တီႈပၢင်ၵုမ် SCO ပူႇတိၼ်ႇ လႆႈႁူပ်ႉထူပ်းတင်းၽူႈၼမ်းလၢႆလၢႆၸိုင်ႈမိူင်း

တီႈၼႂ်းပၢင်ၵုမ် SCO ဢၼ်မီးၽူႈၼမ်းလၢႆလၢႆၸိုင်ႈမိူင်းၶဝ်ႈႁူမ်ႈၼၼ်ႉ ၽၢႆႇတၢင်းၸွမ်ၸိုင်ႈ ပူႇတိၼ်ႇၵေႃႈ လႆႈႁူပ်ႉထူပ်းတင်း ၸွမ်ၸိုင်ႈလၢႆလၢႆမိူင်း ၼွၵ်ႈပိူင်ၵၢၼ်ၵႂႃႇထႅင်ႈယူႇယဝ်ႉ။

ၸွမ်ၸိုင်ႈရၢတ်ႉသျႃး ဝလႃႇတီႇမီရ်ႇ ပူႇတိၼ်ႇ လႄႈ ၸွမ်ၸိုင်ႈမိူင်းၶႄႇ သျီႇ ၵျိၼ်းၽိင်ႇ လႆႈႁူပ်ႉထူပ်းၵၼ် တီႈပၢင်ၵုမ်ၶိုၵ်ႉတွၼ်းၽူႈၼမ်းသုင်သုတ်း ဢၼ်မီးၸိုဝ်ႈဝႃႈ Shanghai Cooperation Organization: SCO ၼၼ်ႉ ၸတ်းႁဵတ်းၵႂႃႇ တီႈၼႂ်းဝဵင်းလူင် Astana ၸိုင်ႈမိူင်း Kazakhstan  ၼႂ်းၶၢဝ်းတၢင်းဝၼ်းထီႉ 3-4 July 2024 ၼႆယူႇယဝ်ႉ။

ၸွမ်းၼင်ႇလူင်ပွင်ၸိုင်ႈရၢတ်ႉသျႃး ပိုတ်ႇလၢတ်ႈၼႄၼၼ်ႉတႄႉဝႃႈ လိူဝ်သေထူပ်းတင်း ၸွမ်ၸိုင်ႈမိူင်းၶႄႇယဝ်ႉ ယင်းလႆႈႁူပ်ႉထူပ်းပဵၼ်သုၼ်ႇတူဝ် မိူင်းတေႃႇမိူင်းၵႂႃႇထႅင်ႈတင်း ၸွမ်ၸိုင်ႈတူႇရၵီႇ၊ ၽူႈၼမ်းမွင်ႇၵူဝ်းရီးယႃး ဢိၵ်ႇတင်း ပႃႇၵိတ်ႉသ်တၢၼ်ႇ ဢၼ်ဢမ်ႇပဵၼ်တၢင်းၵၢၼ်ၵႂႃႇ ၼႆယူႇယဝ်ႉ။

ရၢတ်ႉသျႃး လႄႈ ၶႄႇ ၼၼ်ႉ တူၺ်းႁၼ်ဝႃႈ SCO ပဵၼ်တီႈဢၼ်ၵမ်ႉထႅမ်ပၼ်တွၼ်ႈတႃႇ သၢၼ်ၶတ်းၽေးၽၢႆႇၼွၵ်ႈ မိူၼ်ၼင်ႇလွင်ႈၵႃႉၶၢႆယႃႈမဝ်းၵမ် တေႃႇထိုင် ၵၢၼ်ၵုမ်းၵမ်လွင်ႈဢမ်ႇၵတ်းယဵၼ်ၼႂ်းၸိုင်ႈမိူင်း ပဵၼ်ၶိူင်ႈမိုဝ်းတွၼ်ႈတႃႇတိူဝ်းၶႂၢၵ်ႈ ႁႅင်းဢႃႇၼႃႇၼႂ်းပွတ်းၵုၼ်ဢေးသျႃးၼၼ်ႉ ဝႃႈၼႆ။

ပူႇတိၼ်ႇ လႄႈ  သျီႇ ၵျိၼ်းၽိင်ႇ လႆႈတိူဝ်းၶႂၢၵ်ႈလွင်ႈႁူမ်ႈမိုဝ်းၵၼ်သေ ၵေႃႇတင်ႈမုၵ်ႉၸုမ်း SCO ၼႆႉမႃး မိူဝ်ႈပီႊ 2001 လူၺ်ႈမီး ရၢတ်ႉသျႃး၊ ၶႄႇ လႄႈ ၸိုင်ႈမိူင်းၼႂ်းဢေးသျႃးပွတ်းၵၢင် ပဵၼ်ၽူႈၶဝ်ႈၸုမ်းဝႆႉယဝ်ႉသေ ယင်းမီးထႅင်ႈ ဢိၼ်းတီးယႃး၊ ဢီႇရၢၼ်ႇ၊ ပႃႇၵိတ်ႉသ်တၢၼ်ႇ တွၼ်ႈတႃႇသၢၼ်ၶတ်းဢႃႇၼႃႇမိူင်းဝၼ်းတူၵ်းသုမ်ႇငမ်း ၼႆယဝ်ႉ။

တႆးလွတ်ႈလႅဝ်း