WHO လၢမ်းၶၢတ်ႈဝႆႉ ဝူင်ႈၼႃႈ ၵူၼ်းတိတ်းၸပ်းၸိူဝ်ႉမႅင်း COVID-19 တေသုင်ထိုင် 10 လၢၼ်ႉ

ၼႂ်းၶၢဝ်းတၢင်း 24 ၸူဝ်ႈမူင်း လုမ်ႈၾႃႉမီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တင်းလုမ်ႈၾႃႉ တိူဝ်းၶိုၼ်ႈၸမ်ထိုင် 2 သႅၼ်၊ WHO လၢမ်းၶၢတ်ႈဝႆႉဝႃႈ ၼႂ်းဝူင်ၼႃႈၼႆႉ ၵူၼ်းတိတ်းၸပ်းၸိူဝ်ႉမႅင်း တေသုင်ထိုင် 10 လၢၼ်ႉ။

မိူဝ်ႈၼႆႉ ဝၼ်းထီံႉ 25 June 2020 (ပ−လိူၼ်ပႅတ်ႇမႂ်ႇ 6 ၶမ်ႈ ပီႊတႆး 2214 ၼီႈ) ႁူဝ်ႈၼႃႈ ၸုမ်းပၢႆးယူႇလီ လုမ်ႈၾႃႉ World Health Organization (WHO) လၢမ်းၶၢတ်ႈဝႆႉဝႃႈ ၼႂ်းဝူင်ႈၼႃႈ ဢၼ်တေမႃးထိုင်ၼႆႉ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 ၼႂ်းလုမ်ႈၾႃႉ တေသုင်ထိုင် 10 လၢၼ်ႉၵေႃႉ၊ ယွၼ်ႉဝႃႈ တီႈမိူင်းပရႃႇသီးလ် မီးၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈၼမ်သုင်ထိုင် 4 မိုၼ်ႇပၢႆ ပဵၼ်ဝၼ်းထူၼ်ႈ 2 လႄႈ တီႈၸိုင်ႈမိူင်းဢမေႇရိၵၢၼ်ႇၵေႃႈ ၸမ်ၸမ် 4 မိုၼ်ႇ မိူၼ်ၵၼ်၊ ၼႂ်းလုမ်ႈၾႃႉ ၶၢဝ်းတၢင်း 24  ၸူဝ်ႈမူင်း ႁူမ်ႈၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 172,383 ၵေႃႉ ၼႆယဝ်ႉ။

WHO သိုပ်ႇလၢတ်ႈထႅင်ႈဝႃႈ ယွၼ်ႉၵူၼ်းတိတ်းၸပ်းၸိူဝ်ႉမႅင်း ၵိုင်ႉၵၢင်ႉတိူဝ်းၶိုၼ်ႈၼမ် ၵူႈဝၼ်းဝၼ်းၼႆႉသေ ယင်းမီးထႅင်ႈလၢႆလၢႆမိူင်း လႆႈထူပ်းပၼ်ႁႃ ၶိူင်ႈၵမ်ႉၵႅမ်ၽၢႆႇပၢႆးယူႇလီ ဢမ်ႇၵုမ်ႇထူၼ်ႈ တႃႇတေယူတ်းယႃ ၵူၼ်းပဵၼ် မိူၼ်ၸိူင်ႉၼင်ႇ ၶိူင်ႈၸွႆႈလူမ်းထူၺ်ႈၸႂ် ဢွၵ်ႇသီႇၵျဵၼ်ႇ ၸဵမ်ၸိူဝ်းၼႆႉ ၶတ်းၸႂ်ႁဵတ်းဢွၵ်ႇယူႇၵေႃႈ ဢမ်ႇၶိုတ်းတၼ်းလႆႈ ၵူၼ်းဢၼ်တိတ်းၸပ်းၸိူဝ်ႉမႅင်းတိူဝ်းၶိုၼ်ႈႁၢဝ်ႈႁႅင်းၼၼ်ႉလႆႈ ၼႆယဝ်ႉ။

Photo – REUTERS

မိူၼ်ၼင်ႇ တီႈမိူင်းပရႃႇသီးလ် ၶၢဝ်းတၢင်း 24 ၸူဝ်ႈမူင်း ၵူၼ်းတိတ်းၸပ်းၸိူဝ်ႉမႅင်းလ COVID-19 တိူဝ်းၶိုၼ်ႈထႅင်ႈ 40,995 ၵေႃႉ ပဵၼ်ဝၼ်းထူၼ်ႈ 2 ဢၼ်မီးၵူၼ်းပဵၼ်တိူဝ်းၶိုၼ်ႈ 4 မိုၼ်ႇပၢႆ၊ ႁူမ်ႈၵူၼ်းပဵၼ် တင်းမူတ်းမီး 1,192,474 ၵေႃႉ၊ ၵူၼ်းလူႉသဵင်ႈတၢႆ တိူဝ်းၶိုၼ်ႈထႅင်ႈ 1,103 ၵေႃႉ ႁူမ်ႈၵူၼ်းလူႉတၢႆတင်းမူတ်း မီး 53,874 ၵေႃႉ၊ ၵူၼ်းယူတ်းယႃၸိုၼ်ႈၶႅၼ်းၶိုၼ်းမီး 649,908 ၵေႃႉ ၼႆယဝ်ႉ။

ၸိုင်ႈမိူင်းဢမေႇရိၵၢၼ်ႇ ပဵၼ်မိူင်းဢၼ်မီး ၵူၼ်းပဵၼ် လႄႈ ၵူၼ်းလူႉသဵင်ႈတၢႆၼမ်သုတ်း ၼႂ်းလုမ်ႈၾႃႉ ၶၢဝ်းတၢင်း 24 ၸူဝ်ႈမူင်း ၵူၼ်းတိတ်းၸပ်းၸိူဝ်ႉမႅင်း COVID-19 တိူဝ်းၶိုၼ်ႈထႅင်ႈ 38,386 ၵေႃႉ ႁူမ်ႈၵူၼ်းတိတ်းၸိူဝ်ႉမႅင်းတင်းမူတ်းမီး 2,462,554 ၵေႃႉ၊ ၵူၼ်းလူႉတၢႆ တိူဝ်းၶိုၼ်ႈထႅင်ႈ 808 ၵေႃႉ ႁူမ်ႈၵူၼ်း လူႉတၢႆတင်းမူတ်းမီး 124,281 ၵေႃႉ၊ ၵူၼ်းယူတ်းယႃ ၸိုၼ်ႈၶႅၼ်းၶိုၼ်းမီး 1,040,605 ၵေႃႉ ၼႆယဝ်ႉ။

တေႃႇထိုင်မိူဝ်ႈၼႆႉ ဝၼ်းထီႉ 25 June 2020 (ပ−လိူၼ်ပႅတ်ႇမႂ်ႇ 6 ၶမ်ႈ ပီႊတႆး 2114 ၼီႈ) ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းၸွတ်ႇတူဝ်ႈၵႂႃႇ (213) မိူင်း (213 countries and territories)၊ ၵူၼ်းတိတ်းၸပ်း ၸိူဝ်ႉမႅင်းတင်းပဵၼ် COVID-19 တင်းလုမ်ႈၾႃႉ ႁူမ်ႈတင်းသဵင်ႈမီး (9,533,443) ၵေႃႉ၊ ၵူၼ်းလူႉသဵင်ႈတၢႆမီး (485,160) ၵေႃႉ၊ ၵူၼ်းဢၼ်ယူတ်းယႃသေ ၸိုၼ်ႈၶႅၼ်းၶိုၼ်း သမ်ႉမီး (5,179,398) ၵေႃႉ ၸွမ်းၼင်ႇၶေႃႈမုၼ်း − www.worldometers.info/coronavirus/ ဝၼ်းထီႉ 25 June 2020 ၶၢဝ်းယၢမ်းဝၢႆးဝၼ်း 14:00 မူင်း။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း