တိတ်းၸပ်းၸိူဝ်ႉမႅင်းၼႂ်းလိူတ်ႈ ႁၢႆႉႁႅင်းထိုင်သၢႆၸႂ်လႆႈ

လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼႆႉၵေႃႈ ပဵၼ်ၽေးႁၢႆႉႁႅင်းဢၼ်ထိုင်သၢႆၸႂ်လႆႈၼၼ်ႉ ယူႇယဝ်ႉ။ လွင်ႈၼႆႉ ၵူႈၵေႃႉၵေႃႈ တေၵႆႉလႆႈငိၼ်းလႄႈ လႆႈဝႃႈပဵၼ်တၢင်းပဵၼ်မဵဝ်းဢၼ် မီးၽွၼ်းတုမ်ႉယွၼ်ႈထိုင်သၢႆၸႂ်လႆႈၼမ်ၼၼ်ႉယူႇ။ ၵူၺ်းၵႃႈ ၸွင်ႇယၢမ်ႈထၢင်ႇထိူမ်ၵၼ်ယူႇ ႁိုဝ်ဝႃႈ လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ ၵိူတ်ႇပဵၼ်မႃးလႆႈၸိူင်ႉႁိုဝ် လႄႈ ၸွင်ႇမီး လွၵ်းလၢႆးယူတ်းယႃယူႇႁိုဝ် ဢၼ်ဝႃႈၼၼ်ႉသေ ၼႂ်းဝၼ်းမိူဝ်ႈၼႆႉ ႁဝ်းမႃးတူၺ်းၶေႃႈတွပ်ႇမၼ်း ၸွမ်းၵၼ်ၶႃႈ။

လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ ပဵၼ်ဢီႈသင်?

လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ (Septicemia) ပဵၼ် ၵၢၼ်တိတ်းၸပ်းၸိူဝ်ႉမႅင်း တီႈလႂ်တီႈ ၼိုင်ႈၼႂ်းတူဝ်ၶိင်း ဢၼ်လုၵ်ႉမႃးတီႈ  ပႅတ်ႉတီးရီးယႃး Bacteria ၊ ၸိူဝ်ႉမႅင်း Virus ၸဵပ်းယဵၼ်း လႄႈ ၵၢၼ်တိတ်းၸပ်းၸိူဝ်ႉမႅင်း ၼႂ်းဢၢင်ႇၵႃႇၸိူဝ်းၼႆႉသေ ထိုင်တီႈၵိူတ်ႇပဵၼ်ၽၢင်ႁၢင်ႈ ၸဵပ်းယဵၼ်းႁၢဝ်ႈႁႅင်း ႁဵတ်းႁႂ်ႈၸိူဝ်ႉမႅင်းပႅတ်ႉတီးရီးယႃး Bacteria ၶဝ်ႈၵႂႃႇၼႂ်းလိူတ်ႈသေ ၶိုၼ်းသူင်ႇၽွၼ်းတုမ်ႉယွၼ်ႈ လွင်ႈႁဵတ်းၵၢၼ်ၶွင် ၶူင်ႉသၢင်ႈဢၢင်ႇၵႃႇၼႂ်းတူဝ်ၶိင်းဢမ်ႇႁဵတ်း ၵၢၼ် ၵွပ်ႈၼၼ်လႄႈ ၽူႈၸိူဝ်းတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ သင်ၸိူဝ်ႉဢမ်ႇၼႅတ်ႈ ၶဝ်ႈယူတ်းယႃ ထုၵ်ႇမႅၼ်ႈၸွမ်းလွၵ်းလၢႆးၸိုင် ၸၢင်ႈမီးၶၵ်ႉၵၢၼ်ႁၢႆႉႁႅင်း လူၺ်ႈမီးလိူတ်ႈၸၢင် ႁႅင်းပူၼ်ႉတီႈသေ ႁဵတ်းႁႂ်ႈသျွၵ်ႉ(shock) လူႉသဵင်ႈတၢႆၵမ်းလဵဝ်လႆႈ ၼႆယူႇ။

ၵူၼ်းၸိူဝ်းဢၼ်တေၸၢင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ

• ၵူၼ်းထဝ်ႈၵူၼ်းၵႄႇဢၼ်မီးတၢင်းပဵၼ်လႄႈ ႁႅင်းၶၢမ်ႇတူဝ်ဢေႇ။
• လုၵ်ႈဢွၼ်ႇလဵၵ်ႉဢၼ်ဢမ်ႇယူႇလီသေ မီးပိုၼ်ႉထၢၼ်လွင်ႈႁႄႉၵင်ႈတူဝ်ၶိင်း ဢမ်ႇတဵမ် ထူၼ်ႈ။
• ၵူၼ်းဢမ်ႇယူႇလီ ၸိူဝ်းမီးႁႅင်းၶၢမ်ႇတူဝ်ဢမ်ႇတဵမ်ထူၼ်ႈ။
• ၵူၼ်းၸိူဝ်းမီးတၢင်းပဵၼ်ၵိုၵ်းတူဝ် မိူၼ်ၼင်ႇ− တၢင်းပဵၼ်တႂ်၊ တၢင်းပဵၼ်ပွတ်ႇ၊ တၢင်းပဵၼ် တပ်း လႄႈ တၢင်းပဵၼ်ယဵဝ်ႈဝၢၼ် ၸႃႉၵႂႃႇၸိူဝ်းၼႆႉ။

လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ ပဵၼ်မႃးလႆႈၸိူဝ်ႉႁိုဝ်?

ငဝ်ႈႁၢၵ်ႈလွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼႆႉ မၼ်းၵိူတ်ႇပဵၼ်မႃး မိူဝ်ႈတူဝ်ၶိင်းႁဝ်း ဢူၼ်ႈဢွၼ်ႇ ယွၼ်ႉၼၼ် ၸိူဝ်ႉမႅင်းတေၸၢင်ႈၶဝ်ႈၵႂႃႇၼႂ်းတူဝ်ၶိင်းလႆႈငၢႆႈလႄႈ သမ်ႉၶိုၼ်း ၶဝ်ႈၵႂႃႇလႆႈလၢႆၽၢႆႇလၢႆတၢင်း မိူၼ်ၼင်ႇ− ၸွမ်းလွတ်ႇလူမ်းထူၺ်ႈၸႂ်၊ လွတ်ႇဢႃႇႁႃႇရ၊ လွတ်ႇၽၢႆႈ ဢွၼ်ႇ၊ တၢင်းၽိဝ်ၼိူဝ်ႉၼင် လႄႈ တၢင်းႁွႆးမၢတ်ႇၸဵပ်း ၸိူဝ်းၼႆႉ ဢိၵ်ႇတင်း ၵၢၼ်တိတ်းၸပ်း ၸိူဝ်ႉမႅင်းၼႂ်းၶူင်ႉသၢင်ႈတူဝ်ၶိင်း မိူၼ်ၼင်ႇ− တိတ်းၸပ်းၸိူဝ်ႉမႅင်းတီႈ ပွတ်ႇ၊ တပ်း၊ ၼႂ်းထူင် ၼမ်ႉလီ၊ သႆႈၵိင်ႇၸဵပ်းယဵၼ်း လႄႈ လွင်ႈတိတ်းၸပ်း ၸိူဝ်ႉမႅင်း၊ ၸဵပ်းယဵၼ်း ဢမ်ႇၼၼ် မႅင်းတိူၵ်ႇၼႂ်းတူဝ်ၶိင်း ၸဵမ်ၸိူဝ်းၼႆႉယဝ်ႉ။

ၽၢင်ႁၢင်ႈၵူၼ်းတိတ်းၸပ်းၸိူဝ်ႉမႅင်းၼႂ်းလိူတ်ႈ

• မီးလူမ်းၼၢဝ်သုင်
• ထူၺ်ႈၸႂ်ၵူၺ်းၵေႃႈ ႁိူဝ်ႉဢူၼ်ႈ
• ၶီငဝ်၊ မၢင်ၵေႃႉၵေႃႈတၢႆလိုမ်း
• ၽၢႆႈဢွၼ်ႇဢေႇလူင်း
• တွင်ႉၶူၼ်ႉ၊ ဢေႃႉႁၢၵ်ႈ
• တိၼ်မိုဝ်းၵတ်း
• လိူတ်ႈၸၢင်ႁႅင်းပူၼ်ႉတီႈလႄႈ တေၸၢင်ႈသျွၵ်ႉ(shock) လႆႈၼၼ်ႉယဝ်ႉ။

ၶၵ်ႉၵၢၼ်ႁၢႆႉႁႅင်း လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ

• ၶၵ်ႉထီႉ 1

ၵမ်ႈပႃႈၼမ် ၽၢင်ႁၢင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ ႁူႉလႆႈဝႃႈ တူဝ်ၶိင်းမီးလွင်ႈၽိတ်း ပိူင်ႈ မီးၽၢင်ႁၢင်ႈတိတ်းၸပ်းၸိူဝ်ႉမႅင်းၼႂ်းတူဝ်ၶိင်း တီႈလႂ်တီႈၼိုင်ႈ ၼႆယူႇ။

• ၶၵ်ႉထီႉ 2

ၼႂ်းၶၵ်ႉၼႆႉ တေလႆႈဝႃႈႁၢႆႉႁႅင်းယဝ်ႉ။ ၶူင်ႉသၢင်ႈၼႂ်းတူဝ်ၶိင်း တႄႇႁဵတ်းၵၢၼ်ၽိတ်းပိူင်ႈသေ မီးၽၢင်ႁၢင်ႈႁၢႆႉႁႅင်းတၢင်ႇၸိူဝ်ႉတၢင်ႇပိူင်ၶဝ်ႈမႃးၸွမ်း ဝႃႈၼႆယဝ်ႉ။

• ၶၵ်ႉထီႉ 3

ၽၢင်ႁၢင်ႈတိတ်းၸပ်းၸိူဝ်ႉမႅင်း ၶၵ်ႉႁၢႆႉႁႅင်းသုတ်းၼႆႉ ၽူႈၵေႃႉဢမ်ႇယူႇလီ မီးႁႅင်းၶၢမ်ႇတူဝ် ဢေႇၼၼ်ႉ တေၸၢင်ႈသျွၵ်ႉ(shock) လႄႈ ၸၢင်ႈႁဵတ်းႁႂ်ႈထိုင်သၢႆၸႂ်လႆႈၼၼ်ႉယဝ်ႉ။

လွၵ်းလၢႆးႁႄႉၵင်ႈ လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ

• ၶတ်းၸႂ်လုမ်းလႃးပၢႆးယူႇလီႁႂ်ႈၶႅမ်ႉလႅပ်ႈယူႇတႃႇသေႇ ဢွၵ်ႇလဵၼ်ႈဢဵၼ်ႁႅင်း လႄႈ ၵိၼ်တၢင်းၵိၼ်တၢင်းယႅမ်ႉ မဵဝ်းဢၼ်မီးၽွၼ်းလီသေ လိုဝ်ႈႁိူဝ်ႉႁႂ်ႈတဵမ်ထူၼ်ႈ။
• ႁဵတ်းလွင်ႈမူတ်းသႂ်ၸွမ်းႁိမ်းႁွမ်း၊ သုၵ်ႈလၢင်ႉသီမိုဝ်းဢွၼ်တၢင်းတေၵိၼ်ၶဝ်ႈ လႄႈ မိူဝ်ႈၵိၼ်ၶဝ်ႈႁူမ်ႈတၢင်ႇၵေႃႉၼၼ်ႉ ႁႂ်ႈၸႂ်ႉၸေႃႉၵၢင်တႃႇသေႇ။
• ယူတ်းယႃတၢင်းပဵၼ်ၵိုၵ်းတူဝ်တႃႇသေႇ ၵႂႃႇထူပ်းမေႃယႃ ၸွမ်းၼင်ႇမေႃယႃၶဝ်ႁွင်ႉ တွၼ်ႈတႃႇႁႂ်ႈမီးႁႅင်းၶၢမ်ႇတူဝ်ၵႅၼ်ႇၶႅင်။
• သမ်းယႃႁႄႉၵင်ႈတၢင်းပဵၼ် ၸွမ်းၼင်ႇမေႃယႃၶဝ် ပၼ်ၶေႃႈၼႄႉၼမ်း။
• သင်ၸိူဝ်ႉဝႃႈထူပ်းႁၼ်တူဝ်ၶိင်းမီးလွင်ႈၽိတ်းပိူင်ႈ မိူၼ်ၼင်ႇ ၼၢဝ်၊ ထူၺ်ႈၸႂ်ႁိူဝ်ႉ၊ မီးၽၢင်ႁၢင်ႈၶီငဝ် လႄႈ ၽၢင်ႁၢင်ႈတၢင်ႇၸိူဝ်း ဢၼ်မီးလွင်ႈၽိတ်းပိူင်ႈ ပေႃးၼႆၸိုင် ႁႂ်ႈၵႂႃႇထူပ်းမေႃယႃၵမ်းလဵဝ် ၼႆယူႇ။

မိူဝ်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ ၸၢင်ႈပဵၼ်ဢီႈသင်လႆႈ

တွၼ်ႈတႃႇၽူႈၵေႃႉတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ ထုၵ်ႇလီၵိၼ်ပၼ်ဢႃႇႁႃႇရဢၼ် မူတ်းသႂ်ႇ ဢၼ်မႅၼ်ႈၸွမ်းပၢႆးယူႇလီ တွၼ်ႈတႃႇယႃႇႁႂ်ႈၸိူဝ်ႉမႅင်းတိူဝ်းၼမ်မႃးထႅင်ႈလႄႈ ၼႄႉၼမ်းႁႂ်ႈၵိၼ်ဢႃႇႁႃႇရ မဵဝ်းဢၼ်ယွႆႈငၢႆႈ သေဢမ်ႇၵႃး ထုၵ်ႇလီလႆႈလူတ်းယွမ်း လွင်ႈလုတ်ႇလႅၼ်းယႃႈ၊ လွင်ႈၵိၼ်လဝ်ႈ ပီႇယႃႇ Alcoholic တင်းလၢႆ ယွၼ်ႉမၼ်းတေႁဵတ်းႁႂ်ႈ ဢမ်ႇမီးႁႅင်းၶၢမ်ႇတူဝ် ၼၼ်ႉယဝ်ႉ။

ပႅၵ်ႉသမ်ႉဝႃႈ လွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈၼၼ်ႉ မၼ်းတေမီးတိုဝ်ႉတၢင်းထိုင်သၢႆၸႂ် ၼႆသေတႃႉ ပေႃးလႆႈႁပ်ႉလွင်ႈယူတ်းယႃထုၵ်ႇမႅၼ်ႈ လႄႈ လႅၵ်ႈလၢႆႈ လွင်ႈယူႇသၢင်ႈ၊ လႅၵ်ႈလၢႆႈ ဢၵျၢင်ႉတၢင်းယၢမ်ႈဢမ်ႇလီ ဢၼ်ႁဝ်းႁဵတ်းသၢင်ႈယူႇၵူႈဝၼ်းၼၼ်ႉၸိုင် မၼ်းတေ တိူဝ်းပၼ်တိုဝ်ႉတၢင်း ၼႂ်းၵၢၼ်ယူတ်းယႃလွင်ႈတိတ်းၸပ်းၸိူဝ်ႉမႅင်းၼႂ်းလိူတ်ႈ ႁႂ်ႈႁၢႆလႆႈမိူၼ်ၵဝ်ႇ ၼႆယူႇယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.thairath.co.th/lifestyle/health-and-beauty/2477072#aWQ9NjI2YTRhM2FkZWI5NzkwMDEzNjQwNzE3JnBvcz0wJnJ1bGU9MA==