သိုၵ်းမၢၼ်ႈဢဝ်ႁိူၼ်းမိၼ်ပွႆႇမၢၵ်ႇငဝ်ႈၸိုင်ႈ CNF ပွၵ်ႈၵမ်း 2

မိူဝ်ႈဝႃးဝၼ်းထီႉ  11  January 2023 (လိူၼ်ၵမ်လွင်ႈ 6 ၶမ်ႈ ပီႊတႆး 2117 ၼီႈ) သိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈငဝ်ႈၸိုင်ႈ တႅဝ်းႁူမ်ႈၸိူဝ်ႉၸၢတ်ႈၶျၢင်း CNF ပွၵ်ႈၵမ်း 2 ဝႃႈၼႆ။

မိူဝ်ႈယၢမ်းဝၢႆးဝၼ်းမွၵ်ႈ 16:00 မူင်းၼၼ်ႉ ႁိူဝ်းမိၼ်သိုၵ်းမၢၼ်ႈ 3 လမ်း မိၼ်ၵႂႃႇတီႈလွႆဝိတူဝ်ႇရိယ ၸႄႈဝဵင်းထၼ်ႇတလၢၼ်ႇ ငဝ်ႈၸိုင်ႈ CNF သေ ပွႆႇမၢၵ်ႇထႅင်ႈလၢႆလၢႆလုၵ်ႈ ၼႆယဝ်ႉ။

ၼႂ်းၶၢဝ်းတၢင်းသွင်ဝၼ်း (ဝၼ်းထီႉ 10−11) ၼႆႉ သိုၵ်းမၢၼ်ႈ ဢဝ်ႁိူၼ်း၊ ဢဝ်ႁူင်းယႃ လႄႈ ဢွင်ႈတီႈၵဵပ်းၶွင် ဢိၵ်ႇယႃႈယႃၵူႈၸိူဝ်းၸိူဝ်း ပဵၼ်ပဝ်ႉမၢႆသေ ၸႂ်ႉၶိူင်ႈမိၼ်ပွႆႇမၢၵ်ႇ ယႃႉၵွႆပႅတ်ႈ ၼႆယဝ်ႉ။

သလၢႆးထႅတ်ႉၼီႇ ၽူႈၶၢၼ်ပၢၵ်ႇ CNF လၢတ်ႈတီႈ RFA ဝႃႈ သိုၵ်းမၢၼ်ႈပိုၼ်ၽၢဝ်ႇ ၵိုတ်းတိုၵ်းၽၢႆႇလဵဝ်ၼႆၼၼ်ႉ ႁဵတ်းဢဝ်ၼႃႈဢဝ်တႃ တေႃႇၵူၼ်းၼွၵ်ႈမိူင်း လႄႈ လႅၼ်ၵူၼ်းၼွၵ်ႈမိူင်းၵူၺ်း၊ ပေႃးယဝ်ႉ သမ်ႉၶိုၼ်းတေဢဝ်တၢင်းၽိတ်းသေ ပူဝ်ႉသႂ်ႇၼိူဝ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လွင်ႈဝႃႈ ၸၢဝ်းၶိူဝ်းဢမ်ႇၶႂ်ႈၵိုတ်းတိုၵ်း ဢမ်ႇၶႂ်ႈလႆႈလွင်ႈငမ်းယဵၼ် ၼႆထႅင်ႈယူႇ ဝႃႈၼႆ။

ၼႂ်းဝၼ်းထီႉ 10 January 2023 သိုၵ်းမၢၼ်ႈဢဝ်ႁိူဝ်းမိၼ် 5 လမ်း ၵႂႃႇပွႆႇမၢၵ်ႇသႂ်ႇလႄႈ မီးၵူၼ်းသိုၵ်း CNF လူႉတၢႆ 5 ၵေႃႉ မၢတ်ႇၸဵပ်းမွၵ်ႈ 10 ၵေႃႉ ၼႆယူႇယဝ်ႉ။

တႆးလွတ်ႈလႅဝ်း