တီႉၺွပ်းလႆႈ ၵူၼ်းၵႃႉၶၢႆၶိူင်ႈၵွင်ႈၵၢင်ႇ တီႈဝဵင်းၼမ်ႉၸၢင်

မိူဝ်ႈဝၼ်းထီႉ 3 October 2022 (လိူၼ်သိပ်းဢဵတ်းမႂ်ႇ 9 ၶမ်ႈ ပီႊတႆး 2116 ၼီႈ) ယၢမ်းႁူဝ်ၶမ်ႈ 18:30 မူင်း တီႈႁူင်းလႅမ်းဢႄႉၸု (ႁူင်းလိုဝ်ႈသဝ်းၶႅၵ်ႇၶွၼ်ႈ) ပွၵ်ႉ (2) ဝဵင်းၼမ်ႉၸၢင် ၼၼ်ႉ မီးၸုမ်းၵႃႉၶၢႆၶိူင်ႈၵွင်ႈၵၢင်ႇ 2 ၸုမ်း သိုဝ်ႉၶၢႆၶိူင်ႈၵွင်ႈ ၵၢင်ႇတေႃႇၵၼ်သေ သမ်ႉဢမ်ႇႁၢၼ်ႉၸႂ်ၼိူဝ်ၵၼ်လႄႈ လႆႈပိုတ်းယိုဝ်းၵၼ်မွၵ်ႈ 7-8 ၵမ်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈ လၢတ်ႈၼႄဝႃႈ ဝၢႆးသေ ပဵၼ်လွင်ႈပိုတ်းယိုဝ်းၵၼ် တီႈၼႂ်းႁူင်းလိုဝ်ႈသဝ်းၼၼ်ႉယဝ်ႉ ယူႇဢမ်ႇပေႃးႁိုင် သိုၵ်းမၢၼ်ႈတင်း ပလိၵ်ႈမၢၼ်ႈ မႃးဝႅတ်ႉလွမ်ႉ ႁူင်းလိုဝ်ႈသဝ်းသေ တီႉၺွပ်းလႆႈ ၵူၼ်းၵႃႉၶၢႆၶိူင်ႈၵွင်ႈၵၢင်ႇ 6 ၵေႃႉ၊ ၶၢပ်ႈတူဝ်တၢႆၵူၼ်း 1 ၵေႃႉ ဢိၵ်ႇတင်း သိမ်းလႆႈၶိူင်ႈၵွင်ႈၵၢင်ႇ ဢၼ်မီးယူႇတီႈၼႂ်းႁူင်းလိုဝ်ႈသဝ်းၼၼ်ႉ ဝႃႈၼႆ၊ ၶိူင်ႈၵွင်ႈၵၢင်ႇ ဢၼ်တီႉၺွပ်းလႆႈၼၼ်ႉ ပဵၼ်သႅၼ်းလႂ် လၢႆလၢႆၼႆၼၼ်ႉတႄႉ ဢမ်ႇပႆႇလႆႈႁပ်ႉႁူႉၸွမ်း ဝႃႈၼႆ။

ၽၢႆႇသိုၵ်းမၢၼ်ႈတႄႉလၢတ်ႈဝႃႈ ပဵၼ်ၸုမ်း PDF မႃးႁႃသိုဝ်ႉၶိူင်ႈၵွင်ႈၵၢင်ႇသေ တေမႃးယူႇသဝ်းဝႆႉ ၸွမ်းၼႂ်းဝဵင်းၼမ်ႉၸၢင် ၼႆယူႇ။

ၵူၼ်းၵႃႉၶၢႆၶိူင်ႈၵွင်ႈၵၢင်ႇ ဢၼ်တီႉၺွပ်းလႆႈၼႆႉ ပလိၵ်ႈမၢၼ်ႈၶဝ် ဢဝ်ၵႂႃႇၵုမ်း ၶင်ဝႆႉတီႈ ႁူင်းပလိၵ်ႈမၢၼ်ႈ ဝဵင်းၼမ်ႉၸၢင်ယဝ်ႉ ဝႃႈၼႆ။

တႆးလွတ်ႈလႅဝ်း