တႃႇၶၢႆၶိူင်ႈယိပ်းတိုဝ်းၽၢႆႇၵၢၼ်သိုၵ်းပၼ်ထႆႇဝၼ်ႇၼၼ်ႉ ၵျူဝ်း ပၢႆႇတႅၼ်ႇ တေတၢင်ႇထိုင်ၼႂ်းသၽႃး

သိုဝ်ႇၶၢဝ်ႇၵၢၼ်မိူင်း မိူင်းဢမေႇရိၵၢၼ်ႇ Politico ဢွၵ်ႇဝႆႉဝႃႈ ၼင်ႇႁိုဝ်ထႆႇဝၼ်ႇ ပေႃးတေပိုင်ႈဢိင်တူဝ်ၵဝ်ႇလႆႈၼၼ်ႉ ဢမေႇရိၵၢၼ်ႇ မီးၽႅၼ်ၵၢၼ်တေၶၢႆ ၶိူင်ႈယိပ်းတိုဝ်းၽၢႆႇၵၢၼ်သိုၵ်းပၼ် မိူၼ်ၼင်ႇ မၢၵ်ႇမိတ်ႉသႆး တႃႇယိုဝ်းႁိူဝ်းတိုၵ်း သႅၼ်း AGM-84L Harpoon Block II 60 လုၵ်ႈ လႄႈ မၢၵ်ႇမိတ်ႉသႆး ယိုဝ်းၼိူဝ်ၵၢင်ႁၢဝ်တေႃႇၵၢင်ႁၢဝ် သႅၼ်း AlM-9X Block II Sidewinder 100 လုၵ်ႈ တႃႇသႂ်ႇတီႈ ႁိူဝ်းမိၼ်တိုၵ်း F-16 ၼႆသေ တေတူၵ်းမႅၼ်ႈ သၢင်ႉငိုၼ်း 1,100 လၢၼ်ႉတေႃႇလႃႇဢမေႇရိၵၢၼ်ႇ ဝႃႈၼႆ။

Politico ယင်းလၢတ်ႈဝႃႈ ၸုမ်းလူင်ပွင်ၸိုင်ႈ ၵျူဝ်း ပၢႆႇတႅၼ်ႇ ဢုပ်ႇဢူဝ်းလႆႈၸႂ် ၵၼ် လွင်ႈတေၶၢႆၶိူင်ႈယိပ်းတိုဝ်းၽၢႆႇၵၢၼ်သိုၵ်း ပၼ်ထႆႇဝၼ်ႇယဝ်ႉ ၶိုၼ်းသိုပ်ႇ တၢင်ႇၶဝ်ႈၼႂ်းသၽႃးသေ ပႂ်ႉႁႂ်ႈသၽႃးၵူၼ်းမိူင်းဢမေႇရိၵၢၼ်ႇ လူင်းသဵင်ပၼ် ၶႂၢင်ႉၵူၺ်းလႄႈ လၢမ်းၶၢတ်ႈဝႆႉဝႃႈ တေပဵၼ်ၵႂႃႇၸွမ်းၼင်ႇ ၸုမ်းလူင်ပွင်ၸိုင်ႈ ၵျူဝ်း ပၢႆႇတႅၼ်ႇတုၵ်းယွၼ်းၼၼ်ႉယူႇ ဝႃႈၼႆ။

လွင်ႈ‌ဢမေႇရိၵၢၼ်ႇ တေၶၢႆၶိူင်ႈယိပ်းတိုဝ်းၽၢႆႇၵၢၼ်သိုၵ်းပၼ်ထႆႇဝၼ်ႇၼႆႉ မီးမႃးဝၢႆးသေ ၶႄႇဢမ်ႇႁၢၼ်ႉၸႂ်ၼိူဝ် လွင်ႈ Nancy Pelosi ႁူဝ်ပဝ်ႈသၽႃးၵူၼ်းမိူင်း ဢမေႇရိၵၢၼ်ႇ သူႇၸႂ်းၵုၼ်ႇထႆႇဝၼ်ႇယဝ်ႉ ၶႄႇမီးလွင်ႈၽိုၵ်းၽွၼ်ႉၵၢၼ်သိုၵ်း လွမ်ႉႁွပ်ႈၵုၼ်ထႆႇဝၼ်ႇႁၢဝ်ႈႁႅင်း လႄႈ လိူဝ်သေၼၼ်ႉ ၶႄႇ တင်း ဢမေႇရိၵၢၼ်ႇ ၵေႃႈ မီးလွင်ႈၶဵင်ႈၶႅင်ၵၼ်မႃးႁၢဝ်ႈႁႅင်းမိူၼ်ၵၼ် ဝႃႈၼႆ။

တႆးလွတ်ႈလႅဝ်း