သိုၵ်းမၢၼ်ႈပွႆႇမၢၵ်ႇတီႈ ၼွင်ၶဵဝ် လႄႈ ၼမ်ႉသၼ်ႇ

မိူဝ်ႈၼႆႉဝၼ်းထီႉ 21 October 2024 (လိူၼ်သိပ်းဢဵတ်းလွင်ႈ 4 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်ၼၼ်ႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈဝဵင်းၼွင်ၶဵဝ် လႄႈ ဝဵင်းၼမ်ႉသၼ်ႇ သေ မီးၵူၼ်းမိူင်းလႆႈမၢတ်ႇၸဵပ်းၸွမ်း ယူႇယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ မိူဝ်ႈယၢမ်းၵၢင်ၼႂ်ၸဝ်ႉ 01:10 မူင်း ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈၼႂ်းပွၵ်ႉသပေႇ ဝဵင်းၼွင်ၶဵဝ် 6 လုၵ်ႈလႄႈ မီးၵူၼ်းမိူင်းလႆႈမၢတ်ႇၸဵပ်း 1 ၵေႃႉသေဢမ်ႇၵႃး ႁိူၼ်းယေး/လၢၼ်ႉတၢင်းၶၢႆ ၵူၼ်းမိူင်းၵေႃႈလူႉၵွႆတင်းၼမ်မိူၼ်ၵၼ်။

မိူဝ်ႈယၢမ်းၵၢင်ၼႂ် 08:30 မူင်းၼၼ်ႉၵေႃႈ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈၼႂ်းဝၢၼ်ႈၵျွၵ်ႉၽိဝ်ႇ ၸႄႈဝဵင်းၼမ်ႉသၼ်ႇ လႄႈ မၢၵ်ႇၵႂႃႇတူၵ်းသႂ်ႇတီႈၵျွင်းသွမ်း ၵျွင်းမုၼ်ၸဝ်ႈ လူႉၵွႆၵႂႃႇၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ လွင်ႈသိုၵ်းမၢၼ်ႈပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်းယူႇသဝ်း ဢမ်ႇထၢတ်ႇဢမ်ႇဝၢႆးၼႆႉ ၶႃႈႁဝ်းႁၼ်ထိုင်ဝႃႈ ၼင်ႇႁိုဝ်ၸုမ်းသိုၵ်းလုၵ်ႉၽိုၼ်ႉ ပေႃးတေထွႆဢွၵ်ႇၶိုၼ်းပိုၼ်ႉတီႈ ဢၼ်သိုၵ်းမၢၼ်ႈ တူၵ်းသုမ်းၼၼ်ႉ လႄႈ ၼင်ႇႁိုဝ် ပေႃးတေဢမ်ႇၵေႃႇတင်ႈပူၵ်းပွင်လႆႈၶိုၼ်း ၼႂ်းပိုၼ်ႉတီႈၼၼ်ႉ ၸုမ်းသိုၵ်းမၢၼ်ႈၸင်ႇၸႂ်ႉလွၵ်းလၢႆး ဢဝ်ႁိူဝ်းမိၼ်ပွႆႇမၢၵ်ႇ ယႃႉၵဝ်းၸိူင်ႉၼႆ ယူႇယဝ်ႉ။

မိူဝ်ႈဝႃးဝၼ်းထီႉ 20 October 2024 ယၢမ်းၵၢင်ၼႂ်ၸဝ်ႉမွၵ်ႈ 01:00 မူင်းပၢႆ ၽွင်းၵူၼ်းမိူင်းၼွၼ်းလပ်း လိုဝ်ႈႁိူဝ်ႉလိုဝ်ႈၸႂ်ၵၼ်ယူႇၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈဝဵင်းၵုၼ်လူင် လႄႈ ၵူၼ်းမိူင်း လႆႈမၢတ်ႇၸဵပ်းၸွမ်းၵေႃႈမီး ဝႃႈၼႆ။

တႆးလွတ်ႈလႅဝ်း

 

Facebook

ၶၢဝ်ႇလိုၼ်းသုတ်း