ငဝ်းလၢႆးပၢင်တိုၵ်းတီႈဝဵင်းလႃႈသဵဝ်ႈမိူဝ်ႈၼႆႉ

ပၢင်တိုၵ်းဢၼ်ပဵၼ်တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ တၢင်းၽၢႆႇသိုၵ်းၵူဝ်းၵၢင်ႉ MNDAA  ပိုၼ်ၽၢဝ်ႇၵႂႃႇဝႃႈ သိမ်းလႆႈငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ (ယမၶ) ယဝ်ႉၼႆသေ ၵူၺ်းတၢင်းၽၢႆႇလုမ်းသိုၵ်း သိုၵ်းမၢၼ်ႈဝႃႈ ငဝ်ႈငုၼ်း ယမၶ ဢမ်ႇပႆႇထုၵ်ႇသိမ်းလႆႈ ပဵၼ်ၶၢဝ်ႇပွမ်ၵူၺ်း ဝႃႈၼႆ။

မိူဝ်ႈၼႆႉဝၼ်းထီႉ 25 July 2024 (လိူၼ်ပႅတ်ႇလွင်ႈ 5 ၶမ်ႈ ပီႊတႆး 2118 ၼီႈ) တၢင်းၽၢႆႇၸုမ်းသိုၵ်းၵူဝ်းၵၢင်ႉ MNDAA ပိုၼ်ၽၢဝ်ႇၵႂႃႇဝႃႈ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) သိုၵ်းမၢၼ်ႈၼၼ်ႉ ယိုတ်းသိမ်းလႆႈလီငၢမ်း မိူဝ်ႈၶၢဝ်းယၢမ်းၵၢင်ၼႂ်ၸဝ်ႉ 04:00 မူင်း လႄႈ ဝဵင်းလႃႈသဵဝ်ႈ ပဵၼ်ဢၼ်လွတ်ႈလႅဝ်းယဝ်ႉ ဝႃႈၼႆ။

ၽူႈမီးပုၼ်ႈၽွၼ်း ၼႂ်းတပ်ႉသိုၵ်းၵူဝ်းၵၢင်ႉ MNDAA လၢတ်ႈတီႈသိုဝ်ႇၶၢဝ်ႇ RFA ဝႃႈ ငဝ်ႈငုၼ်းတိူင်းသိုၵ်း ယမၶ ၼၼ်ႉ သိမ်းလႆႈယဝ်ႉ၊ မိူဝ်ႈဝႃးၶမ်ႈၼၼ်ႉ သိမ်းလႆႈၶိုင်ႈၼိုင်ႈ လႄႈ ၼႂ်ၼႆႉသိုပ်ႇပဵၼ်ပၢင်တိုၵ်းထႅင်ႈသေ သိမ်းလႆႈမူတ်းယဝ်ႉ၊ လွင်ႈၵူၼ်းယွမ်းသိုၵ်းလႄႈ သိမ်းလႆႈၶိူင်ႈယိပ်းၵွင်ႈၵၢင်ႇၼၼ်ႉတႄႉ ယူႇတီႈၶႃႈႁဝ်း ၵူဝ်လၢတ်ႈၽိတ်းၵႂႃႇလႄႈ ဢမ်ႇပႆႇမီးသုၼ်ႇလၢတ်ႈလွင်ႈၼႆႉ ဝႃႈၼႆ။

မိူဝ်ႈယၢမ်းၵၢင်ဝၼ်း 11:15 မူင်းၼၼ်ႉ သိုဝ်ႇၶၢဝ်ႇ Eleven Media တွင်ႈထၢမ်ၵႂႃႇတူၺ်းတီႈ ၵူၼ်းၸမ်ၸႂ်တီႈလုမ်းၽၢႆႇသိုၵ်း ဝဵင်းၼေႇပျီႇတေႃႇသေ လႆႈၵႂၢမ်းတွပ်ႇမႃးဝႃႈ ငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) ဝဵင်းလႃႈသဵဝ်ႈၼၼ်ႉ ဢမ်ႇပႆႇတူၵ်းသုမ်းလႄႈ လွင်ႈဝႃႈ ယိုတ်းသိမ်းလႆႈတိူင်းသိုၵ်းယဝ်ႉၼႆၼၼ်ႉ မၼ်းပဵၼ်ၶၢဝ်ႇပွမ်ၶၢဝ်ႇၽၢင်းၵူၺ်း တီႈငဝ်ႈငုၼ်းတိူင်းသိုၵ်း ယမၶ ဢမ်ႇပႆႇမီးပၢင်တိုၵ်းသင်တေႃႇထိုင်မိူဝ်ႈလဵဝ်၊ ဢၼ်သွင်ၽၢႆႇယိုဝ်းၵၼ်ႁၢဝ်ႈႁႅင်းၼၼ်ႉ ပဵၼ်တီႈ တပ်ႉၶမယ 507 ဝႃႈၼႆ။

ၵူၼ်းမိူင်းဝဵင်းလႃႈသဵဝ်ႈၵေႃႉၼိုင်ႈၵေႃႈ လၢတ်ႈတီႈ Eleven Media ဝႃႈ လွင်ႈဝႃႈသိမ်းလႆႈတိူင်းသိုၵ်း ယမၶ ၼႆၼၼ်ႉ ဢမ်ႇပဵၼ်လႆႈ၊ သဵင်ၵွင်ႈသဵင်မၢၵ်ႇၵေႃႈ ဢမ်ႇလႆႈငိၼ်းတီႈၼႂ်းတိူင်းသိုၵ်း ယမၶ၊  တီႈတၢင်းတပ်ႉ ၶမယ 507 ၼၼ်ႉတႄႉ ၽၢႆႇၸုမ်းသိုၵ်းၵူဝ်းၵၢင်ႉ MNDAA ဢဝ်ႁႅင်းသိုၵ်းတင်းၼမ် ထူဝ်းသိုၵ်းဝႆႉယူႇ၊ ၸွမ်းၼွၵ်ႈဝဵင်းလႃႈသဵဝ်ႈၼႆႉ မီးပၢင်တိုၵ်းႁၢဝ်ႈႁႅင်း လႄႈ ၽၢႆႇသိုၵ်းမၢၼ်ႈ တိုၵ်ႉႁဵတ်းသၢင်ႈ ဢဝ်လွင်ႈႁူမ်ႇလူမ်ႈၼႂ်းဝဵင်းဝႆႉယူႇ ဝႃႈၼႆ။

တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ၸုမ်းသိုၵ်းၵူဝ်းၵၢင်ႉ MNDAA တႄႇပိုတ်ႇၼႃႈသိုၵ်းၸူးသိုၵ်းမၢၼ်ႈ မိူဝ်ႈဝၼ်းထီႉ 2 July 2024 ထိုင်ဝၼ်းထီႉ 25 July 2024 မီးၶၢဝ်းတၢင်း 23 ဝၼ်း ယူႇယဝ်ႉ။

တႆးလွတ်ႈလႅဝ်း