WHO လၢတ်ႈဝႃႈ ၵုမ်းထိင်းတၢင်းပဵၼ်မၢၵ်ႇလႅင်းလိင်းၼႂ်းယူးရူပ်ႇလႆႈ

မိူဝ်ႈဝၼ်းထီႉ 30 August 2022 (လိူၼ်သိပ်းမႂ်ႇ 5 ၶမ်ႈ ပီႊတႆး 2116 ၼီႈ) ၽူႈမီးပုၼ်ႈၽွၼ်း ၽၢႆႇပၢႆးယူႇလီလုမ်ႈၾႃႉ WHO လၢတ်ႈဝႃႈ မီးတိုဝ်ႉတၢင်းတေပဵၼ်ၵႂႃႇလႆႈယူႇ တႃႇၵုမ်းထိင်း ၸတ်းၵၢၼ် လွင်ႈၽႄႈလၢမ်းတၢင်းပဵၼ်မၢၵ်ႇလႅင်းလိင်းၼႂ်းယူးရူပ်ႇၼၼ်ႉ ဝႃႈၼႆ။

ၼႄႁႂ်ႈႁၼ်ဝႃႈ လၢႆလၢႆၸိုင်ႈမိူင်း ၼႂ်းၵုၼ်ယူးရူပ်ႇ မိူၼ်ၼင်ႇ ၾရင်ႇသဵတ်ႈ၊ ၵျႃႇမၼီႇ၊ ပေႃႇတူႇၵီႇ၊ သပဵၼ်ႇ လႄႈ မိူင်းဢင်းၵိတ်ႉၸိူဝ်းၼႆႉ ၵူၼ်းတိတ်းၸပ်းတၢင်းပဵၼ်မၢၵ်ႇလႅင်းလိင်း လူတ်းယွမ်းလူင်းမႃးယူႇၵူႈဝူင်ႈလႄႈ ယင်းထူပ်းႁၼ်ထႅင်ႈဝႃႈ ၵူၼ်းပဵၼ်ၼႂ်းဢမေႇရိၵၢၼ်ႇ လၢႆပိုၼ်ႉတီႈၼၼ်ႉၵေႃႈ လူတ်းယွမ်းလူင်းမႃးယူႇ ပႅၵ်ႉသမ်ႉယႃႁႄႉၵင်ႈမၢၵ်ႇလႅင်းလိင်း ဢမ်ႇပႆႇၵုမ်ႇထူၼ်ႈၵေႃႈယဝ်ႉ ၼႆယူႇ။

ၽူႈၵုမ်းၸီႉသင်ႇ WHO ယုမ်ႇယမ်ဝႃႈ တေၸၢင်ႈၵုမ်းထိင်း ၸတ်းၵၢၼ် လွင်ႈၽႄႈလၢမ်း တၢင်းပဵၼ်မၢၵ်ႇလႅင်းလိင်း ဢၼ်လုၵ်ႉတီႈၵူၼ်းၼင်ႇၵၼ်ၽႄႈလၢမ်းၸူးၵၼ် ၼႂ်းပွတ်းတွၼ်ႈယူးရူပ်ႇၼၼ်ႉလႆႈယူႇ တႃႇတေၸတ်းၵၢၼ် လွင်ႈၽႄႈလၢမ်းတၢင်းပဵၼ်ၼႆႉၵေႃႈ တေလႆႈၶတ်းၸႂ်သႂ်ႇႁႅင်းႁႂ်ႈဝႆးၽႂ်းၼႆယဝ်ႉ။

လွင်ႈယႃႁႄႉၵင်ႈ ၶွမ်ႇပၼီႇ Bavarian Nordic ၼၼ်ႉ ပႅၵ်ႉသမ်ႉဝႃႈ ၶတ်းၸႂ်ႁိပ်ႈၼႅတ်ႈ ပိုၼ်ၽႄႈဢွၵ်ႇယူႇသေတႃႉ ယွၼ်ႉမီးလွင်ႈမၵ်းတမ်းဝႆႉလႄႈ မီးလွင်ႈယၢပ်ႇၽိုတ်ႇယူႇမိူၼ်ၵၼ် ဝႃႈၼႆ။

တေႃႇထိုင်ယၢမ်းလဵဝ် ၵူၼ်းတိတ်းၸပ်းတၢင်းပဵၼ်မၢၵ်ႇလႅင်းလိင်း မီးဢမ်ႇယွမ်း 47,600 ၵေႃႉ ၼႂ်း 90 ၸိုင်ႈမိူင်း  တႄႇၼပ်ႉမႃးၸဵမ်မိူဝ်ႈတၢင်းပဵၼ်ၽႄႈလၢမ်းၼႂ်းလိူၼ် May 2022 ၼၼ်ႉသေ ၽၢႆႇတၢင်း WHO ၵေႃႈ လႆႈပိုၼ်ၽၢဝ်ႇ ႁႂ်ႈတၢင်းပဵၼ်မၢၵ်ႇလႅင်းလိင်းၼႆႉ ပဵၼ်ၼႂ်းငဝ်းလၢႆးၶိုၵ်ႉၶၵ်ႉ ၽၢႆႇပၢႆးယူႇလီ မိူဝ်ႈလိူၼ် July 2022 ၼၼ်ႉယူႇယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း