တပ်ႉသိုၵ်းယၢင်းလႅင် ၶဝ်ႈတိုၵ်းၸုမ်းသိုၵ်းမၢၼ်ႈ ဢၼ်တိုၵ်ႉတေႃႉသူင်ႇ ၶဝ်ႈၼမ်ႉတၢင်းၵိၼ် တီႈလႅၼ်လိၼ်ၸၢပ်ႈ မိူင်းတႆး − မိူင်း ယၢင်းလႅင်

သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ တပ်ႉသိုၵ်းယၢင်လႅင် KA ၶဝ်ႈတိုၵ်း ၸုမ်းသိုၵ်းမၢၼ်ႈ ဢၼ်တိုၵ်ႉတေႃႉသူင်ႇ ၶဝ်ႈၼမ်ႉတၢင်းၵိၼ် တီႈလႅၼ်လိၼ်ၸၢပ်ႈ မိူင်းတႆး−မိူင်းယၢင်းလႅင် ဝႃႈၼႆ။

မိူဝ်ႈဝၼ်းထီႉ 19 February 2023 (လိူၼ်သီႇမႂ်ႇ 1 ၶမ်ႈ ပီႊတႆး 2117 ၼီႈ) ယၢမ်းၵၢင်ၼႂ် တပ်ႉသိုၵ်းယၢင်းလႅင် ပႂ်ႉတိုၵ်း ၸုမ်းသိုၵ်းမၢၼ်ႈ ဢၼ်တိုၵ်ႉတေႃႉသူင်ႇၶဝ်ႈၼမ်ႉတၢင်းၵိၼ် တီႈလႅၼ်လိၼ် မိူင်းတႆး − မိူင်းယၢင်းလႅင် တိတ်းၵၼ်ၼၼ်ႉသေ ၽၢႆႇၸုမ်းသိုၵ်းမၢၼ်ႈ လူႉတႆ 6 ၵေႃႉ လႄႈ ထုၵ်ႇတီႉၺွပ်းလႆႈတူဝ်လိပ်း 5 ၵေႃႉ ၼႂ်းၼၼ်ႉပႃးၽူႈၵွၼ်းတပ်ႉၽႄ 1 ၵေႃႉ ၼႆယဝ်ႉ။

ၸုမ်းသိုၵ်းမၢၼ်ႈ ဢၼ်တေႃႉသူင်ႇၶဝ်ႈၼမ်ႉတၢင်းၵိၼ် ပွၵ်ႈၼႆႉပဵၼ် တပ်ႉ ၶလယ 54 ႁႅင်းၵူၼ်း မွၵ်ႈ 30 ၵေႃႉ လတ်းမႃးၼႂ်းၵႄႈ ႁူၺ်ႈမၢၵ်ႇၵေႃႇ လႄႈ ႁူၺ်ႈၶုၼ်မွင်း လႆႈပဵၼ်ပၢင်တိုၵ်းၵၼ်သေ ၽၢႆႇၸုမ်းသိုၵ်းမၢၼ်ႈ ထုၵ်ႇတီႉၺွပ်းတူဝ်လိပ်း 5 ၵေႃႉ ၼႂ်းၼၼ်ႉပႃး ၽူႈၵွၼ်းတပ်ႉၽႄ 1 ၵေႃႉ ထူပ်းႁၼ်တူဝ်တၢႆၵူၼ်းသိုၵ်းမၢၼ်ႈ 6 ၵေႃႉ သေဢမ်ႇၵႃး ၽၢႆႇတပ်ႉသိုၵ်းယၢင်းလႅင်ၶဝ် သိမ်းလႆႈပႃးထႅင်ႈ ၵွင်ႈ MA ၵူႈသႅၼ်းသႅၼ်း ႁူမ်ႈ (10) လဝ်း လႄႈ မၢၵ်ႇမိုဝ်ႉၸိုၼ်းယၢမ်း တင်းၼမ် ဝႃႈၼႆ။

ဢၼ်ပႂ်ႉတိုၵ်း ၸုမ်းသိုၵ်းမၢၼ်ႈပွၵ်ႈၼႆႉပဵၼ် တပ်ႉသိုၵ်းယၢင်းလႅင် KA တပ်ႉသိုၵ်းၶိုၵ်ႉတွၼ်းယၢင်းလႅင် ဢွၼ်ႁူဝ်သေ မီး တပ်ႉသိုၵ်းယၢင်းလႅင် တပ်ႉၵွင် မၢႆ (1)၊ တပ်ႉသိုၵ်းယၢင်းလႅင် တပ်ႉၵွင် မၢႆ (5) လႄႈ KNDF ၶဝ်ႈႁူမ်ႈသေၶဝ်ႈတိုၵ်း ဝႃႈၼႆ။

မိူဝ်ႈဝၼ်းထီႉ 18 February 2023 ပူၼ်ႉမႃးၼၼ်ႉၵေႃႈ ၸုမ်းသိုၵ်းမၢၼ်ႈ ဢၼ်တေႃႉသူင်ႇၶဝ်ႈၼမ်ႉတၢင်းၵိၼ်ၶဝ် ဢၼ်လတ်းၽၢၼ်ႇမႃးတၢင်း ၼႂ်းၼႃႈလိၼ် SSS ၼၼ်ႉ လႆႈထုၵ်ႇတင်းတပ်ႉသိုၵ်းယၢင်းလႅင် KA တပ်ႉၵွင် မၢႆ(3) ပႂ်ႉတိုၵ်းသေ ၽၢႆႇၸုမ်းသိုၵ်းမၢၼ်ႈ လူႉတၢႆ ဢမ်ႇယွမ်း 3 ၵေႃႉ ဝႃႈၼႆ။

တႆးလွတ်ႈလႅဝ်း