တႃႇၵႅတ်ႇၶႄပၼ်ၵူဝ်းရီးယႃးၸၢၼ်းၼၼ်ႉ ဢမေႇရိၵၢၼ်ႇ ၽွမ်ႉတူဝ်ႈတၼ်း တႃႇသူင်ႇၶိူင်ႈယိပ်းၶိုတ်းၵၢပ်ႈပၼ်ထႅင်ႈတင်းၼမ်

သိုဝ်ႇၶၢဝ်ႇၼွၵ်ႈမိူင်း ဢွၵ်ႇဝႆႉမိူဝ်ႈဝၼ်းထီႉ 17 September 2022 (လိူၼ်သိပ်းလွင်ႈ 8 ၶမ်ႈ ပီႊတႆး 2116 ၼီႈ) ဝႃႈ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ႁူမ်ႈၵၼ်သၢၼ်ၶတ်း ၵူဝ်းရီးယႃးႁွင်ႇ ၵဵဝ်ႇလူၺ်ႈလွင်ႈ ဢွၵ်ႇမၢႆမီႈမႂ်ႇ ၵဵဝ်ႇလွင်ႈၸႂ်ႉတိုဝ်းမၢၵ်ႇၼိဝ်းၶလီးယႃး ၼႆၼၼ်ႉသေ မီးလွင်ႈၶဵင်ႈၶႅင်ပေႃႇပဵၼ် မႃးထႅင်ႈပွၵ်ႈၵမ်းမႂ်ႇလႄႈ ႁဵတ်းႁႂ်ႈဢမေႇရိၵၢၼ်ႇ ပိုၼ်ၽၢဝ်ႇၸွႆႈ ၵူဝ်းရီးယႃးၸၢၼ်း ၵူၺ်းဢမ်ႇၵႃး တေသိုပ်ႇၽိုၵ်းၽွၼ်ႉၵၢၼ်သိုၵ်းႁူမ်ႈၵၼ်ၵႂႃႇ ဝႃႈၼႆ။

ပၢင်ၵုမ် EDSCG (Extended  Deterrence Strategy and Consultation Group) ဢၼ်လႆႈၸတ်းႁဵတ်းပွၵ်ႈဢွၼ်တၢင်းသုတ်း မိူဝ်ႈပီႊ 2018 ၼၼ်ႉၼႄဝႆႉဝႃႈ ဢမေႇရိၵၢၼ်ႇတေၵႅတ်ႇၶႄပၼ်ၵူဝ်းရီးယႃးၸၢၼ်း သင်ၵူဝ်းရီးယႃးႁွင်ႇ ၸႂ်ႉမၢၵ်ႇ ၼိဝ်းၶလီးယႃးတေႃႇၵူဝ်းရီးယႃးၸၢၼ်းလႄႈ တေလႆႈႁပ်ႉလွင်ႈတုမ်ႉတွပ်ႇၶိုၼ်း ႁၢဝ်ႈႁၢဝ်ႈႁႅင်းႁႅင်း ဝႃႈၼႆ။

လိူဝ်သေၼၼ်ႉ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ပၼ်ၵႂၢမ်းမၼ်ႈ တေႃႇၵၼ်ဝႃႈ “တေၶတ်းၸႂ်ၵူႈလွၵ်းၵူႈလၢႆး တႃႇတေတုမ်ႉတွပ်ႇၶိုၼ်း ၵူဝ်းရီးယႃးႁွင်ႇ၊ တေႁူမ်ႈၵၼ်ထိင်းသိမ်းလွင်ႈမၼ်ႈၼိမ်သဝ်း ၼႂ်းပိုၼ်ႉတီႈ” ဝႃႈၼႆ။ ဢမေႇရိၵၢၼ်ႇ တေသူင်ႇႁိူဝ်းတၢင်ႇႁိူဝ်းမိၼ် USS Ronald Reagan လႄႈ ႁိူဝ်းတႃႇဢဝ်ႁူမ်ႇလူမ်ႈ ထႅင်ႈလၢႆလမ်း ၶဝ်ႈၵႂႃႇၼႂ်းပိုၼ်ႉတီႈၵူဝ်းရီးယႃး တႃႇၼႄဝႃႈ ဢမေႇရိၵၢၼ်ႇ ၽွမ်ႉတူဝ်ႈတၼ်း တႃႇတေၸွႆႈၵႅတ်ႇၶႄ ၵူဝ်းရီးယႃးၸၢၼ်းတဵမ်တဵမ်ထူၼ်ႈထူၼ်ႈ ဝႃႈၼႆ။

ၸိူင်ႉႁိုဝ်ၵေႃႈလီ တူဝ်တႅၼ်း EDSCG လႆႈဢွၼ်ၵၼ်သူႇၸႂ်းတူၺ်း ႁိူဝ်းမိၼ်ပွႆႇမၢၵ်ႇ B-52 ဢၼ်ပဵၼ်ၶွင်ဢမေႇရိၵၢၼ်ႇၼၼ်ႉသေ ယိုၼ်ယၼ်ႁူမ်ႈၵၼ်ဝႃႈ တေသိုပ်ႇၽိုၵ်းၽွၼ်ႉသိုၵ်းႁူမ်ႈၵၼ်ၵႂႃႇဝႃႈၼႆ။

မိူဝ်ႈဝူင်ႈပူၼ်ႉမႃးၼႆႉ ၵူဝ်းရီးယႃးႁွင်ႇဝႃႈ သင်မီးသေမိူင်းမိူင်း တေၶဝ်ႈတိုၵ်း ၵူဝ်းရီးယႃးႁွင်ႇ ပေႃးၼႆၸိုင် ၵူဝ်းရီးယႃးႁွင်ႇ တေၸႂ်ႉမၢၵ်ႇၼိဝ်းၶလီးယႃး ပိုတ်းယိုဝ်းၽူႈၶဵၼ်ဢွၼ်တၢင်း ပိူဝ်ႈတႃႇၵႅတ်ႇၶႄမိူင်းၸဝ်ႈၵဝ်ႇ။ လိူဝ်သေၼၼ်ႉ ၶိမ်းၵျွင်းဢိုၼ်း ယင်းလႆႈပိုၼ်ၽၢဝ်ႇလၢတ်ႈဝႃႈ မိူင်းၵူဝ်းရီးယႃးႁွင်ႇၼႆႉ ပဵၼ်မိူင်းမႁႃႇဢၢမ်းၼၢတ်ႈၼိဝ်းၶလီးယႃးယဝ်ႉလႄႈ တေၸၢင်ႈၸၢမ်းယိုဝ်း မၢၵ်ႇၼိဝ်းၶလီးယႃးပဵၼ်ပွၵ်ႈဢွၼ်တၢင်းသုတ်း ၼႂ်းႁွပ်ႈ 5 ပီႊ ဝႃႈၼႆ။

တႆးလွတ်ႈလႅဝ်း