ထႅင်ႈလၢႆသိပ်းပီတၢင်းၼႃႈ ၶိူဝ်းၵူၼ်းႁဝ်းၶႃႈ ၸၢင်ႈတေၵႂႃႇယူႇၼိူဝ်လုၵ်ႈ လိူၼ် လၢဝ် လႆႈ

ႁဝ်းၶႃႈမႃးတူၺ်းၽွင်းယၢမ်းတေႃႈလဵဝ် တႃႇၶိူဝ်းၵူၼ်းႁဝ်းၶႃႈ ပေႃးတေၶိုၼ်ႈၵႂႃႇယူႇ သဝ်းလႆႈ ၼိူဝ်လုၵ်ႈလိူၼ် လုၵ်ႈလၢဝ် လႄႈႁူမ်ႈထိုင် လၢဝ်ထႅင်ႈလၢႆလၢႆသႅၼ်းၼၼ်ႉ လႆႈၶတ်းၸႂ်ႁဵတ်းမႃးလၢႆပွၵ်ႈလၢႆၵမ်း ယင်းႁဵတ်းၸိူင်းဢွၵ်ႇမႃးပၼ်ႁဝ်းၶႃႈတူၺ်း ထႅင်ႈလူးၵွၼ်ႇ တႃႇတေပူၵ်းတင်ႈတီႈယူႇတၼ်းသဝ်း ၼိူဝ်လုၵ်ႈလိူၼ် လုၵ်ႈလၢဝ် ၼၼ်ႉ ၸမ်တေပဵၼ်မႃးလွင်ႈတေႉၵမ်းလွႆးလွႆးၶႃႈယဝ်ႉ။

Elon Musk ၽူႈမၢၵ်ႈမီးလူင်ၼႂ်းလုမ်ႈၾႃႉ လႄႈ ၸဝ်ႈၶွင်ၶွမ်ႇပၼီႇ SpaceX ယၢမ်ႈလၢတ်ႈဝႃႈ “ၶဝ်တေၶူင်သၢင်ႈမိူင်း ၼိူဝ်လၢဝ် Mars ႁႂ်ႈၶိူဝ်းၵူၼ်း ယူႇသဝ်းထင်လႆႈတႃႇ  1 လၢၼ်ႉၵေႃႉ ယိူင်းဢၢၼ်းတႄႉ တေဢၢၼ်း ႁႂ်ႈယဝ်ႉတူဝ်ႈၼႂ်းပီႊ  2050” ၼႆယူႇ၊ ဝႃႈၼၼ်သေတႃႉ တေႃႇထိုင်ယၢမ်းမိူဝ်ႈလဵဝ် ပႆႇယၢမ်ႈမီးၵူၼ်းႁဝ်း ၵႂႃႇထိုင် လူင်းယဵပ်ႇ ၼိူဝ်လၢဝ် Mars လုၵ်ႈၼႆႉလႆႈသေပွၵ်ႈ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ မီးၶေႃႈထၢမ်မႃးဝႃႈ ဢမ်ႇဝႃႈလၢဝ်လုၵ်ႈလႂ်ႁူၺ်ႇလႂ် ၵေႃႈယဝ်ႉ တႃႇႁႂ်ႈၵူၼ်းႁဝ်းၶႃႈ ယူႇသဝ်းၵုမ်းၵမ်မၼ်းလႆႈၼၼ်ႉ တေလႆႈၸႂ်ႉၶၢဝ်းယၢမ်းႁိုင်ထႅင်ႈၵႃႈႁိုဝ်၊ ၵူၺ်းသင်ပဵၼ်လၢဝ် Mars ၼႆႉ ယွၼ်ႉမၼ်းဢမ်ႇႁၢင်ႇၵႆလုမ်ႈၾႃႉလူင်ႁဝ်းၵႃႈႁိုဝ် ၾိင်ႈတိုၼ်းသၽႃႇဝၼႆၵေႃႈ ဢမ်ႇပေႃးပိူင်ႈၵၼ်သင် တင်းလုမ်ႈၾႃႉလူင်ႁဝ်း ယွၼ်ႉၼၼ်လႄႈ ၶိူဝ်းၵူၼ်းႁဝ်း ၸိူဝ်းမီးတၢင်းႁူႉၶိုတ်းတၼ်း ၶိုတ်းၵၢပ်ႈၶဝ် မုင်ႈမွင်းတႃႇတေၵႂႃႇသဝ်းထင် ဝႃႈၼၼ်သေတႃႉ တႃႇတေႁဵတ်းပဵၼ်လႆႈၼၼ်ႉ တေလႆႈၸႂ်ႉၶၢဝ်းယၢမ်းထႅင်ႈ လၢႆသိပ်းပီႊ ၼႆယူႇ။

Professor Serkan Saydam ၽူႈလူင်ႉလႅၼ်ႇၽၢႆႇတၢင်းၵၢင်ႁၢဝ် ပိုတ်ႇလၢတ်ႈတီႈ ဝႅပ်ႉသၢႆႉ Live Science ၼၼ်ႉ လႆႈလၢတ်ႈထိုင်ပႃးဝႃႈ လွင်ႈမုင်ႈမွင်ႈၶွင် Elon Musk တႃႇတေၵေႃႇတင်ႈဝၢၼ်ႈမိူင်းၼိူဝ်လုၵ်ႈလိူၼ်လုၵ်ႈလၢဝ်ၼၼ်ႉ မီးတိုဝ်ႉတၢင်းပဵၼ်ၵႂႃႇလႆႈသုင်တေႉတေႉ” ၼႆယဝ်ႉ၊ Professor Serkan Saydam ၼႆႉတူဝ်မၼ်းၸၢႆးၵေႃႈ မၼ်ႈၸႂ်ဝႃႈ တႄႇဢဝ်ဝၼ်းမိူဝ်ႈၼႆႉၵႂႃႇ တေႃႇထိုင်ၼႂ်းပီႊ 2050 ၼၼ်ႉ တိုၼ်းတေမီးၶိူဝ်းၵူၼ်းႁဝ်းသေမိူင်းမိူင်း ၶိုၼ်ႈတင်ႈဝၢၼ်ႈႁဵတ်းႁိူၼ်း ယူႇၼိူဝ်လုၵ်ႈလၢဝ် Mars လႆႈၼႆယူႇ။

Professor Serkan Saydam ၼႆႉ ပဵၼ်ၽူႈလူင်ႉလႅၼ်ႇၽၢႆႇၶုၼ်းၶႂႃႉ ၶူင်သၢင်ႈ တင်ႈဝၢၼ်ႈတင်ႈမိူင်း ၼႆလႄႈ တူဝ်မၼ်းၸၢႆးလႆႈသူၼ်ၸႂ် ဝႆႉၼမ်ႉၼၵ်း တႃႇၶူင်သၢင်ႈပိုၼ်ႉထၢၼ် ၼိူဝ်လုၵ်ႈလိူၼ်လၢဝ် လူၺ်ႈတေၶုတ်းႁႃသၢႆၼမ်ႉ ဢၼ်ပဵၼ်ၼမ်ႉၶႅင် ၸၢင်ႈတေထူပ်းႁၼ်မေႃႇၼမ်ႉသေတီႈတီႈ ဢမ်ႇၼၼ် တေၸႂ်ႉတိုဝ်းလွၵ်းလၢႆး ဢဝ်ႁႅင်းထၢတ်ႈတႂ်ႈလိၼ် ႁဵတ်းပဵၼ်ၼမ်ႉမႃး ဝႃႈၼႆ။

ၼမ်ႉဢၼ်ႁႃလႆႈၼိူဝ်လုၵ်ႈလၢဝ် Mars ၼႆႉ တေဢဝ်ၵႂႃႇၸႂ်ႉတိုဝ်း ၼႂ်းၵၢၼ်ၽုၵ်ႇသွမ်ႈ တႃႇလဵင်ႉၶိုၼ်းၶိူဝ်းၵူၼ်းဢၼ်သဝ်းထင်ဝႆႉၼိူဝ်လိူၼ် ၼႂ်းဢၼႃႇၵၢတ်ႈ၊ တေမိူၼ်ၼႂ်းၸိူင်း The Martian ၼၼ်ႉလီလီၶႃႈယဝ်ႉ လိူဝ်သေၼၼ်ႉ ယင်းၵဵပ်းဢဝ် Hydrogen လႄႈ Minerals ဢၼ်မီးၼိူဝ်လၢဝ် Mars ၼႆႉသေ ဢဝ်မႃးႁဵတ်းပဵၼ်ယၢမ်း/ႁႅင်းထၢတ်ႈၾႆး တႃႇၸႂ်ႉတိုဝ်းၼႂ်းမၢၵ်ႇ Rocket ဢမ်ႇၼၼ် spaceship ၼၼ်ႉၵေႃႈလႆႈပႃးဝႃႈၼႆ။

ၸိူင်ႉႁိုဝ်ၵေႃႈယဝ်ႉ ၽူႈလူင်ႉလႅၼ်ႇၽၢႆႇပၢႆးသၢႆႈၶဝ်ၵမ်ႈၽွင်ႈတႄႉဝႃႈ တႃႇတေႁဵတ်းႁႂ်ႈယဝ်ႉတူဝ်ႈၼႂ်းပီႊ 2050 တေဢမ်ႇပဵၼ်ၵႂႃႇလႆႈ ၼႆယူႇ၊ Dr. Louis Friedman ၽူႈလူင်ႉလႅၼ်ႇၽၢႆႇတၢင်းၵၢင်ႁၢဝ် ပဵၼ်ၽူႈၵေႃႇတင်ႈႁူင်းၵၢၼ် The Planetary Society ပိုတ်ႇလၢတ်ႈၵႂႃႇတီႈသိုဝ်ႇၶၢဝ်ႇ Gizmodo ၼႂ်းပီႊ 2019 ၼၼ်ႉတႄႉဝႃႈ “တႃႇတေၵေႃႇတင်ႈ ဢွင်ႈတီႈယူႇသဝ်း ၼိူဝ်လုၵ်ႈလိူၼ် လုၵ်ႈလၢဝ်ၼၼ်ႉ တေပႆႇပဵၼ်မႃးငၢႆႈငၢႆႈ” ၼႆယူႇ။

ထႅင်ႈလၢႆသိပ်းပီႊတၢင်းၼႃႈၼႆႉ ၶိူဝ်းၵူၼ်းႁဝ်းၶႃႈ တိုၼ်းတေလႆႈၶိုၼ်ႈၵႂႃႇယဵပ်ႇ ၼိူဝ်လုၵ်ႈလၢဝ် Mars ၼႆႉယူႇ ၼႆလႄႈ ပေႃးထိုင်မႃးၼႂ်းပီႊ 2033 ၼၼ်ႉ ၶႄႇ မီးၽႅၼ်ၵၢၼ်တေသူင်ႇၵူၼ်း ၶိုၼ်ႈၵႂႃႇၼိူဝ်လုၵ်ႈလၢဝ်ဢၼ်ပဵၼ်သီလႅင်ၼၼ်ႉသေ ၽၢႆႇတၢင်း NASA ၵေႃႈ တေသူင်ႇၵူၼ်းၶဝ် ၶိုၼ်ႈၵႂႃႇတီႈလုၵ်ႈလၢဝ်လုၵ်ႈၼႆႉ ၼႂ်းပီႊ2030 မိူၼ်ၵၼ် ဝႃႈၼႆ။

တႃႇတေၵေႃႇတင်ႈတီႈယူႇတၼ်းသဝ်းၼိူဝ်လုၵ်ႈလၢဝ်လႆႈၼၼ်ႉ ၵႃႈတေလႆႈပိုင်ႈဢိင်တူဝ်ၵဝ်ႇႁႂ်ႈလႆႈ ၵႃႈတေလႆႈမေႃဢဝ်ၶူဝ်းၶွင်သၽႃႇဝ ၼိူဝ်လုၵ်ႈလၢဝ်ၼၼ်ႉ မႃးၸႂ်ႉတိုဝ်းႁႂ်ႈပဵၼ်ၽွၼ်းလီတႃႇယူႇသဝ်းၵႂႃႇလႆႈ။ ယွၼ်ႉဝႃႈ လၢဝ် Mars လုၵ်ႈၼႆႉ ႁႅင်းၵတ်း -60°C လႄႈ တႃႇၵႂႃႇထိုင်တီႈလုၵ်ႈလၢဝ်ၼၼ်ႉ လႆႈၵေႃႈ ၵူၼ်းႁဝ်းၶႃႈတေၸႂ်ႉၶၢဝ်းယၢမ်း ဢွၵ်ႇၶၢဝ်းတၢင်း ႁိုင် 8-9 လိူၼ် ဝႃႈၼႆ။

ပိၼ်ႇတႅမ်ႈ − ၸၢႆးထုၼ်းလႃႉ

တႆးလွတ်ႈလႅဝ်း

ဢိင်− https://www.bbc.com/thai/articles/c039ygl326vo?at_link_type=web_link&at_bbc_team=editorial&at_format=link&at_ptr_name=facebook_page&at_campaign=Social_Flow&at_link_id=D8844DEE-D75E-11ED-AF3C-169AFF7C7F44&at_link_origin=BBC_news_Thai&at_campaign_type=owned&at_medium=social&fbclid=IwAR36tFsINNXuLEKEWmMHUuAh9B5HmjN1KjG-JFZM4IFiQvX9XwWoTOxKxSU