ပလိၵ်ႈထႆး တီႉၺွပ်းလႆႈယၢင်ရႃႇပႃႇမိူင်းႁူမ်ႈတုမ် ဢၼ်လၵ်ႉတေႃႉၶဝ်ႈမိူင်းထႆး

ၸဝ်ႈၼႃႈတီႈပလိၵ်ႈထႆး တီႉၺွပ်းလႆႈ ယၢင်ရႃႇပႃႇ ဢၼ်လုၵ်ႉတီႈၼႂ်းမိူင်းႁူမ်ႈတုမ် သေ လၵ်ႉတေႃႉတၢင်ႇၶဝ်ႈၵႂႃႇၼႂ်းမိူင်းထႆး ႁူမ်ႈပႃးၵူၼ်းတေႃႉသူင်ႇ 1 ၵေႃႉ။

မိူဝ်ႈဝၼ်းထီႉ 8 August 2024 (လိူၼ်ၵဝ်ႈမႂ်ႇ 4 ၶမ်ႈ ပီႊတႆး 2118 ၼီႈ) ဝၢႆးသေ ၸဝ်ႈၼႃႈတီႈပလိၵ်ႈထႆးၶဝ် လႆႈႁပ်ႉၶၢဝ်ႇ မီးလွင်ႈလၵ်ႉလွမ်တေႃႉသူင်ႇယၢင်ရႃႇပႃႇ လုၵ်ႉၼႂ်းမိူင်းႁူမ်ႈတုမ် ၶဝ်ႈၵႂႃႇၼႂ်းမိူင်းထႆး ၽၢၼ်ႇၼႂ်းပိုၼ်ႉတီႈဢိူင်ႇၶျႆးၵသဵမ် ၸႄႈဝဵင်းပၢင်းသၽၢၼ်း ၸႄႈတွၼ်ႈပရႃႉၸူပ်ႇၶီးရီးၶၼ် ၼႆလႄႈ ၸင်ႇလႆႈၵႂႃႇၵူတ်ႇ ထတ်းတူၺ်းၸွမ်းသေ ထူပ်းႁၼ်ၵႃးလမ်းၼိုင်ႈ ၸင်ႇလႆႈၸွမ်းၵႂႃႇတေႃႇပေႃးထိုင် တီႈလၢၼ်ႉသျဵင်းၵၢၼ်ယၢင် ၼႂ်းၸႄႈဝဵင်းပၢင်းသၽၢၼ်း လႄႈ တီႉၺွပ်းလႆႈယၢင်ရႃႇပႃႇ ၼမ်ႉၼၵ်း 1,291 ၵီႇလူဝ်ႇၵရမ်ႇ ၼႆယဝ်ႉ။

ၸွမ်းၼင်ႇပလိၵ်ႈထႆး လႆႈၸႅတ်ႈထၢမ် ၵူၼ်းႁေႃႈၵႃးၼၼ်ႉသေ လၢတ်ႈဝႃႈ မၼ်းလႆႈ ႁပ်ႉၸၢင်ႈတီႈၸဝ်ႈၶွင်လၢၼ်ႉသျဵင်းၵၢၼ်ယၢင် ႁႂ်ႈၵႂႃႇတေႃႉယၢင်ရႃႇပႃႇ ၵႂႃႇသူင်ႇတီႈလၢၼ်ႉ လူၺ်ႈလႆႈၵႃႈၸၢင်ႈ ၼပ်ႉပဵၼ်ၼမ်ႉၼၵ်း 1 ၵီႇလူဝ်ႇၵရမ်ႇ လႂ် 2 ဝၢတ်ႇ လႄႈ ယၢမ်ႈလႆႈတေႃႉသူင်ႇမႃးယဝ်ႉပဵၼ်ၶၢဝ်းတၢင်း 1 ပီႊ ဝႃႈၼႆ။

ဝၢႆးၼၼ်ႉ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် ၸင်ႇလႆႈတီႉၺွပ်းၵုမ်းထိင်းသေ လႆႈႁဵတ်းသၢင်ႈပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ၼႆယဝ်ႉ။

တႆးလွတ်ႈလႅဝ်း