တပ်ႉၼမ်ႉရၢတ်ႉသျႃး ၸၢမ်းယိုဝ်းမၢၵ်ႇမိတ်ႉသႆး ပိုတ်းယိုဝ်းႁိူဝ်းလမ်ၼမ်ႉထႅင်ႈ ၼႂ်းပၢင်ႇလၢႆႇပႄႈသိၾိၵ်ႇ

ႁိူဝ်းတပ်ႉသိုၵ်းရၢတ်ႉသျႃး တီႈပၢင်ႇလၢႆႇပႄႈသိၾိၵ်ႇ(Pacific) ၸၢမ်းယိုဝ်းမၢၵ်ႇမိတ်ႉသႆး သႅၼ်းပိုတ်းယိုဝ်းႁိူဝ်းလမ်ၼမ်ႉ(Answer missile) ပဵၼ်မၢၵ်ႇဢၼ်သႂ်ႇၸွမ်းႁူဝ်မၢၵ်ႇRocket လႆႈလႄႈ ပိုတ်းယိုဝ်းပဝ်ႉမၢႆတႂ်ႈၼမ်ႉ ဢွင်ႇမၢၼ်ၵႂႃႇယဝ်ႉ ဝႃႈၼႆ။

မိူဝ်ႈဝၼ်းထီႉ 12 December 2021 (လိူၼ်ၸဵင်မႂ်ႇ 9 ၶမ်ႈ ပီႊတႆး 2116 ၼီႈ) ၸွမ်ၸိုင်ႈ ဝလႃႇတီမီရ် ပူႇတိၼ်ႇ ဢွၵ်ႇမႃးလၢတ်ႈဝႃႈ“ ရၢတ်ႉသျႃး ပဵၼ်ၽူႈၼမ်းလုမ်ႈၾႃႉ လွင်ႈမၢၵ်ႇမိတ်ႉသႆးဝႆးၽႂ်းလိူဝ်သဵင်လႄႈ မိူဝ်ႈၽွင်းမိူင်းတၢင်ႇမိူင်း လမ်းၶိုတ်းယဝ်ႉ ၼၼ်ႉ ရၢတ်ႉသျႃးၵေႃႈ တေလႆႈၶူင်သၢင်ႈဢွၵ်ႇမႃးထႅင်ႈ ၶိူင်ႈၵွင်ႈၵၢင်ႇဢၼ်မႂ်ႇယဝ်ႉ” ဝႃႈၼႆ။

သိုပ်ႇလၢတ်ႈထႅင်ႈဝႃႈ  လိူဝ်သေၼၼ်ႉ တၢင်းၼမ်ႁူဝ်မၢၵ်ႇ Rocket လႄႈ ႁိူဝ်းတိုၵ်း၊ ႁိူဝ်းမိၼ်ၵူႈလမ်း ရၢတ်ႉသျႃးလႄႈ ဢမေႇရိၵၢၼ်ႇၼၼ်ႉ မီးလွင်ႈမိူၼ်ၵၼ်ယူႇ၊ ၵူၺ်းၵႃႈ လွင်ႈၶူင်သၢင်ႈႁဵတ်းဢွၵ်ႇႁႂ်ႈပေႃးၶိုပ်ႈၼႃႈမႃးထႅင်ႈၼၼ်ႉ ရၢတ်ႉသျႃးပဵၼ်ၸဝ်ႈဢႃႇၼႃႇဢၢမ်းၼၢတ်ႈဝႆႉ မၢႆထီႉ 1 သေ လႆႈမီးလွင်ႈယုၵ်ႉၸၼ်ႉ ၶိူင်ႈၵွင်ႈၵၢင်ႇၶိုၼ်ႈမႃးလိူဝ်ၵဝ်ႇထႅင်ႈယူႇယဝ်ႉ။

မိူဝ်ႈလိူၼ်ပူၼ်ႉမႃးၼႆႉၵေႃႈ ပူႇတိၼ်ႇ ယင်းလၢတ်ႈဝႃႈ မီးလွင်ႈၸၢမ်းမၢၵ်ႇမိတ်ႉသႆး ဝႆးၾႆးလိူဝ်သဵင်(Zircon hypersonic missile) ၸမ်တေယဝ်ႉတူဝ်ႈယဝ်ႉလႄႈ ယုမ်ႇယမ်ဝႃႈတေလႆႈၸႂ်ႉၼႂ်းပီႊၼႃႈ2022 ၼႆႉယူႇ ဝႃႈၼႆ။

ၼႂ်းၶၢဝ်းယၢမ်းလဵဝ်ၵၼ်ၼႆႉ ယူႇၶရဵၼ်းၵေႃႈ လႆႈဢွၵ်ႇပၵ်းပိူင် ႁႂ်ႈသိုၵ်းတၢင်ႇမိူင်း ၶဝ်ႈႁူမ်ႈၸွမ်းၽႅၼ်ၵၢၼ်ၽိုၵ်းၽွၼ်ႉသိုၵ်းၼႂ်းပီႊ 2022 ၼႆႉလႆႈ ၼႆယဝ်ႉ။ လွင်ႈႁဵတ်းသၢင်ႈၼႆႉ ႁဵတ်းႁႂ်ႈ ရၢတ်ႉသျႃးဢမ်ႇႁၢၼ်ႉၸႂ်တေႉတေႉ။

သမ်ႉဝႃႈယူႇၶရဵၼ်း ဢမ်ႇလႆႈပဵၼ်ၽူႈၶဝ်ႈၸုမ်း  NATO သေတႃႉ တေသိုပ်ႇႁူမ်ႈမိုဝ်းၵၼ်တင်း ၽၢႆႇတပ်ႉသိုၵ်းမိူင်းဝၼ်းတူၵ်း တွၼ်ႈတႃႇတုမ်ႉတွပ်ႇၸူးရၢတ်ႉသျႃးၼႆသေ တေၸၢင်ႈႁဵတ်းႁႂ်ႈပဵၼ်ပၢင် တိုၵ်းၵၼ် ၼႂ်းၵႄႈၵၢင် ရၢတ်ႉသျႃးလႄႈ ယူႇၶရဵၼ်း မႃးၶၢဝ်းတၢင်းၼႃႈလႆႈ ၼႆယူႇယဝ်ႉ။

တႆးလွတ်ႈလႅဝ်း