိူဝ်ႉမႅင်း တၢင်းပဵၼ် COVID-19 လႄႈ ၸိူဝ်ႉမႅင်းတေၸၢင်ႈႁၢႆၵႂႃႇ ၼႂ်းၶၢဝ်းတၢင်းထႅင်ႈ 2 ပီႊ ယွၼ်ႉပိူဝ်ႈဝႃႈ မိူဝ်ႈၶႆႈဝတ်းသပဵၼ်ႇ (Spanish Flu) ၽႄႈလၢမ်းၼၼ်ႉ လႆႈၸႂ်ႉၶၢဝ်းယၢမ်း 2 ပီႊသေ ၸင်ႇၵိုတ်းယင်ႉ ၸိူဝ်ႉမႅင်းလႆႈ ၼႆယဝ်ႉ။

ၸိူဝ်ႉမႅင်း ၶႆႈဝတ်းသပဵၼ်ႇ (Spanish Flu) ၼႆႉ ၽႄႈလၢမ်းၸွတ်ႇတူဝ်ႈၵႂႃႇတင်းလုမ်ႈၾႃႉ မိူဝ်ႈၼႂ်းပီႊ 1918 ၼၼ်ႉသေ ၶႃႈသၢႆၸႂ်ၵူၼ်းတင်းလုမ်ႈၾႃႉ ဢမ်ႇယွမ်း 50 လၢၼ်ႉၵေႃႉ၊ ၵူၺ်းၵႃႈ ၼႂ်းၶၢဝ်းတၢင်း 8 လိူၼ် ၸိူဝ်ႉမႅင်းတၢင်းပဵၼ် COVID-19 ၵေႃႈ လႆႈၶႃႈသၢႆၸႂ်ၵူၼ်းတင်းလုမ်ႈၾႃႉ 800,000 ပၢႆယဝ်ႉမိူၼ်ၵၼ် ၼႆယဝ်ႉ။

ၵူၼ်းတိတ်းၸပ်းၸိူဝ်ႉမႅင်း COVID-19 တီႈမိူင်းဢိၼ်းတီးယႃး ၼႂ်းၶၢဝ်းတၢင်း 24 ၸူဝ်ႈမူင်း တိူဝ်းၶိုၼ်ႈထႅင်ႈ 61,749 ၵေႃႉ ႁူမ်ႈၵူၼ်းတိတ်းၸပ်းၸိူဝ်ႉမႅင်း 3,105,185 ၵေႃႉ၊ ၵူၼ်းလူႉတၢႆ တိူဝ်းၶိုၼ်ႈထႅင်ႈ 846 ၵေႃႉ ႁူမ်ႈၵူၼ်းလူႉသဵင်ႈတၢႆတင်းမူတ်းမီး 57,692 ၵေႃႉ၊ ၵူၼ်းယူတ်းယႃ ၸိုၼ်ႈၶႅၼ်းမီး 2,336,796 ၵေႃႉ ၼႆယဝ်ႉ။

တီႈမိူင်းပရႃႇသီးလ် ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 23,085 ၵေႃႉ ႁူမ်ႈၵူၼ်းတိတ်းၸပ်း ၸိူဝ်ႉမႅင်းတင်းမူတ်းမီး 3,605,783 ၵေႃႉ၊ ၵူၼ်းလူႉတၢႆတိူဝ်းၶိုၼ်ႈထႅင်ႈ 495 ၵေႃႉ ႁူမ်ႈၵူၼ်းလူႉတၢႆ တင်းမူတ်းမီး 114,772 ၵေႃႉ၊ ၵူၼ်းယူတ်းယႃ ၸိုၼ်ႈၶႅၼ်းၶိုၼ်းမီး 2,709,638 ၵေႃႉ ၼႆယဝ်ႉ။

တီႈၸိုင်ႈမိူင်းဢမေႇရိၵၢၼ်ႇၼႆႉ ၼႂ်းၶၢဝ်းတၢင်း 24 ၸူဝ်ႈမူင်း ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 32,718 ၵေႃႉ ႁူမ်ႈၵူၼ်းတိတ်းၸပ်းၸိူဝ်ႉမႅင်း 5,874,146 ၵေႃႉ၊ ၵူၼ်းလူႉတၢႆတိူဝ်းၶိုၼ်းထႅင်ႈ 430 ၵေႃႉ ႁူမ်ႈၵူၼ်းလူႉတၢႆ 180,604 ၵေႃႉ၊ ၵူၼ်းယူတ်းယႃၸိုၼ်ႈၶႅၼ်းၶိုၼ်းမီး 3,167,063 ၵေႃႉ ၼႆယဝ်ႉ။

မိူဝ်ႈၼႆႉ ဝၼ်းထီႉ 24 August 2020 (လိူၼ်ၵဝ်ႈမႂ်ႇ 6 ၶမ်ႈ ပီႊတႆး 2114 ၼီႈ) ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းၸွတ်ႇတူဝ်ႈၵႂႃႇ (213) မိူင်း (213 countries and territories)၊ ၵူၼ်းတိတ်းၸပ်း ၸိူဝ်ႉမႅင်းတင်းပဵၼ် COVID-19 တင်းလုမ်ႈၾႃႉ ႁူမ်ႈတင်းသဵင်ႈမီး (23,586,903) ၵေႃႉ၊ ၵူၼ်းလူႉသဵင်ႈတၢႆမီး (812,539) ၵေႃႉ၊ ၵူၼ်းဢၼ်ယူတ်းယႃသေ ၸိုၼ်ႈၶႅၼ်းၶိုၼ်း သမ်ႉမီး (16,086,235) ၵေႃႉ ၸွမ်းၼင်ႇၶေႃႈမုၼ်း − www.worldometers.info/coronavirus/ ဝၼ်းထီႉ 24 August 2020 ၶၢဝ်းယၢမ်းဝၢႆးဝၼ်း 14:20 မူင်း။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း