တၢင်းယၢမ်ႈ/လွင်ႈႁဵတ်းသၢင်ႈ ဢၼ်ႁဵတ်းႁႂ်ႈႁႅင်းၶၢမ်ႇတူဝ်ႁဝ်းလူတ်းယွမ်းလူင်း

ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းၸွတ်ႇတူဝ်ႈဝႆႉၼႂ်းလုမ်ႈၾႃႉဝႆႉသေ ၼင်ႇႁိုဝ်ၸိူဝ်ႉမႅင်းတၢင်းပဵၼ် ပေႃးတေဢမ်ႇတိတ်းၸပ်းႁဝ်းလႆႈငၢႆႈငႅမ်ႈ၊ ပႅၵ်ႉသမ်ႉဝႃႈ ဢမ်ႇလႆႈဢွၵ်ႇၼွၵ်ႈႁိူၼ်းယေးတီႈယူႇသေတႃႉၵေႃႈ ယဝ်ႉ ႁဝ်းထုၵ်ႇလီ လုမ်းလႃးတူၺ်းထိုင် ပၢႆးယူႇလီႁဝ်းတႄႉတႄႉၼၼ်ႉယဝ်ႉ၊ ၼင်ႇႁိုဝ်ႁဝ်းတေပဵၼ်ၵူၼ်း ၵႅၼ်ႇၶႅင် လႄႈ မီးႁႅင်းၶၢမ်ႇတူဝ်ၶိုၵ်ႉၶႅမ်ႉၼၼ်ႉ ႁဝ်းထုၵ်ႇလီပၢၵ်ႈပႅတ်ႈ တၢင်းယၢမ်ႈ/လွင်ႈႁဵတ်းသၢင်ႈ ဢၼ် ၸၢင်ႈႁဵတ်းႁႂ်ႈ ႁႅင်းၶၢမ်ႇတူဝ်ႁဝ်း လူတ်းယွမ်းလူင်းၼၼ်ႉယူႇ၊ မၢင်ပွၵ်ႈၵေႃႈ ႁဝ်းဢမ်ႇတၼ်းဝႆႉသတိ ဢမ်ႇၾၢင်ႉ တူဝ်မႅၼ်ႈသေ ၸၢင်ႈႁဵတ်းႁႂ်ႈႁဝ်း ၵႂႃႇၵိၼ်ၺႃးတၢင်းၵိၼ် ဢၼ်ၶိုၼ်းတုမ်ႉတိူဝ်ႉတေႃႇပၢႆးယူႇလီႁဝ်းယူႇ၊ ယွၼ်ႉၼၼ်လႄႈ ႁဝ်းမႃးတူၺ်း မီးၶေႃႈသင်လၢႆလၢႆ ဢၼ်ႁဝ်းဢမ်ႇတၼ်းၾၢင်ႉတူဝ် ဢၼ်မႅၼ်ႈၸွမ်း တၢင်းယၢမ်ႈ/လွင်ႈႁဵတ်းသၢင်ႈႁဝ်းၽွင်ႈ။

• ၵိၼ်ၼမ်ႉဢေႇ

ၼင်ႇႁိုဝ် သႆႈတၢင်းၼႂ်းတူဝ်ႁဝ်းၼႆႉ တေႁဵတ်းၵၢၼ်လႆႈလီၼၼ်ႉ ထၢတ်ႈၼမ်ႉၼႆႉ ပဵၼ်လွင်ႈယႂ်ႇ သေပိူၼ်ႈယဝ်ႉ၊ ၽွင်းၶၢဝ်းမႆႈၸိူင်ႉၼႆ ႁိူဝ်ႇႁဝ်းၵေႃႈ လႆႈတူၵ်းၼမ်လႄႈ လူဝ်ႇလႆႈၵႆႉၵိၼ်ပၼ် ၼမ်ႉၼမ်ၼမ်၊ ပေႃးၵိၼ်ပၼ်ၼမ်ႉၼမ်ၼမ်ၸိုင် ထၢတ်ႈၼမ်ႉဢၼ်မီးၼႂ်းတူဝ်ႁဝ်းၼၼ်ႉ ပၢၵ်ႈပႅတ်ႈ သၢၼ်ၵွင်ႉဢၼ်မီးၼႂ်းတူဝ်ႁဝ်းသေ ႁႅင်းၶၢမ်ႇတူဝ်ႁဝ်းၵေႃႈ တိုၼ်းလီၶိုၼ်ႈမႃးဢမ်ႇႁၢင်ႉယဝ်ႉ။

• ၵႆႉၵိၼ်ထၢတ်ႈၵႃႈၾိၼ်း (Caffeine) လႄႈ ဢႄးလ်ၵေႃးႁေႃးလ် (Alcohol)

တၢင်းၵိၼ်ဢၼ်ပႃးထၢတ်ႈ ၵႃႈၾိၼ်း (Caffeine)  မိူၼ်ၼင်ႇ ၵေႃႇၾီႇ၊ ၼမ်ႉၸဵမ်းၼမ်ႉဝၢၼ် လႄႈ ၵိၼ်လဝ်ႈ၊ ဢႄးလ်ၵေႃးႁေႃးလ် ၼမ်ႁႅင်းၼႆၸိုင် ၸၢင်ႈႁဵတ်းႁႂ်ႈႁႅင်းၶၢမ်ႇတူဝ်ႁဝ်း လူတ်းယွမ်းလွႆးလွႆး သေဢမ်ႇၵႃး ထၢတ်ႈၼမ်ႉၼႂ်းတူဝ်ႁဝ်းၵေႃႈ လူတ်းယွမ်းပႃးလႄႈ သင်ပဵၼ်လႆႈ ထုၵ်ႇလီငိူင်ႉဝႄႈ။

• ၵိၼ်တၢင်းၵိၼ်ၸဵမ်းဝၢၼ်ႁႅင်း

ပေႃးၵႆႉၵိၼ်တၢင်းၵိၼ် ဢၼ်ၸဵမ်းဝၢၼ်ႁႅင်းၼႆၸိုင် မႃးတုမ်ႉတိူဝ်ႉတေႃႇ ႁႅင်းၶၢမ်ႇတူဝ်ႁဝ်းၵမ်းသိုဝ်ႈ လႄႈ ႁႅင်းၶၢမ်ႇတူဝ်ႁဝ်းၵေႃႈ တေလူတ်းယွမ်းသေ ရေႃးၵႃႇတၢင်းပဵၼ်ၵေႃႈ ၸၢင်ႈၶဝ်ႈတူဝ်ငၢႆႈ သေဢမ်ႇၵႃး ၵူၼ်းဢၼ်ၵႆႉၵိၼ် တၢင်းၵိၼ်ၸဵမ်းဝၢၼ်ႁႅင်းၼႆႉ ၵႆႉမီးတၢင်းပဵၼ်လိူတ်ႈဝၢၼ်၊ ယဵဝ်ႈဝၢၼ်ႈလႄႈ လိူတ်ႈသုင် ၸိူဝ်းၼႆႉပႃး၊ ယွၼ်ႉၼၼ်လႄႈ ႁဝ်းထုၵ်ႇလီၵိၼ်ပၼ် ထၢတ်ႈၸဵမ်းဝၢၼ် သၽႃႇဝ ဢၼ်လႆႈတီႈ မၢၵ်ႇမႆႉလႄႈ ၽၵ်းယိူဝ်ႈၼၢင်းၶဵဝ်ၸိူဝ်းၼႆႉၵူၺ်း။

• ၶၢဝ်းယၢမ်းၼွၼ်းဢေႇႁႅင်းၼႃႇ

ပုၼ်ႈတႃႇႁဝ်းတေမီးႁႅင်းသေ ႁဵတ်းၵၢၼ်ၵႂႃႇလႆႈ ၵူႈဝၼ်းဝၼ်းၼၼ်ႉၵေႃႈ လႆႈဢိင်ၼိူဝ် ၶၢဝ်းယၢမ်းၼွၼ်းလႄႈ ၶၢဝ်းယၢမ်းလိုဝ်ႈၽွင်ႈယူႇ၊ သင်ဝႃႈႁဝ်းဢမ်ႇလိုဝ်ႈပၼ်ၼမ်ၼမ်ၼႆ ႁႅင်းၵေႃႈ တေဢမ်ႇတဵမ်ထူၼ်ႈသေ ႁႅင်းၶၢမ်ႇတူဝ်ႁဝ်းၵေႃႈ လူတ်းယွမ်းလူင်းမႃးၼၼ်ႉယဝ်ႉ၊ ယွၼ်ႉၼၼ် လွင်ႈၼွၼ်းၼႆႉၵေႃႈ ပဵၼ်လွင်ႈယႂ်ႇယူႇဢၼ်ၼိုင်ႈ၊ ပုၼ်ႈတႃႇၵူၼ်းလူင်ၼိုင်ႈၵေႃႉၼႆႉ တီႈဢေႇမၼ်း တေလႆႈမီးၶၢဝ်းယၢမ်းၼွၼ်း 8 ၸူဝ်ႈမူင်းတေႃႇဝၼ်း။

တႆးလွတ်ႈလႅဝ်း
www.dailyrepublic.com