တမ်းဝၢင်းယိူင်းမၢႆ တွၼ်ႈတႃႇတူဝ်ႇၵဝ်ႇလႄႈ

ၵွပ်ႈသင်လႄႈလႆႈသႂ်ႇႁူဝ်ၶေႃႈဝႆႉဝႃႈ “တမ်းဝၢင်းယိူင်းမၢႆ တွၼ်ႈတႃႇတူဝ်ႇၵဝ်ႇလႄႈ” ၼႆၼၼ်ႉ ဢူၺ်းၵေႃႉ လူလိၵ်ႈႁဝ်းၶဝ်တေမီးၶေႃႈထၢမ်ယူႇ၊ ယွၼ်ႉၼၼ်သိုပ်ႇလူဢၢၼ်ႇၵႂႃႇႁႂ်ႈသုတ်းလႄႈ ၶေႃႈတွပ်ႇမၼ်းတေ ၽုတ်းဢွၵ်ႇမီးမႃးယူႇ။

ၵူၼ်းႁဝ်းၼႆႉ ဢမ်ႇဝႃႈ လဵၵ်ႉႁိုဝ်ယႂ်ႇ၊ ၼုမ်ႇႁိုဝ်ထဝ်ႈ၊ ယိင်းႁိုဝ်ၸၢႆး၊ ၼၢႆးႁိုဝ်ၶိင်း တိုၼ်းၶႂ်ႈပဵၼ် ၵူၼ်းၶိုၼ်ႈယႂ်ႇမႂ်ႇသုင်၊ ၶႂ်ႈမီးၼႃႈမီးတႃ၊ မီးငိုၼ်းမီးၶမ်း၊ မီးလူတ်ႉမီးၵႃးၵၼ် ၵူႈၵေႃႉယူႇၼႆၼၼ်ႉ ထၢင်ႇတေ ဢမ်ႇၽိတ်း ၽႂ်ၵေႃႈတေဢမ်ႇၶႂ်ႈပဵၼ် ၵူၼ်းယၢၵ်ႈ၊ ၵူၼ်းၽၢၼ်၊ ၵူၼ်းၵႅၼ်းၼင်ႇၵဝ်ႇ ၽႂ်ၵေႃႈတိုၼ်းၶႂ်ႈ ၶိုၼ်ႈယႂ်ႇမၢၵ်ႈမီးလီပဵၼ်ၼၼ်ႉယဝ်ႉ။ တေႃႈၼင်ႇၵူၼ်းဢၼ်မၢၵ်ႈမီးဝႆႉယဝ်ႉၸိူဝ်းၼၼ်ႉ ယင်းတိုၵ်ႉၶတ်း ၸႂ် ႁဵတ်းႁႂ်ႈၶိုၼ်ႈယႂ်ႇမၢၵ်ႈမီးလိူဝ်ၵဝ်ႇယူႇ ဢမ်ႇထၢတ်ႇဢမ်ႇဝၢႆး။

ၵူၺ်းၵႃႈ ႁဝ်းၶႂ်ႈမၢၵ်ႈမီးလီပဵၼ် ၶႂ်ႈပဵၼ်ၵူၼ်းမီးငိုၼ်းမီးငိုၼ်းၶမ်းယူႇသေတႃႉ သင်ႁဝ်းဢမ်ႇတင်ႈၸႂ် တင်ႈၶေႃး တင်ႈယိူင်းမၢႆသေ ႁဵတ်းသၢင်ႈၵႂႃႇၼႆ တႃႇတေမီးမႃးၼၼ်ႉၵေႃႈ တိုၼ်းဢမ်ႇပဵၼ်လႆႈ၊ တႃႇတေ ပဵၼ်မႃးၼၼ်ႉၵေႃႈ တိုၼ်းဢမ်ႇမီးလႆႈ။ ၵွပ်ႈၼၼ်လႄႈၸင်ႇဝႃႈ ပေႃးၶႂ်ႈပဵၼ်ၽူႈမၢၵ်ႈမီး၊ ၶႂ်ႈပဵၼ်ၵူၼ်းၶိုၼ်ႈ ယႂ်ႇၶိုတ်းပိူၼ်ႈလႆႈၼၼ်ႉ “တမ်းဝၢင်းယိူင်းမၢႆ တွၼ်ႈတႃႇတူဝ်ႇၵဝ်ႇလႄႈ” ၸဝ်ႈၵဝ်ႇၶႂ်ႈပဵၼ်သင်ၼႆၼၼ်ႉ ႁိုဝ်မီးၵေႃႉလႂ်ၽႂ်ႁူႉလႆႈ လိူဝ်သေတူဝ်ၸဝ်ႈၵဝ်ႇ။

ယိူင်းမၢႆဢၼ်ဝႃႈၼၼ်ႉ မၼ်းမီးယူႇ 2 လၢႆး။

1. ယိူင်းမၢႆၶၢဝ်းပွတ်း Short term goal
2. ယိူင်းမၢႆၶၢဝ်းယၢဝ်း ဢမ်ႇၼၼ် ယိူင်းဢၢၼ်း Long term goal ၼႆၼၼ်ႉယဝ်ႉ။

ယိူင်းမၢႆၶၢဝ်းပွတ်း Short term goal ဢၼ်ဝႃႈၼႆႉ ပိူင်တႅၵ်ႈမၼ်း မိူၼ်ၼင်ႇဝႃႈ “ၼႂ်းပီၼႆႉ တေဢၢၼ်းမီးလႆႈ လူတ်ႉၵႃးလမ်းၼိုင်ႈ ဢမ်ႇၼၼ် ၵဝ်ဢၢၼ်းသွၼ်လိၵ်ႈဢိင်းၵလဵတ်ႈ ႁႂ်ႈ မေႃၼႂ်း ၶၢဝ်းတၢင်းၼိုင်ႈပီႊ” ၸဵမ်ၵႂႃႇၸိူဝ်းၼႆႉ။

ယိူင်းမၢႆၶၢဝ်းယၢဝ်း ဢမ်ႇၼၼ် ယိူင်းဢၢၼ်း Long term goal ၼႆၼၼ်ႉသမ်ႉ ပဵၼ်လွင်ႈဢၼ် ႁဝ်းၶႂ်ႈမီးၶႂ်ႈ ပဵၼ်ၶၢဝ်းမိူဝ်းၼႃႈ၊ ၶၢဝ်းယၢဝ်း ဢၼ်ၼၢၼ်းထိုင်ၼၼ်ႉယဝ်ႉ။ တွၼ်ႈတႃႇ တေထိုင်ၵေႃႈ တေႃႈလႆႈၸႂ်ႉ ၶၢဝ်းယၢမ်းႁိုင်ၼၢၼ်း ပိူင်တႅၵ်ႈမၼ်းမိူၼ်ၼင်ႇ “ၵဝ်ဢၢၼ်းပဵၼ်ၽူႈမၢၵ်ႈမီးသေပိူၼ်ႈၼႂ်းမိူင်းတႆး ဢမ်ႇ ၼၼ် ထႅင်ႈ 40 ပီႊတၢင်းၼႃႈၼႆႉ ဢၢၼ်းမီးငိုၼ်း ၼိုင်ႈႁဵင်လၢၼ်ႉ (Billion) ” ၼႆၼၼ်ႉယဝ်ႉ။

တေႁဵတ်းႁိုဝ်ၸိူင်ႉႁိုဝ်သေ ထူၵ်းဢွၵ်ႇယိူင်းမၢႆ။

လွင်ႈဢၼ်ႁဝ်းၶႂ်ႈပဵၼ် ဢၼ်မီးယူႇတီႈၼႂ်းၸႂ်ႁဝ်း တင်းမူတ်းၼၼ်ႉ ဝူၼ်ႉဢွၵ်ႇ မူတ်းမူတ်းသေတႅမ်ႈ ၶပ်ႉလူင်းဝႆႉၼႂ်းမၢင်ၸေႈ၊ ပေႃးတႅမ်ႈယဝ်ႉယဝ်ႉ ၶိုၼ်းလူတူၺ်းဢၼ် ၶႂ်ႈႁဵတ်း ၶႂ်ႈပဵၼ်ၼၼ်ႉသေ ၶိုၼ်းၸႅၵ်ႇ တူၺ်း ၶၢဝ်းယၢမ်း ဢၼ် တေၸဵဝ်းပဵၼ်လႆႈ လႄႈ ဢၼ်လႂ်တေၼၢၼ်းပဵၼ်။

ပေႃးႁဝ်းလိူၵ်ႈႁၼ် ဢၼ်တေပဵၼ်လႆႈၼႂ်းၶၢဝ်းယၢမ်း ၼႂ်းလိူၼ် ဢမ်ႇၼၼ် ၼႂ်းပီႊပွတ်းပွတ်းၼၼ်ႉ ဢဝ်တႅမ်ႈ သႂ်ႇၼႂ်းႁူဝ်ၶေႃႈ ယိူင်းမၢႆၶၢဝ်းပွတ်း လႄႈ၊ လွင်ႈဢၼ်ႁဝ်း ၶႂ်ႈပဵၼ်သေပိူၼ်ႈ ဢၼ်ပဵၼ် ယိူင်းဢၢၼ်းၼၼ်ႉ တႅမ်ႈဝႆႉတီႈၼိုင်ႈသေ ၼပ်ႉသွၼ်ႇဝႆႉ ၶၢဝ်းယၢမ်းဢၼ်တေ ႁဵတ်းႁႂ်ႈပဵၼ်ၼၼ်ႉလႄႈ။

ယိူင်းမၢႆတၢင်းၼမ်ဢၼ်ႁဝ်းဝူၼ်ႉဢွၵ်ႇမႃးၼၼ်ႉ ၶိုၼ်းၶပ်ႉၸႅၼ်ႇတႄႇဢဝ်ဢၼ် တေပဵၼ်လႆႈဢွၼ်တၢင်း ပိူၼ်ႈၼၼ်ႉ မိူၼ်ၼင်ႇ “ၼႂ်းလိူၼ်ၼႆႉ ၵဝ်ဢၢၼ်းလူလိၵ်ႈ ႁႂ်ႈယဝ်ႉၼိုင်ႈပပ်ႉ ၼႂ်းၶၢဝ်းတၢင်းသၢမ်လိူၼ် ၵဝ်ဢၢၼ်း မေႃၸႂ်ႉတိုဝ်းၶွမ်း ၼႂ်းၶၢဝ်းတၢင်းၼိုင်ပီႊ ငိုၼ်းၶဝ်ႈၵဝ်ဢၢၼ်းႁႂ်ႈမီး 20 သႅၼ်” ၼႆတႄႇၸဵမ်ၵႂႃႇ ၸိူဝ်းၼႆႉ။ ပေႃးႁူႉဝႃႈၸဝ်ႈၵဝ်ႇၶႂ်ႈႁဵတ်းသင်ယဝ်ႉၼႆ ၵမ်းၼႆႉလူဝ်ႇမီးၽႅၼ်ၵၢၼ် တႃႇထိုင်ယိူင်းမၢႆ မီးယိူင်း မၢႆလၢႆလၢႆၵူၺ်းပေႃးဢမ်ႇမီးၽႅၼ်ၵၢၼ်သေ ႁဵတ်းသၢင်ႈၸွမ်းတႄႉၼႆ မၼ်းၵေႃႈဢမ်ႇပဵၼ်ၼမ်ႉ ပဵၼ်တူဝ် မႃး။

မီးၽႅၼ်ၵၢၼ်ယဝ်ႉ သမ်ႉလူဝ်ႇႁဵတ်းသၢင်ႈ မိူဝ်ႈၼႂ်းၶၵ်ႉတွၼ်ႈႁဵတ်းသၢင်ႈၼႆႉ တေမီးဢၼ်မႃး ၶဵင်ႇတႃႉ မၼ်း မိူၼ်ၼင်ႇၸႂ်ၶီႈၶၢၼ်ႉလႄႈ ၸႂ်ၵူဝ် မိူၼ်ၼင်ႇ “ၵူဝ်ဝႃႈမၼ်း တေဢမ်ႇပဵၼ်မႃးတႄႉ” ၼႆ ၸိူဝ်းၼႆႉ၊ ၼႂ်းၶၵ်ႉတွၼ်ႈၼႆႉ သင်မီးၸႂ်ၵူဝ်ၼႆ ႁဝ်းလူဝ်ႇဝႆႉၸႂ်ၵႅၼ်ႇၶႅင် လႄႈဢမ်ႇလူဝ်ႇၶၢၼ်ႉ ဢမ်ႇလူဝ်ႇၵၢၼ်ႉ ယွမ်းသုမ်း ႁဝ်းလူဝ်ႇပႂ်ႉထတ်းတူၺ်းၸွမ်း ဢၼ်ႁဝ်းတမ်းဝႆႉယိူင်းမၢႆလႄႈ ၽႅၼ်ၵၢၼ်ဝႆႉၼၼ်ႉ မၼ်းႁွတ်ႈ ထိုင်တီႈလႂ်ယဝ်ႉ၊ ၸွင်ႇမၼ်းပႃႈၸမ်ႁွတ်ႈယိူင်းမၢႆႁိုဝ်? မိူၼ်ၼင်ႇလွင်ႈဢၼ် ႁဝ်းတမ်းဝႆႉဝႃႈ ၼိုင်ႈလိူၼ်ၼႆႉ ဢၢၼ်းလူလိၵ်ႈႁႂ်ႈယဝ်ႉ ၼိုင်ႈပပ်ႉၼႆ သင်ႁဝ်းလူယဝ်ႉတႄႉၼႆၸိုင် ႁဝ်းတိုၼ်းတေမီးတၢင်းသိူဝ်းၸႂ် ႁၢၼ်ႉ ၸႂ်ၸွမ်း တူဝ်ၸဝ်ႈၵဝ်ႇၼၼ်ယဝ်ႉ။

ၵွပ်ႈသင်သမ်ႉလူဝ်ႇမီးယိူင်းမၢႆ?

ၵူၼ်းဢမ်ႇမီးယိူင်းမၢႆၼႆႉ တေမိူၼ်ၼင်ႇၵူၼ်းၶီႇႁိူဝ်း ဢမ်ႇမီးလၢမ်ႈၽၢႆး (မႆႉၽၢႆးႁိူဝ်း) ၼၼ်ႉယဝ်ႉ ၵူၼ်းၶီႇ ႁိူဝ်းသေဢမ်ႇမီးလၢမ်ႈၽၢႆးၼၼ်ႉ တႃႇမၼ်းတေၶီႇႁိူဝ်းသေ လုၵ်ႉၽင်ႇၼမ်ႉၽၢႆႇၼိုင်ႈထိုင်ၵႂႃႇ ၽၢႆႇၼိုင်ႈ ၼၼ်ႉ တေဢမ်ႇပဵၼ်လႆႈ ၵႃႈတေလႆႈပွႆႇလွင်ႈၸွမ်း ႁႅင်းၼမ်ႉလႆၼၼ်ႉၵူၺ်း။ တေႃႈၼင်ႇၼၼ်ယဝ်ႉ ၵူၼ်းႁဝ်းၵေႃႈ ႁဵတ်းၵၢၼ်သင်ၵေႃႈလီ သင်ဢမ်ႇမီးယိူင်းမၢႆတႅတ်ႈၼႅတ်ႈၼႆ တႃႇတေဢွင်ႇမၢၼ်မႃးလႆႈ ၼၼ်ႉ ပဵၼ်ယၢပ်ႇယူႇ တေဢမ်ႇထိုင်တီႈထိုင်တၢင်းသေ ယူႇၵိၼ်ၵႂႃႇဝၼ်းလႂ်ဝၼ်းၼၼ်ႉၵူၺ်း။

ယွၼ်ႉၼၼ်လႄႈၸင်ႇဝႃႈ ႁဝ်းလူဝ်ႇမီးယိူင်းမၢႆသုင်သုင် ယိူင်းမၢႆႁဝ်းသုင်တၢၼ်ႇႁိုဝ်ၵေႃႈ လီၵႃႈၼၼ်ႉ ယဝ်ႉ။ ႁဝ်းလူဝ်ႇဝႆႉႁႂ်ႈသုင်လိူဝ်သေဢၼ်ႁဝ်းၶႂ်ႈလႆႈၶႂ်ႈပဵၼ်ၼၼ်ႉ မၼ်းၸင်ႇတေ မႃးၶူပ်းငၢမ်ႇၵၼ်တင်း ဢၼ်တီႈႁဝ်းၶႂ်ႈပဵၼ် ပိူင်တႅၵ်ႈမၼ်း မိူၼ်ၼင်ႇၵူၼ်းယိုဝ်းပိုၼ်ၵၢင်ႇ ၵူၼ်းယိုဝ်းပိုၼ်ၵၢင်ႇၼႆႉ သင်မၼ်းတေ ယိုဝ်းၼႃႈဢူၵ်းၵူၼ်းပေႃးၼႆ ပၢႆပိုၼ်မၼ်းၼၼ်ႉ တေလႆႈယိူင်းၵႂႃႇတီႈႁူဝ်ၵေႃႉၼၼ်ႉၵွၼ်ႇ ပိုၼ်ၸင်ႇတေ ၸပ်းတိူဝ်ႉတီႈဢူၵ်းၼၼ်ႉလီလီ။

ၸႂ်ဢၼ်ၶႂ်ႈလႆႈၶႂ်ႈပဵၼ်ႁၢဝ်ႈႁႅင်း (Burning Desire) ။

ႁဝ်းတမ်းဝႆႉယိူင်းမၢႆယဝ်ႉ တႃႇတေထိုင်တီႈယိူင်းမၢႆလႆႈသမ်ႉ ႁဝ်းတၵ်းလႆႈမီးဢၼ်ဝႃႈ “ၸႂ်ဢၼ်ၶႂ်ႈလႆႈၶႂ်ႈ ပဵၼ်ႁၢဝ်ႈႁႅင်း (Burning Desire)” ၼႆၼၼ်ႉထႅင်ႈၵွၼ်ႇ ႁဝ်းၸင်ႇတေၸၢင်ႈထိုင်လႆႈ တီႈႁဝ်းယိူင်းမၢႆဝႆႉ သင်ဢမ်ႇမီးၸႂ်ၶႂ်ႈပဵၼ်ႁၢဝ်ႈႁႅင်း၊ ၸႂ်ဢၼ်ယွင်ႇၸွမ်းပေႃးၼႆၸိုင် ယိူင်းမၢႆလႄႈ ယိူင်းဢၢၼ်းလူင် ဢၼ်ႁဝ်း ၶႂ်ႈလႆႈၶႂ်ႈပဵၼ်ၼၼ်ႉၵေႃႈ တေဢမ်ႇပဵၼ်မႃးၼင်ႇၸႂ်။

ၸႂ်ဢၼ်ၶႂ်ႈပဵၼ်လၢႆလၢႆ ဢမ်ႇမီးလွင်ႈတူင်ႉၼိုင်သင် ၸွမ်းၼၼ်ႉတႄႉ မၼ်းပဵၼ် Wish သေ ပိူင်ႈၵၼ်တင်း ၸႂ်ဢၼ်ၶႂ်ႈပဵၼ်ႁၢဝ်ႈႁႅင်း (Burning Desire) သေ တူဝ်ၸဝ်ႈၵဝ်ႇၵေႃႈ လုၵ်ႉႁဵတ်းသၢင်ႈတႄႉတႄႉၼၼ်ႉယဝ်ႉ။ ၸႂ်ဢၼ်ၶႂ်ႈလႆႈ ၶႂ်ႈပဵၼ်ႁၢဝ်ႈႁႅင်းဢၼ်ဝႃႈၼၼ်ႉ မၼ်းပဵၼ်ၸိူင်ႉႁိုဝ်ၼႆ တေဢဝ်တၢင်းပိူင်ပဵၼ် ဢပုမ်ႇ ႁူဝ်ၼိုင်ႈ ပဵၼ်ပိူင်တႅၵ်ႈမၼ်း။

တီႈဝၢၼ်ႈဢွၼ်ႇဝၢၼ်ႈၼိုင်ႈၼၼ်ႉ မီးဢွၼ်ႇၸၢႆးၵေႃႉၼိုင်ႈ ၸူဝ်ႈပၢၼ်ဢႃယူႉတေမီးမွၵ်ႈ (20) ပီႊ ယွၼ်ႉမၼ်းၸၢႆးၶႂ်ႈပဵၼ် ၽူႈမၢၵ်ႈမီးႁႅင်းၼႃႇလႄႈ မၼ်းၸင်ႇလႄႇႁႃထၢမ် ၵူၼ်းၼႂ်းဝၢၼ်ႈၶဝ် ၸိူဝ်းၼၼ်ႉ ဝႃႈ တေလႆႈႁဵတ်းသၢင်ႈလၢႆးတၢင်းၸိူင်ႉႁိုဝ်လၢႆလၢႆ ၼင်ႇႁိုဝ်တေပဵၼ်မႃးၽူႈမၢၵ်ႈမီးၼႆ ၵႂႃႇႁႃထၢမ်ၵေႃႉၼိုင်ႈ ယဝ်ႉၵေႃႉၼိုင်ႈ၊ ႁိူၼ်းၼိုင်ႈယဝ်ႉႁိူၼ်းၼိုင်ႈၼႆသေတႃႉ ၵူၼ်းဝၢၼ်ႈၶဝ်ၸိူဝ်းၼၼ်ႉတႄႉၵေႃႈ ဢမ်ႇတွပ်ႇ မၼ်းလႆႈသေၵေႃႉ။ ပိူၼ်ႈၵူၺ်းပၼ်လႆႈတၢင်းႁၼ်ထိုင်မၼ်းဝႃႈ −

“သင်ဝႃႈၶႂ်ႈႁူႉတႄႉတႄႉပေႃးၼႆ လူဝ်ႇလႆႈၵႂႃႇထၢမ် ၸဝ်ႈရသေႉ ဢၼ်မီးတၢင်းႁူႉမေႃပၺ်ႇၺႃႇ တီႈၼိူဝ် သၼ်လွႆ ၽၢႆႇၼွၵ်ႈဝၢၼ်ႈႁဝ်းၼၼ်ႉၵွၺ်းယဝ်ႉ” ၼႆယူႇ။

ႁဵတ်းၼၼ်သေ ၸၢႆးဢွၼ်ႇၵေႃႉၼၼ်ႉၵေႃႈ ၶိုၼ်ႈၵႂႃႇတီႈ ၼိူဝ်သၼ်လွႆသေယဝ်ႉ ၸင်ႇမိူဝ်းဝႆႈလဝ်ႈထၢမ်တီႈ ၸဝ်ႈရသေးပႃးၼၼ်ႉတႄႉယူႇယဝ်ႉ။ ၶေႃႈတွပ်ႇမၼ်းတႄႉ ၸဝ်ႈရသေႉၼၼ်ႉ တွပ်ႇၵႂႃႇဝႃႈ “သင်ၶႂ်ႈပဵၼ်ၽူႈ မၢၵ်ႈမီး လႄႈ ၽူႈဢွင်ႇမၢၼ်ပေႃးၼႆ တၵ်းတေလႆႈမီးၵၢင်ၸႂ်၊ ၸႂ်ၶႂ်ႈလႆႈၶႂ်ႈပဵၼ်ႁၢဝ်ႈႁႅင်း (Burning Desire) ၼၼ်ႉဢိူဝ်ႈ” ၼႆယဝ်ႉ။

တီႈၼႆႈ ၵၢင်ၸႂ်ဢၼ်ၶႂ်ႈလႆႈၶႂ်ႈပဵၼ်ႁၢဝ်ႈႁႅင်း ဢၼ်ဝႃႈၼၼ်ႉမၼ်းၸၢႆးသမ်ႉဢမ်ႇပွင်ႇၸႂ် လွင်ႈၶေႃႈၵႂၢမ်း ၼၼ်ႉလႄႈ ၸဝ်ႈရသေႉၸင်ႇၶိုၼ်းလၢတ်ႈမၼ်းဝႃႈ “ဢိူဝ်ႈလီယဝ်ႉ တွၼ်ႈတႃႇမိူဝ်ႈၼႆႉတႄႉ ၵဝ်လၢတ်ႈမႂ်း လႆႈၼႆႉၵူၺ်း သင်ထိုင်မိူဝ်ႈၽုၵ်ႈမႃးပေႃးၼႆ မႂ်းၸင်ႇၶိုၼ်းမႃးထူပ်းၵဝ် တီႈတိၼ်သၼ်လွႆၽၢႆႇတူၵ်း ဢၼ်မီး ၸမ်ၼမ်ႉပၢင်ႇလၢႆႇၼၼ်ႉတႃႉ” ၼႆယူႇ မၼ်းၸၢႆးၵေႃႈပွၵ်ႈမိူဝ်းၵႂႃႇသေ ထိုင်ၵၢင်ၼႂ်မိူင်းလႅင်းမႃးယဝ်ႉ ၼၼ်ႉ မၼ်းၸၢႆးၸင်ႇၶိုၼ်းၵႂႃႇၸူး တီႈဢွင်ႈဢၼ်ၸဝ်ႈရသေႉ လၢတ်ႈမၼ်းဝႆႉၼၼ်ႉ။

ၽွင်းမၼ်းၸၢႆး ၵိုင်ႉၵၢင်ႉမႃးႁၼ်ၸဝ်ႈရသေႉပႃးၼၼ်ႉယဝ်ႉ ၸဝ်ႈရသေႉတႄႉ ဢမ်ႇလၢတ်ႈၵႂၢမ်းသင်သေ ၶေႃႈ၊ ၵူၺ်းလၢၵ်ႈၸၼ်ဢဝ်မိုဝ်းမၼ်းၸၢႆးပႆၶဝ်ႈၵႂႃႇ ၼႂ်းၼမ်ႉပၢင်ႇလၢႆႇတီႈဢမ်ႇလိုၵ်ႉဢမ်ႇတိုၼ်ႈ ၼၼ်ႉ သေယဝ်ႉ တဵၵ်းႁူဝ်မၼ်းၸၢႆးၸူမ်ၼမ်ႉဝႆႉယူႇ ၽွင်းၼင်ႇၼၼ်မၼ်းၸၢႆးၵေႃႈ ၼႅတ်ႈၸိုၼ်ႇၽုတ်း ၵၼ်ႈ ထူၺ်ႈၸႂ်ယူႇလၢႆလၢႆၵမ်းသေတႃႉ ၸဝ်ႈရသေႉၵေႃႈဢမ်ႇပွႆႇႁူဝ်မၼ်းသေဢမ်ႇၵႃး သိုပ်ႇတဵၵ်းႁူဝ်မၼ်း ၸူမ်ၼမ်ႉဝႆႉယူႇႁဵတ်းၼၼ် ယူႇၵမ်းၼိုင်ႈ၊ ၸဝ်ႈရသေႉ ၸင်ႇပွႆႇမိုဝ်းမၼ်းသေ ႁူဝ်ၸၢႆးဢွၼ်ႇ ၵေႃႉၼၼ်ႉ ၸင်ႇပႅၼ်ၼမ်ႉမႃး ဝၢႆးမၼ်းၸၢႆးၽုတ်းႁူဝ်ဢွၵ်ႇမႃးလႆႈၵေႃႈ ၼႅတ်ႈထူၺ်ႈၸႂ်ဢိမ်ႇဢိမ်ႇ ၵမ်းလဵဝ်။ ယၢမ်း မၼ်းၸၢႆး ထူၺ်းၸႂ်ဢိမ်ႇယဝ်ႉသေ တိုၵ်ႉလိုဝ်ႈႁိူဝ်ႉယူႇၼၼ်ႉ ၸဝ်ႈရသေႉၸင်ႇထၢမ်မၼ်းဝႃႈ “ၽွင်းၵဝ် တဵၵ်းႁူဝ်မႂ်းၸူမ်ၼမ်ႉၼၼ်ႉ ၼႂ်းၸႂ်မႂ်းပဵၼ်ၸိူင်ႉႁိုဝ်ဝႆႉ” ၼႆယူႇ ၸၢႆးဢွၼ်ႇၵေႃႈၸင်ႇတွပ်ႇဝႃႈ ”ဢမ်ႇဝူၼ်ႉ ဢွၵ်ႇသင် ၽွင်းယၢမ်းၼၼ်ႉႁူႉဝႃႈ ၶႂ်ႈထူၺ်ႈၸႂ် လွင်ႈလဵဝ်ၵူၺ်း” ဝႃႈၼႆ။

ႁဵတ်းၼၼ်သေ ၸဝ်ႈရသေးၸင်ႇလၢတ်ႈဝႃႈ “ၽွင်းမႂ်းၸူမ်ၼမ်ႉၼၼ်ႉ ယွၼ်ႉဢမ်ႇလႆႈလူမ်းထူၺ်ႈၸႂ်လႄႈ လိူဝ်သေလွင်ႈထူၺ်ႈၸႂ်ယဝ်ႉ မႂ်းဢမ်ႇမုင်ႈမွင်းသင်ဢမ်ႇၸႂ်ႈႁႃႉ? ၼႆယဝ်ႉ။ ၵၢင်ၸႂ်ၶႂ်ႈပဵၼ်ႁၢဝ်ႈႁႅင်းဢၼ်ဝႃႈ ၼၼ်ႉ မိူၼ်ၼၼ်ၼင်ႇၵဝ်ႇယဝ်ႉ သင်မႂ်းၶႂ်ႈပဵၼ် ၽူႈဢွင်ႇမၢၼ်လႄႈ ၽူႈမၢၵ်ႈမီးပေႃးၼႆ ၼႂ်းဢွၵ်းဢေႃ ပၢႆးဝူၼ်ႉမႂ်းၼၼ်ႉၵေႃႈ လိူဝ်သေလွင်ႈမၢၵ်ႈမီးလႄႈလွင်ႈဢွင်ႇမၢၼ်ၼၼ်ႉ မႂ်းဢမ်ႇလူဝ်ႇဝူၼ်ႉၵႂင်ၸွမ်း လွင်ႈလႂ် ပေႃးႁဵတ်းၼၼ်ၵွၼ်ႇ မႂ်းၸင်ႇတေဢွင်ႇမၢၼ်မႃးလႆႈ လႄႈမၢၵ်ႈမီးမႃးလႆႈ” ၼႆယဝ်ႉ။

ဢိင်လူၺ်ႈဢပုမ်ႇႁူဝ်ၼႆႉသေ မၼ်းပိူင်းၼႄဝႃႈ ၵၢင်ၸႂ်ဢၼ်ၶႂ်ႈပဵၼ်ႁၢဝ်ႈႁႅင်းၼၼ်ႉ မၼ်းတေလႆႈလုၵ်ႉ ႁဵတ်းသၢင်ႈ ၸိုၼ်ႇဢဝ်တႄႉတႄႉဝႃႈဝႃႈ မိူၼ်ၼင်ႇၸိုၼ်ႇၽုတ်းထူၺ်ႈၸႂ်ၼၼ်ႉယဝ်ႉ သင်ၶႂ်ႈပဵၼ် ၽူႈဢွင်ႇ မၢၼ်ပေႃးၼၼ် တၵ်းတေလႆႈမီးလွင်ႈၵၢင်ၸႂ် ၶႂ်ႈပဵၼ်ႁၢဝ်ႈႁႅင်း (Burning desire) ၼၼ်ႉလူးၵွၼ်ႇ ၸင်ႇ တေပဵၼ်မႃးလႆႈ။

ၼႂ်းဝၼ်းမိူဝ်ႈၼႆႉ ထၢမ်တူၺ်းၶိုၼ်းတူဝ်ႇၵဝ်ႇလီလီ ၸဝ်ႈၵဝ်ႇၶႂ်ႈပဵၼ်သင်ၼႆ ပေႃးႁူႉဝႃႈၸဝ်ႈၵဝ်ႇ ၶႂ်ႈပဵၼ်သင်ယဝ်ႉၼႆၵေႃႈ တမ်းဝၢင်းယိူင်းမၢႆသေ ၶတ်းၸႂ်ႁဵတ်းသၢင်ႈၵႂႃႇ ႁႂ်ႈထိုင်တီႈလႄႈ မိူဝ်ႈမီးမႃး ၸႂ်ၶၢၼ်ႉ၊ ၸႂ်ၶီႈၵူဝ် ၸိူဝ်းၼၼ်ႉမႃးယႃႉတၢင်းၶႂ်ႈပဵၼ်ၸဝ်ႈၵဝ်ႇၼႆ ႁႂ်ႈဢဝ် ၵၢင်ၸႂ်ၶႂ်ႈပဵၼ်ၶၢဝ်ႈႁႅင်း Burning desire ဢမ်ႇၼၼ် Motivation ၼၼ်ႉ တိုၵ်းပေႉမၼ်းႁႂ်ႈလႆႈၼႆသေ…။

လွမ်ႉမိူင်း – ၵေးသီး

22 June, 2022

မၢႆတွင်း − ပွင်ႈၵႂၢမ်းႁူဝ်ၼႆႉ ပဵၼ်တၢင်းႁၼ်သုၼ်ႇတူဝ် ၽူႈတႅမ်ႈလိၵ်ႈၵေႃႉလဵဝ်။

တႆးလွတ်ႈလႅဝ်း